بھارت میں مسیحی برادری کو کرسمس کے موقع پر ہندوتوا انتہا پسندوں کی جانب سے شدید مظالم اور تضحیک کا سامنا کرنا پڑا۔ کرسمس تقریبات کے دوران منظم دہشت گرد حملوں، چرچز کی بے حرمتی اور سوشل میڈیا پر مسیحیت کے مقدس ترین عقائد کا مذاق اڑایا گیا، جس پر عالمی برادری کی خاموشی ایک بڑا سوالیہ نشان کھڑا کرتی ہے۔

تصاویر میں واضح طور پر دیکھا جا سکتا ہے کہ کس طرح ہندوتوا شدت پسندوں نے حضرت عیسیٰ مسیح علیہ السلام کی صلیب پر قربانی کی تضحیک کی ہے۔ ایک شخص کو حضرت عیسیٰ کے لباس میں سولی کی نقالی کرتے ہوئے دکھایا گیا ہے، جبکہ دیگر شرپسند اس منظر کا حصہ بن کر مذہبی جذبات کو ٹھیس پہنچا رہے ہیں۔ سوشل میڈیا پر یہ ویڈیوز وائرل ہوئیں جہاں 'یسوع کے یوم پیدائش کے لیے میں کافی پرجوش ہوں' جیسے الفاظ کے ساتھ یہ گھناؤنی حرکات انجام دی گئیں، جو مسیحی عقائد کی سنگین توہین ہے۔

صرف تضحیک ہی نہیں بلکہ کرسمس کی علامت سمجھی جانے والی سجاوٹوں اور سانتا کلاز کے مجسموں کو بھی ہندوتوا غنڈوں نے نشانہ بنایا۔ تصاویر میں دکھایا گیا ہے کہ کس طرح ہندوتوا عناصر کرسمس کی سجاوٹ اور سانتا کلاز کے مجسموں کو لاٹھیوں اور ڈنڈوں سے توڑ پھوڑ کر رہے ہیں، جو مسیحی برادری کے تہوار کی خوشیوں کو سبوتاژ کرنے کی منظم کوشش ہے۔ یہ حملے کرسمس کے پرامن ماحول کو بگاڑنے اور خوف و ہراس پھیلانے کی ایک سوچی سمجھی سازش کا حصہ ہیں۔

بھارت میں ہندوتوا کی بڑھتی ہوئی لہر نے اقلیتوں بالخصوص مسلمانوں اور مسیحیوں کی زندگی اجیرن کر دی ہے۔ مذہبی آزادی جو کسی بھی جمہوری ملک کا بنیادی ستون ہوتی ہے، بھارت میں بری طرح پامال کی جا رہی ہے۔ اقلیتوں کے حقوق کو پاؤں تلے روندا جا رہا ہے اور انہیں اپنے عقائد کے مطابق زندگی گزارنے کی آزادی سے محروم کیا جا رہا ہے۔ یہ واقعات ہندوتوا نظریے کی اس بڑھتی ہوئی جارحیت کا مظہر ہیں جو بھارت کو ایک سیکولر ریاست سے ہندوراشٹر میں تبدیل کرنے کے درپے ہے۔

یہ تمام واقعات اس بات کا ثبوت ہیں کہ بھارت میں اقلیتوں کے حقوق اور مذہبی آزادی کی حقیقت کھل کر سامنے آ چکی ہے۔ ہندوتوا انتہا پسندوں کی یہ کارروائیاں بھارتی حکومت کی سرپرستی اور عالمی برادری کی خاموشی کی وجہ سے مزید پروان چڑھ رہی ہیں۔ بین الاقوامی تنظیموں اور انسانی حقوق کے علمبرداروں پر لازم ہے کہ وہ بھارت میں اقلیتوں کے خلاف ہونے والے ان مظالم کا نوٹس لیں اور مذہبی آزادی کے تحفظ کے لیے اپنا کردار ادا کریں۔