شعور نیوز( ویب ڈیسک):حکومتِ پنجاب نے عالمی استعماری فنڈنگ سے اسکول کے بچوں کے نصاب میں نیا مضمون انڈیلنے کی تیاری کرلی ۔میڈیا ذرائع کے مطابق صوبے کے سرکاری اسکولوں کے تعلیمی نظام کو عالمی لبرل سرمایہ دارانہ نظام کے سانچے میں ڈھالنے کی کوششوں کے تحت، چوتھی سے آٹھویں جماعت کے طلبہ کے لیے "گلوبل سٹیزن شپ" (عالمی شہریت) کا ایک نیا لازمی مضمون متعارف کرانے جا رہی ہے۔

عالمگیریت کا شیطانی جال ان ساری اصطلاحات کے کندھوں پر سوار ہو کر مسلط ہورہا ہے۔ 200سالہ استعماری تاریخ گواہ ہے کہ تعلیم کے خوشنما جال میں اس کے زہریلے نظریات کو داخلے کے پورے رستے ملے ہیں۔پاکستانی میڈیا پر جاری ہونے والی خبروں کے مطابق اس نئے تعلیمی ایجنڈے کو نافذ کرنے کے لیے بین الاقوامی استعماری ادارے یونیسیف کے ساتھ شراکت داری کی گئی ہے، جو اس مضمون کی نصابی کتب کی تیاری اور پرنٹنگ کے تمام اخراجات اور فنڈنگ فراہم کرے گا۔یہ کوئی اختیاری سرگرمی نہیں بلکہ چوتھی سے آٹھویں جماعت کے بچوں کے لیے 100 نمبر کا ایک مستقل اور لازمی مضمون ہوگا ۔نصاب کی تیاری میں تباہ حال بحران زدہ جنوبی کورین تعلیمی نظام کی گائیڈ لائنز کو سامنے رکھا جا رہا ہے تاکہ طلبہ کو بین الاقوامی معیار کے مطابق تیار کیا جا سکے۔

تجزیہ کاروں کے ایک حلقے کا ماننا ہے کہ اس قسم کے اقدامات کا بنیادی مقصد مقامی اور روایتی اقدار کے بجائے بچوں کو بچپن ہی سے عالمی لبرل نظام (Global Liberal Order)اور عالمی منڈی (Global Market) کے تقاضوں کے مطابق ڈھالنا ہے۔ یونیسیف جیسی بین الاقوامی تنظیموں کی فنڈنگ سے تیار ہونے والا یہ نصاب، نئی نسل میں ایسی "عالمی شہریت" کا شعور پیدا کرنے کے لیے ڈیزائن کیا گیا ہے جو بین الاقوامی سرمایہ دارانہ ڈھانچے کے لیے سازگار ثابت ہو۔