شعور نیوز( انٹرنیشنل ڈیسک):جنوبی افریقہ میں ایک ہفتے سے بھی کم عرصے میں 5 اجتماعی فائرنگ، 46 سے زائد ہلاکتیں رپورٹ ہو چکیں۔ جرائم پیشہ نیٹ ورک، غیر قانونی کان کنی، اسلحے کی اسمگلنگ نے سرمایہ دارانہ ریاستی نظام کی سنگین کمزوریاں بے نقاب کر ڈالیں۔سرمایہ دارانہ نظام کی غلاظت میں سرمایہ سے جڑے جرائم ایک لازمی جز ہوتے ہیں۔ سرمایہ کی کوئی قدر نہیں ہوتی اس لیے اسکے بطن سے جنم لینے والے جرائم کی بھی کوئی قدر نہیں ہوتی یوں زمین بدترین فساد سے بھری نظر آتی ہے۔

جنوبی افریقہ میں مجموعی انفرادی قتل کی شرح میں کمی کے سرکاری اعداد و شمار کے باوجود اجتماعی فائرنگ سے قتل عام کے بڑھتے ہوئے واقعات نے نظام پر ایک بڑا سوال کھڑا کر دیا ہے۔

یکم جنوری سے 28 ستمبر 2026 تک جنوبی افریقہ میں 45 اجتماعی قتل ریکارڈ ہوئے، جن میں کم از کم 210 افراد ہلاک اور 79 زخمی ہوئے۔ ستمبر کے واقعات میں ہی 46سے زائد افراد مارے گئے۔

ایسا ماحول بن چکا ہے جہاں مسلح افراد درجنوں لوگوں کو آرام سے نشانہ بنا رہے ہیں ۔ملک میں اسلحہ اس قدر پھیل چکا ہے کہ معمولی تنازعات بھی مہلک فائرنگ میں تبدیل ہو سکتے ہیں۔ جرائم، بھتہ خوری، گینگ وار، انتقامی کارروائی، ٹیکسی روٹس پر قبضے اور ذاتی جھگڑوں میں بندوق شامل ہونے سے ہلاکتوں کی تعداد اچانک کئی گنا بڑھ سکتی ہے۔

2013 سے 2023 کے دوران تقریباً 63,500 لائسنس یافتہ شہری اسلحے کے گم یا چوری ہونے کی اطلاعات سامنے آئیں۔

اپریل 2022 کے بعد سے 2,346 پولیس ہتھیار چوری اور مزید 177 گم ہوئے۔2016 میں سابق پولیس کرنل Christiaan Prinsloo کو پولیس کے ذخائر سے 2,000 سے زیادہ ہتھیار چوری کرکے جرائم پیشہ افراد کو فروخت کرنے کے جرم میں سزا ہوئی۔