شعور نیوز( ویب ڈیسک):صومالیہ کے ساحل پر قزاقوں کے خلاف پنٹ لینڈ اور صومالی سیکیورٹی فورسز کے مشترکہ آپریشن کرکے بحری جہاز آزاد کرالیا۔آپریشن میں جہاز کے 17 میں سے 5 ملازمین مارے گئے جبکہ تمام بچ جانے والے عملے کے ارکان کو بحفاظت پنٹ لینڈ کے ساحلی علاقے 'بندر بیلہ' پہنچا دیا گیا ہے۔سیکیورٹی فورسز نے آپریشن کے دوران 16 سے 21 کے قریب مشتبہ قزاقوں کو گرفتار کر لیا ہے جنہیں عدالت میں پیش کیا جائے گا۔

یہ جہاز (MT Honour 25) رواں سال 21 اپریل 2026 سے صومالی قزاقوں کے قبضے میں تھا اور عملے نے تقریباً 5 ماہ سے زائد کا عرصہ انتہائی کٹھن حالات میں قید میں گزارا۔قزاقوں نے تیل سے بھرے جہاز اور عملے کے بدلے صرف 3 ملین ڈالر مانگے تھے ، جو آخر میں 1 ملین ڈالر تک آگئے تھے۔قزاقوں نے کسی بھی تھرڈ پارٹی (شیرنگ ایجنٹ یا مالک) کے ذریعے مذاکرات کرنے سے انکار کر دیا تھا اور شرط رکھی تھی کہ حکومتِ پاکستان ان سے براہِ راست رابطہ کرے، کیونکہ عملے میں زیادہ تعداد پاکستانیوں کی تھی۔اس تاوان کی عدم ادائیگی اور مغویوں کی بگڑتی ہوئی حالت (خوراک اور ادویات کے خاتمے) کے باعث ہی صومالیہ کی پنٹ لینڈ فورسز نے بالآخر ملٹری آپریشن کا فیصلہ کیا۔

پاکستان میں موجود مغویوں کے لواحقین احتجاج کرتے رہے لیکن حکومت نے دیگر ملکوں سے بات کرکے 1 ملین ڈالر دینے یا اپنی تربیت یافتہ فوج بھیج کر جہاز نہیں آزاد کرایا۔

یہ آپریشن مکمل طور پر صومالیہ کی مقامی سیکیورٹی فورسز نے کیا تھا، اور اس کارروائی میں پاک فوج یا پاک بحریہ کا کوئی براہِ راست عسکری کردار نہیں تھا۔پاکستانی حکومت اور وزارتِ خارجہ 5 ماہ سے صومالیہ کی حکومت، بین الاقوامی بحری اداروں اور متعلقہ اسٹیک ہولڈرز کے ساتھ سفارتی سطح پر مسلسل رابطے میں تھے تاکہ مغوی ملاحوں کی بحفاظت رہائی کو یقینی بنایا جا سکے۔

صومالیہ کے ساحل پر یرغمال بحری جہاز MT Honour 25 کی بازیابی کے دوران 5 افراد جاں بحق ہوگئے تھے۔دفتر خارجہ کے مطابق جاں بحق ہونے والوں میں 3 پاکستانی شہری رفیع اللہ خان، سید کاشف عمر اور محمود احمد انصاری شامل ہیں، جن کے جاں بحق ہونے پر گہرے دکھ اور افسوس کا اظہار کیا گیا ہے۔باقی دو افراد میں ایک بھارتی اور ایک کا تعلق میانمار سے ہے۔

یرغمال پاکستانی شہریوں اور زخمیوں کی وطن واپسی کے لیے اقدامات شروع کردیے ہیں۔ دوسری جانب جاں بحق پاکستانیوں کے لواحقین نے حکومت سے کارروائی نہ کرنے کا شکوہ کرتے ہوئے ان کے پیاروں کی میتیں وطن واپس لانے کا مطالبہ کیا ہے۔