شعور نیوز( ویب ڈیسک): کراچی میں نامعلوم وجوہات پر خودکشیوں کا تسلسل جاری ہے۔ احسن آباد کے فلیٹ سے خاندان بھر کی لاشوں کو بھی مبینہ خود کشی ہی قرار دیاگیا ۔ گذشتہ 3دنوں میں 3مزید خودکشیوں کے واقعات سامنے آئے ہیں جن میں ایک خاتون بھی شامل ہے ۔ملیر جناح اسکوائر کے قریب ایک رہائشی گھر سے 3 بچوں کی ماں کی گلا کٹی لاش برآمد ہوئی ہے۔ پولیس ذرائع کے مطابق واقعہ ملیر سٹی تھانے کی حدود میں ملیر جناح اسکوائر علیم آباد ریاض پان شاپ کے قریب پیش آیا۔ اطلاع ملنے پر پولیس فوری طور پر موقع پر پہنچی اور جائے وقوعہ سے تمام ضروری شواہد اکٹھے کرنے کے لیے کرائم سین یونٹ کو طلب کر لیا۔ بعدازاں متوفیہ خاتون کی لاش قانونی اور طبی کارروائی کے لیے جناح اسپتال منتقل کی گئی جہاں متوفیہ کی شناخت 30 سالہ کنول زوجہ محمد کاشان کے نام سے ہوئی، جو کہ تین بچوں کی ماں تھی۔

ایس ایچ او ملیر سٹی ریاض بھٹو نے میڈیا کو بتایا کہ متوفیہ خاتون کی لاش گھر کی پہلی منزل پر واش بیسن کے قریب سے ملی ہے۔ ابتدائی معلومات کے مطابق خاتون نے مبینہ طور پر گھر کی پہلی منزل پر تیز دھار آلے (چھری) کی مدد سے خود اپنا گلا کاٹ کر خودکشی کی ہے۔ پولیس افسر نے مزید بتایا کہ جس وقت یہ واقعہ پیش آیا، اس دوران خاتون کی ساس گھر کے گراؤنڈ فلور پر موجود تھیں جبکہ شوہر اور بچے گھر پر موجود نہیں تھے۔ متوفیہ کا شوہر باہر پکوڑے اور سموسے فروخت کرنے کا کام کرتا ہے۔پولیس حکام کا کہنا ہے کہ فوری طور پر اس افسوسناک خودکشی یا واقعے کی اصل وجوہات سامنے نہیں آ سکی ہیں۔

اس سے ایک دن قبل نارتھ کراچی سے 2واقعات سامنے آئے جس میں ایک 45 سالہ شخص محمد آصف نے اپنے ہی ہم زلف کے گھر کے باہر کھڑے ہوکر اپنا گلا کاٹ لیا ،جس کی سی سی ٹی وی فوٹیج سوشل میڈیا پر وائرل ہوئی۔ اُسی علاقے میں رحمانیہ موڑ کے قریب تیز دھار آلے سے گلا کاٹنے کے واقعے میں ایک پولیس اہلکار شدید زخمی ہوگیا۔ پولیس ذرائع کے مطابق زخمی اہلکار کی شناخت حمزہ کے نام سے ہوئی ہے جو بلال کالونی تھانے میں تعینات ہے۔ واقعے کے بعد زخمی اہلکار کو فوری طور پر نجی اسپتال منتقل کردیا گیا۔ پولیس ذرائع کا کہنا ہے کہ ابتدائی معلومات کے مطابق واقعہ خودکشی کی کوشش معلوم ہوتا ہے تاہم واقعے کی مزید تحقیقات جاری ہیں۔ پولیس رپورٹ کے مطابق کراچی میں امسال 150 سے زائد خودکشیاں رپورٹ ہو چکی ہیں۔ یہ تمام واقعات پوش علاقوں میں نہیں بلکہ نارتھ کراچی، احسن آباد، ملیر ، اورنگی ، شاہ لطیف جیسے آبادی والے علاقوں سے رپورٹ ہو رہے ہیں۔

یہ واقعات معاشرے کی تباہی اور لبرل ازم کی اقدار کے نفوذ کا الارم بجا رہے ہیں جسے مسلم متکلمین واہل الرائے افراد اب بھی سنجیدہ نہیں لے رہے۔