شعور نیوز( ویب ڈیسک):سعودی عرب کی مقدس سرزمین پر پاکستان سے زناکاری کے لیے خواتین بھیجنے والا گروہ بے نقاب ہوگیا۔وفاقی تحقیقاتی ایجنسی (ایف آئی اے) کے مطابق ملتان ایئرپورٹ پر سعودی ایمبیسی سے عمرے کے ویزے جاری کرواکے ، سعودی عرب کی مقدس سرزمین پر جسم فروشی کا نیٹ ورک چلایا جا رہا ہے۔ انیشہ نامی ایک جسم فروش خاتون کی گرفتاری کے بعد اُس کی نشاندہی پر زناکاری نیٹ ورک کے صرف ایک دلال کو گرفتار کر لیا گیا۔ادارے کے مطابق ابتدائی تفتیش کے دوران خاتون کے موبائل فون، بات چیت اور دیگر

ڈیجیٹل مواد کی جانچ سے ’کمرشل جسم فروشی ‘سے متعلق شواہد سامنے آئے ہیں۔

ایف آئی اے ریکارڈ کے مطابق گذشتہ ایک سال کے دوران صرف کراچی میں انسداد انسانی سمگلنگ سرکل نے بیرون ملک، بشمول عمرہ ویزے کی آڑ میں گداگری،جسم فروشی اور دیگر غیر قانونی سرگرمیوں میں ملوث 410 سے زائد ملزمان کو گرفتار کیا اور 144 مقدمات درج کیے۔سعودی عرب کی سرزمین پر جہاں دنیا بھرکے مسلمان تزکیہ، تصوف، تطہیر قلب ، روحانی تقویت ، ایمانی لذت کا سامان تصور کرتے تھے ، وہاں زناکاری کے ایسے اڈوں کی سہولت کاری اربوں مسلمانوں کے لیے تکلیف کا باعث ہے۔

ایف آئی اے ملتان کے ترجمان کے مطابق اتوار کو ملتان سے سعودی عرب جانے والی پرواز نمبر ایس وی 801 کے ذریعے انیشہ بی بی نامی خاتون عمرے کے نام پر سفر کرنا چاہ رہی تھیں۔

ترجمان نے بتایا کہ امیگریشن کلیئرنس کے دوران خاتون کا ریکارڈ مشکوک پائے جانے پر ٹیم نے ان سے پوچھ گچھ کی گئی۔خاتون سے تفتیش کے نتیجے پر ترجمان نے بتایا ’خاتون نے بتایا کہ ایک نیٹ ورک اسے ’رضا مندی اور کمرشل بنیادوں پر جسم فروشی ‘ کے لیے ویزہ لگوا کر عمرے کے نام پر بیرونِ ملک بھجوا رہا تھا، خاتون کی نشاندہی پر ایجنٹ محمد امجد کو بھی گرفتار کر لیا گیا۔‘

نیٹ ورک کا سرغنہ سعودی عرب کے مقدس شہر میں بیٹھ کر زناکاری کا نیٹ ورک چلا رہا تھا جبکہ وہیں مقیم ایک ایجنٹ عمرہ ویزے کی آڑ میں مسافروں کو بھجوانے کے انتظامات کرتا تھا۔

ایف آئی اے کے مطابق جسم فروشی اور انسانی سمگلنگ میں ملوث دیگر عناصر کی شناخت کے لیے تحقیقات کا دائرہ وسیع کر دیا گیا ہے اور نیٹ ورک سے منسلک تمام افراد کے خلاف قانون کے مطابق کارروائی کی جائے گی۔ اہم بات یہ کہ پاکستان میں ایسا کوئی قانون ہی نہیں جو ایسی زانی فطرت عورت کے لیے کوئی عبرت ناک سزا تجویز بھی کرسکے۔

مقامی ایجنسی صرف ٹریکنگ سسٹم کے ذریعے مشکوک پائے جانے پر مسافر سے دستاویزی معلومات کی بنیاد پر زبانی پوچھ گچھ کرکے لوگوں کو صرف جانے سے روک پاتے ہیں۔پیسے کی اندھی محبت میں مقدس سرزمین پر جسم فروشی کے لیے جانے کا شیطانی جذبہ کون کیسے کب درست کراسکے گا؟

ادارے نے بتایا کہ زیر تفتیش مشکوک افراد کے مستقبل کے سفر پر بھی نظر رکھی جا رہی ہے تاکہ وہ کسی اور راستے سے بیرونِ ملک جانے کی کوشش نہ کر سکیں۔

ٹریول ایجنٹس ایسوسی ایشن آف پاکستان کے سابق چیئرمین آغا طارق سراج کے میڈیا کو دیئے گئے بیان کے مطابق :’یہ صرف عمرے پر جانے کا مسئلہ نہیں، بلکہ ایسے پاکستانی بھی ہیں جو وہاں جا کر غائب ہو جاتے ہیں یا بھیک مانگتے پکڑے جاتے ہیں۔ یہ معاملہ زیادہ تر ملتان (جنوبی پنجاب) سے آگے کے علاقوں سے سامنے آتا ہے، اسی لیے ہم مشکوک افراد کا ویزہ لگانے سے انکار کر دیتے ہیں، کیونکہ دوسرے ممالک میں پکڑے جانے پر بھجوانے والے ٹریول ایجنٹ کے خلاف بھی کارروائی ہوتی ہے۔‘

ایف آئی اے کے مطابق مختلف ہوائی اڈوں پر کارروائیوں کے دوران گذشتہ ایک سال میں سینکڑوں مشکوک افراد کو گرفتار یا آف لوڈ کیا جا چکا ہے۔اس کے باوجود یہ سلسلہ مستقل جاری ہے کیونکہ مادی ترقی، دنیاوی چمک دمک، لذات اور انکو حاصل کرنے کے لیے ہر حد سے گزرنا مقصد بنا دیا گیا ہے۔