شعورنیوز( انٹرنیشنل ڈیسک):بھارت کے شہر اُجین میں سڑک کشادگی کی آڑ میں 600سال قبل کی تاریخی شاہی مسجد کے ایک حصے کو مسمار کرنے کا عمل مقامی مسلمانوں کے احتجاج کے بعد عارضی طور پر روک دیا گیا۔ایک ہندو ’سنگ ستھ میلے ‘ کے لیے شہر کی بلدیہ نے سڑک کو 15 میٹر تک چوڑا کرنے کا منصوبہ بنایا ہے جسکی زد میں شاہی مسجد کے کچھ حصے بھی آ رہے ہیں۔اس کارروائی کے تحت مسجد کے نماز ہال کا ایک حصہ، 120 فٹ بلند مینار اور مظہر چوک شاہی کا کچھ حصہ ہٹایا جائیگا ۔سڑک چوڑی کرنے کے لیے مینار گرانا مسلم شناخت کو صاف کرنے کی نیت کا اظہار کرتا ہے۔

بلڈوزر پہنچائے جانے کے بعد بھارتی انتظامیہ کا انتہا پسندانہ چہرہ ایک بار پھر بے نقاب ہو گیا۔ اس ظالمانہ اقدام کے خلاف مقامی مسلمان بڑی تعداد میں مسجد کے تحفظ کے لیے جمع ہو گئے۔امام محمد ابراہیم اور مسلم ریپریزنٹیٹو کمیٹی کے محمد ذاکر نے کہا کہ سڑک کشادگی کے منصوبے سے مذہبی مقامات کو خارج کیا جانا چاہیے۔ مقامی مسلمانوں نے شہر کے ترقیاتی کاموں کے لیے اپنی تجارتی دکانیں پہلے بھی حوالے کی ہیں، تاہم اس مسجد کو چھوڑنا ممکن نہیں۔شاہی مسجد وقف کی جائیداد ہے اور یہ تقریباً 636 سال پرانی ہے، جس کی تعمیر 1390 میں ہوئی تھی۔

بھارتی ریاست مدھیہ پردیش کے شہر اجین میں 600 سال سے زائد قدیم تاریخی شاہی مسجد کو انہدام سے بچانے کے لیے سیکڑوں اور ہزاروں مسلمان مسجد کے اندر اور باہر ڈیرے ڈال کر بیٹھ گئے ہیں۔

مقامی انتظامیہ اور ریاست کی بی جے پی حکومت کا مؤقف ہے کہ بڑے مذہبی اجتماع کے دوران لاکھوں زائرین کی آمد کے پیش نظر ٹریفک اور عوامی نقل و حرکت کو بہتر بنانے کے لیے سڑک کی توسیع ناگزیر ہے۔مذکورہ معاملے پر عدالتوں کے ریکارڈ اور دستاویزات کے مطابق مدھیہ پردیش ہائی کورٹ نے 9 ستمبر کو مسجد کے تحفظ کے لیے دائر کی گئی درخواستیں مسترد کر دی تھیں، جبکہ مقامی مسلمانوں نے اس فیصلے کے خلاف سپریم کورٹ سے بھی رجوع کر رکھا ہے۔ مسجد کے امام محمد ابراہیم کے مطابق یہ مسجد سال 1390 میں تعمیر ہوئی تھی اور اسے تقریباً 636 سال پرانا تاریخی مذہبی مقام قرار دیا جاتا ہے۔

مسجد میں جاری احتجاج کے شرکا اور منتظمین کا کہنا ہے کہ وہ پچھلے 2 ہفتوں سے مسلسل پرامن احتجاج کر رہے ہیں اور لوگوں نے متفقہ طور پر فیصلہ کیا ہے کہ مسجد کو شہید ہونے سے بچانے کے لیے وہ شفٹوں میں باری باری مسجد کے اندر موجود رہیں گے۔ احتجاج کے دوران ظہر کی نماز کے بعد کم از کم 1000 افراد مسجد کے اندر موجود تھے۔ صورتحال کے پیش نظر علاقے میں پولیس نے بیریکیڈز لگا دیے ہیں اور سکیورٹی انتہائی سخت کر دی گئی ہے۔

اُجین کے سپرنٹنڈنٹ پولیس پردیپ شرما نے بتایا کہ انتظامیہ نے فی الحال مسجد کے حصوں کو مسمار کرنے کا عمل روک دیا ہے۔ ان کے مطابق پولیس مسجد کمیٹی کو قانونی صورتِ حال سے آگاہ کر رہی ہے اور بات چیت کے ذریعے مسئلہ حل کرنے کی کوشش کی جا رہی ہے، جس میں کمیٹی کو اپنی رضامندی سے متاثرہ حصے ہٹانے پر آمادہ کرنے کی کوشش بھی شامل ہے۔

مدھیہ پردیش ہائی کورٹ نے اُجین میونسپل کارپوریشن کی جانب سے جاری مسماری کے نوٹس کے خلاف دائر دو درخواستیں مسترد کر دی تھیں۔کورٹ کے مطابق اسی سڑک پر 10 مندروں اور ایک مسجد کے کچھ حصے پہلے ہی ہٹائے جا چکے ہیں، جبکہ اُجین میں تقریباً 80 مذہبی مقامات کے خلاف بھی کارروائی کی جا چکی ہے۔

عدالت نے سڑک کی کشادگی کے منصوبے کو عوامی مفاد میں قرار دیا۔ شاہی مسجد مہاکالیشور مندر کے سامنے اور دریائے کشیپرا کے قریب واقع ہے۔ یہ منصوبہ اُجین ڈویلپمنٹ پلان 2035 کا حصہ ہے، جس کا مقصد شہر میں ٹریفک اور عوامی تحفظ کے انتظامات بہتر بنانا ہے۔

2028 میں ہونے والے سنگ ستھ میلے کے دوران لاکھوں عقیدت مندوں کی اُجین آمد متوقع ہے، جبکہ شاہی سواری اور پیشوائی جیسے مذہبی اجتماعات کے دوران بھی شہر میں بڑی تعداد میں لوگوں کی موجودگی ہوتی ہے۔

اس معاملے پر آل انڈیا مجلس اتحاد المسلمین کے سربراہ اسدالدین اویسی نے بھی احتجاج کی حمایت کی اور اسے پُرامن اور ’’گاندھیائی‘‘ احتجاج قرار دیا۔اویسی نے اس معاملے کو پارلیمنٹ میں وقف ترمیمی قانون سے متعلق اپنے تحفظات سے بھی جوڑا۔ ان کا دعویٰ ہے کہ مجوزہ قانون سرکاری حکام کو مساجد، درگاہوں اور قبرستانوں سمیت مسلمانوں کی مذہبی املاک پر قبضے کے لیے اختیارات دے گا۔

بھارت میں مستقل مساجد ،مزارات شہید کرنے کا سلسلہ ریاست اور ترقی کے نام پر جاری ہے۔ نظریہ ترقی قبول کرنے والے مسلمان بے بس ٹوکن احتجاج سے زیادہ کچھ نہیں کرپا رہے۔