شعورنیوز( ویب ڈیسک):سندھ کے وزیر تعلیم سید سردار شاہ نے اقرار کرلیا کہ اُن کی وزارت نے کسی انڈر میٹرک اور میٹرک پاس استاد کو کبھی بھرتی نہیں کیا۔ سندھ حکومت کی شائع شدہ اسکول کارکردگی رپورٹ میں موجود 14 ہزار کے قریب انڈر میٹرک، میٹرک اور انٹر پاس مرد وخواتین اساتذہ وفاقی حکومت سے بھرتی ہو کر آئے ۔سندھ کے وزیر تعلیم سردار شاہ نے سینیئر صحافی حامد میر کی جانب سے سندھ حکومت کے شائع کردہ غلط ڈیٹا شیئر کرنے پر ان سے معافی مانگنے کا مطالبہ بھی کیا۔

وزیر تعلیم کے مطابق آئین میں اٹھارہویں ترمیم کے بعد صوبہ سندھ کے پاس محکمہ تعلیم وفاق سے منتقل ہوا تھا ۔ 2002 میں این سی ایچ ڈی نیشنل کمیشن فار ہیومن ڈویلپمنٹ کے تحت یہ سب انڈر میٹرک و دیگر اساتذہ ’فیڈر ٹیچرز‘ کے طور پر بھرتی ہوئے تھے جو کہ اداروں اور ملازمین کے ساتھ صوبہ سندھ 2010میں منتقل ہوئے۔

وزیر تعلیم نے ایک وڈیو میں اقرار کیا کہ سندھ کے خزانے سے اب تک اربوں روپے وظیفہ لینے والے یہ اساتذہ 2055میں ریٹائر ہونگے ۔ سندھ کے سینئر صحافیوں میں سے کوئی بھی یہ نہیں پوچھ سکا کہ جو شخص 2055 میں 60 سال کا ہوکر ریٹائر گا ، تو 2010 میں جب وہ سندھ منتقل ہوا تو اسکی عمر محض 15 سال کیسے تھی۔ شناختی کارڈ کے بغیر کیسے وفاقی حکومت یا سندھ حکومت میں یہ اتنے سارے سرکاری ملازمین بھرتی ہوگئے اور سندھ حکومت اُن کو مستقل اپنی رپورٹ میں نمایاں کر رہی ہے؟

انہوں نے واضح کیا کہ 2008 سے 2026 تک پیپلز پارٹی کی سندھ حکومت نے صوبہ بھر میں 97 ہزار اساتذہ بھرتی کیے ہیں جو کہ گریجویشن سطح پر ہیں اور انتہائی میرٹ پر بھرتی کیے گئے۔ آئی بی اے سکھر کے تحت کرائے گئے تحریری امتحانات کے بعد اساتذہ کو یہ ملازمتیں دی گئی ہیں۔وزیر تعلیم نے واضح کیا کہ وفاق سے آئے ہوئے انڈر میٹرک ٹیچرز 2055 میں یعنی اگلے 29 سال بعد ریٹائر ہوں گے تب تک سندھ حکومت انکو فکس تنخواہ کی صورت ادائیگیاں کرتی رہے گی اور ان کی کوئی ترقی بھی نہیں ہوتی ہے۔ وزیر تعلیم نے اقرار کیا کہ اس بات کا امکان ہے کہ ان اساتذہ میں سے کسی نے مزید ڈگری حاصل کرلی ہو تاہم وہ حتمی طور پر یہ وجہ نہیں بتا سکے کہ کیوں سندھ حکومت کی اپنی بنائی گئی، شائع کی گئی رپورٹ میں ہزاروں اساتذہ آج بھی انڈر میٹرک، میٹرک اورانٹر پاس کی سطح تک ظاہر کر رہی ہے ،جن کی کل تعداد 14 ہزار کے قریب بنتی ہے۔

سندھ ایجوکیشن کی سرکاری ویب سائٹ پر سندھ تعلیمی نظام میں شامل پارٹنرز کے ناموں کی تفصیل انتہائی اہمیت کی حامل ہے ۔ ان ناموں میں ایشین ڈویلپمنٹ بینک، یورپی یونین، یو ایس ایڈ، گلوبل پارٹنر شپ، برطانوی حکومت، یونیسکو، یونیسیف، ورلڈ بینک، کینیڈین انٹرنیشنل ڈویلپمنٹ ایجنسی اور جاپان کی سرکاری ایجنسی ہے۔ دنیا بھرکے عالمی ساہوکار استعماری ادارے جس وزارت کے پارٹنر ہوں گے وہاں کیا کام ہو رہے ہونگے اس کا تصور بھی محال ہے۔