شعور نیوز( ویب ڈیسک):اللہ کی حاکمیت کی شناخت رکھنے والے پاکستان کے چیف جسٹس یحییٰ آفریدی کو برطانیہ کے تاریخی قانونی ادارے Inner Temple کا اعزازی بینچر مقرر کر دیا گیا ہے۔ پاکستان میں میڈیا اسکو بڑے اعزاز کے طور پر پیش کررہا ہے ۔لندن میں تقریب کے دوران اعزازی بینچر کے طور پر خیر مقدم کیا۔اس موقع پر پاکستان اور برطانیہ کے عدالتی و قانونی اداروں کے درمیان ادارہ جاتی تعاون کو مزید مضبوط بنانے کے امکانات پر تبادلہ خیال کیا گیا۔ پیشہ ورانہ مہارتوں کے تبادلے پر زور دیا گیا۔ چیف جسٹس پاکستان جسٹس یحییٰ آفریدی کی اِنر ٹیمپل کے اعزازی بینچر کی حیثیت سے وابستگی دونوں ملکوں کی قانونی برادریوں کے درمیان روابط کو مزید مستحکم بنانے میں اہم کردار ادا کر سکتی ہے۔پاکستان ایک نظریاتی ملک کہلاتا ہے، جس میں حاکمیت اعلیٰ اللہ تعالیٰ کو حاصل ہے ، وہیں سے تمام چیزوں کے دھارے پھوٹتے ہیں جبکہ برطانیہ میں ایسا کچھ نہیں ہوتا تو کیسے کس قسم کی معاونت ہو سکتی ہے؟

پاکستان عملاً تیسری دنیا کا پس ماندہ کرپٹ اور ایک قرض دار ملک کہلاتا ہے مگر چونکہ یہ خطہ برطانیہ کی کالونی رہ چکا ہے اس لیے ’سافٹ پاور استعمار ‘ اپنے اثرات چھوڑنا نہیں چاہتی۔اس اعلان نے ایک اہم سوال کو جنم دیا ہے کہ کیا نوآبادیاتی دور کے قانونی ورثے سے جڑے اداروں کے ساتھ اعلیٰ سطح کے روابط محض پیشہ وارانہ تعاون ہیں، یا ان کے ذریعے عالمی قانونی تصورات، ادارہ جاتی ترجیحات اور اثر و رسوخ کے دائرے بھی وسیع ہوتے ہیں؟

لندن میں قائم Inner Temple، انگلینڈ اور ویلز کے چار تاریخی Inns of Court میں سے ایک ہے۔ بیرسٹرز کی تربیت، قانونی اخلاقیات اور پیشہ ورانہ سرگرمیوں کے ساتھ ساتھ اس ادارے کے بین الاقوامی روابط بھی اس کی شناخت کا حصہ ہیں۔ اس کے اعزازی بینچرز میں بیرونِ ملک ممتاز قانونی شخصیات کی شمولیت ایک ایسے نیٹ ورک کی نمائندگی کرتی ہے جو قومی سرحدوں سے آگے تک پھیلا ہوا ہے۔

عالمی سیاست میں اثر و رسوخ ہمیشہ براہِ راست سیاسی دباؤ یا معاشی پابندیوں کی شکل میں سامنے نہیں آتا۔ بعض اوقات تعلیمی روابط، پیشہ ورانہ اعزازات، تربیتی پروگراموں اور ادارہ جاتی تعاون کے ذریعے بھی تصورات اور ترجیحات بین الاقوامی سطح پر فروغ پاتے ہیں۔ سیاسیات میں اس نوعیت کے اثرات کو عموماً نرم طاقت (Soft Power) کے تصور کے تحت زیرِ بحث لایا جاتا ہے۔

یہی وہ پہلو ہے جو اس تقرری کو وسیع تر تناظر میں دیکھنے کی دعوت دیتا ہے: جب کسی ملک کی اعلیٰ عدلیہ کی قیادت ایک تاریخی عالمی قانونی نیٹ ورک میں اعزازی مقام حاصل کرتی ہے تو اس سے صرف ایک فرد کی پیشہ ورانہ شناخت ہی نہیں، بلکہ دونوں اداروں کے درمیان علامتی قربت اور مستقبل کے روابط کے امکانات بھی نمایاں ہوتے ہیں۔بنیادی سوال یہ ہے کہ ایسے روابط سے پاکستان کو کیا حاصل ہوتا ہے، اور ان کے ذریعے کن قانونی تصورات، تربیتی ترجیحات اور اصلاحاتی ماڈلز کو فروغ ملتا ہے؟ کیا تعاون کا مرکز پاکستان کی آئینی ضروریات، مقامی سماجی حالات اور انصاف تک عوام کی رسائی ہے، یا بیرونی قانونی تجربات کو ترجیح دینے کا رجحان زیادہ نمایاں رہتا ہے؟