شعورنیوز(انٹرنیشنل ڈیسک):برطانوی پولیس کے مطابق جرائم کے بدلتے ہوئے ماڈل کی نئی مثال سامنے آئی ہے جس میں مجرم وشل میڈیا کے ذریعے عام طلبہ اور کمزور افراد کو اپنے نیٹ ورک کا ’آؤٹ سورس‘ حصہ بنا رہے ہیں۔ سوشل میڈیا پر اس طرح کے اشتہارات پاکستان میں بھی آپ کو نظر آتے ہوں گےلیکن برطانیہ میں یہ سب ایک منظم گروہ کی کارروائی ہے۔

’’گھر بیٹھے کام، تجربہ ضروری نہیں، ہفتے کے £500 تک کمائیں‘‘۔

پولیس نے والدین اور عوام کو خبردار کیا ہے کہ جرائم پیشہ عناصر Snapchat، Instagram، TikTok اور Facebook جیسے سوشل میڈیا پلیٹ فارمز کے ذریعے بالخصوص طلبہ اور ایسے افراد کو تلاش کررہے ہیں جنہیں فوری رقم کی ضرورت ہو۔پولیس کے مطابق انہیں ’’Parcel Mules‘‘ کے طور پر استعمال کیا جارہا ہے؛ یعنی کسی عام شخص کے گھر کا پتہ استعمال کرکے غیر قانونی سامان منگوایا جاتا ہے، پھر اسے آگے منتقل یا واپس وصول کرلیا جاتا ہے۔ اس سامان میں منشیات، ممنوعہ ہتھیار، چوری شدہ سامان، جعلی اشیا، فراڈ سے خریدی گئی مصنوعات اور غیر قانونی سرگرمیوں سے حاصل ہونے والی نقد رقم شامل ہوسکتی ہے۔

اشتہارات بظاہر بالکل معمول کی ملازمت جیسے دکھائی دیتے ہیں:

’’Work from home‘‘ — ’’Easy money‘‘ — ’’No experience needed‘‘ — ’’£100–£500 per week‘‘

یعنی جرم کی پہلی سیڑھی اب لازماً گلی، گینگ یا منشیات فروش کا اڈہ نہیں؛ موبائل فون کی اسکرین بھی بھرتی کا دفتر بن سکتی ہے۔پارسل منشیات بھجوانے کا ایسا ہی پیٹرن ہمیں کراچی میں بھی مختلف کیسز میں نظرآیا۔کسی شخص کو یہ معلوم نہ ہونا کہ پارسل میں کیا ہے، اُسے قانونی ذمہ داری سے نہیں بچاتا۔

خود برطانوی National Crime Agency (NCA) کی 2026 کی Strategic Assessment کہتی ہے کہ مجرم آن لائن پلیٹ فارمز کو متاثرین تلاش کرنے، ساتھی بنانے اور جرائم کو بڑے پیمانے پر پھیلانے کے لیے استعمال کررہے ہیں۔ NCA کے مطابق سوشل میڈیا پر ’’easy money‘‘ اور پرتعیش طرزِ زندگی دکھا کر لوگوں کو county lines، منشیات، غیر قانونی نقد رقم کی ترسیل اور money muling جیسے جرائم میں راغب کیا جاتا ہے۔ برطانیہ میں 45 لاکھ فراڈ کے واقعات ایک سال میں رپورٹ ہوئے ہیں ، ان میں بینک فراڈ کی تعداد الگ ہے جو کہ 28 لاکھ واقعات کی ہے ۔
یہ خبر جدید سرمایہ دارانہ صارف معاشرے کے ایک بڑے تضاد کو نمایاں کرتا ہے۔ایک طرف نوجوان کو مسلسل یہ پیغام دیا جاتا ہے:زیادہ کماؤ، جلد کماؤ، آسان کماؤ، اپنی زندگی خود بناؤ۔

دوسری طرف اسی معاشی و ڈیجیٹل ماحول میں ایسی منڈی بھی پیدا ہوتی ہے جہاں منشیات، چوری شدہ سامان، غیر قانونی ہتھیار اور کالا دھن بھی خرید و فروخت کی اشیا بن جاتے ہیں کیونکہ اس نظام کی کوئی اقدار نہیں۔