امریکہ کی ریاست مشی گن کے شہر ڈیٹر بورن میں قرآن مجید کی بے حرمتی کی دلخراش کوشش کی گئی، جسے ایک غیرت مند مسلمان نے بہادری سے ناکام بنا دیا۔ اس واقعے کے بعد وہاں شدید جھگڑا شروع ہو گیا جس کی فوٹیج سوشل میڈیا پر تیزی سے وائرل ہو رہی ہے اور دنیا بھر کے مسلمانوں میں غم و غصے کی لہر دوڑ گئی ہے۔

تفصیلات کے مطابق، یہ ناپاک سلسلہ صیہونی جیک لِنگ نے شروع کیا۔ وائرل ہونے والی ویڈیو میں دیکھا جا سکتا ہے کہ جیک لِنگ نامی شخص قرآن پاک کو نذر آتش کرنے کی کوشش کر رہا ہے اور اسی دوران ایک باہمت مسلمان شخص نے اسے روکا اور قرآن پاک کو بچایا۔ اس موقع پر دونوں کے درمیان شدید تلخ کلامی اور ہاتھا پائی بھی ہوئی جس نے صورتحال کو مزید کشیدہ کر دیا۔

ڈیٹر بورن ایک مسلم اکثریتی شہر ہے جہاں حال ہی میں دوسری مرتبہ ایک مسلمان میئر اور ان کی پوری ٹیم مسلمان منتخب ہوئی ہے۔ اس شہر میں مسلمانوں کی بڑی تعداد آباد ہے اور وہ اپنے مذہبی جذبات کے حوالے سے انتہائی حساس ہیں۔ ایسے شہر میں مقدس کتاب کی توہین کی کوشش نے مسلم کمیونٹی کو شدید رنج پہنچایا ہے۔

ذرائع کے مطابق، فلوریڈا سے آئے ہوئے کچھ صیہونیوں نے پوری منصوبہ بندی کے تحت یہ ناپاک حرکتیں شروع کیں تاکہ مسلمانوں کو مشتعل کیا جا سکے اور انہیں جھگڑوں پر اکسایا جائے۔ ان کی کوشش تھی کہ مسلمانوں کو غصہ دلا کر امن و امان کی صورتحال خراب کی جائے اور پھر اس کا الزام مسلم کمیونٹی پر عائد کیا جائے۔

اس واقعے نے مسلم کمیونٹی میں شدید غم و غصے کی لہر دوڑا دی ہے اور اس کی مذمت کی جا رہی ہے۔ مذہبی آزادی اور مقدسات کی توہین کے خلاف آوازیں اٹھائی جا رہی ہیں اور مطالبہ کیا جا رہا ہے کہ ایسے شر پسند عناصر کے خلاف سخت قانونی کارروائی کی جائے۔ یہ واقعہ امریکہ میں بڑھتے ہوئے اسلاموفوبیا اور مسلم مخالف جذبات کی ایک اور واضح مثال ہے۔