شعور نیوز( ویب ڈیسک):ملتان اور اسلام آباد میں 2 قتل ہونے پر پولیس کے موقف کی حمایت ومخالفت میں عوام تقسیم ہوگئے ۔پاکستان میں پولیس تحویل سے ملزمان کے فرار کے واقعات نئے نہیں ہیں۔ ملزمان کے ساتھیو کے پولیس پر حملہ آور ہونے اور پولیس مقابلوں میں گرفتار ملزمان کے مارے جانے کے واقعات بھی مستقل ہوتے رہے ہیں۔اکتوبر کے آخری عشرے میں کچھ ایسے ملزمان جن کے جرائم مختلف وڈیوز اور ذرائع سے عوام کے سامنے آچکے تھے ،وہ بھی گرفتاری کے بعد پولیس تحویل کے درمیان حملوںمیں مارے گئے۔ا ن میں ملتان، اسلام آباد، پشاور کے واقعات تازہ کہے جا سکتے ہیں ۔ان واقعات کے بعد عوامی خوشی اور اُس خوشی پر دیسی لبرل ماڈرنسٹوں کی تنقید سوشل میڈیا پر دلچسپ موضوع بنی ہوئی ہے۔
وزیر داخلہ محسن نقوی نے اسلام آباد کی لائبہ اعجاز کیس میں ہونے والی پیش رفت سے اہل خانہ کو آگاہ کیا اور جعل سازی کے ذریعے لوٹی کی گئی رقم میں سے 51 لاکھ روپے ان کے حوالے کیے۔ انہوں نے یقین دہانی کرائی کہ باقی رقم بھی جلد واپس کردی جائے گیاالبتہ یہ نہیں بتایا کہ رقم کہاں سے کیسے وصول ہوئی ۔ تجزیہ کاروں کے مطابق حکومت کا یہ عمل بھی سوشل میڈیا پر ملزم کے مرنے کے بعد دیت اور لوٹی رقم کے تناظر میں اٹھے سوال کے جواب کے طور پر سامنے آیا ۔اس صورتحال کے مطابق ملتان میں یتیم بچے قتل والے کیس میں بھی دیت کا معاملہ ضرور سامنے آنے کی امید ہے ۔

سوشل میڈیا پر عوام اُن ملزمان کے ’بے وفا ساتھیوں‘ پر تو بات نہیں کر رہی جن کی گولی سے وہ مرے ہیں تاہم پولیس اور نظام قانون مستقل زیر بحث ہے۔ اس میں سیاسی کارکنان اپنی پارٹی پالیسی کے مطابق پنجاب اور وفاقی حکومت پر تنقید کر رہے ہیں ۔ یہ ایک جانب پولیس کی روایتی کہانیوں پر عوام کے عدمِ اعتماد اور نظامِ انصاف کی شکست کا کھلا اعلان ہے۔

پولیس اکثر یہ موقف اپناتی ہے کہ ریمانڈ کے دوران یا تفتیش کے لیے ملزم کو اسلحہ کی برآمدگی یا مقام کی نشاندہی وغیرہ کے لیے لے کر جایا جا رہا تھا کہ اس کے ساتھیوں نے آزاد کرانے کے لیے پولیس پر حملہ کردیا اور یوں پولیس مقابلے کے دوران وہ اپنے ہی ساتھیوں کی گولی سے مارا گیا۔سوشل میڈیا پر ایک بڑی تعداد ایسی ہے جو پولیس کے اس بیانیے کے باوجود اس پر اعتراض کرنے کے بجائے اس کا جشن منا رہی ہے۔اظہار خوشی کر رہی ہے اور شکریہ بھی ادا کر رہی ہے، گویا وہ ان ملزمان کے مرنے پر خوش ہے ، عوام کے پاس جو اطلاعات پہنچائی گئی ہیں اُن کے مطابق وہ لوگ قابل موت طرز کے ہی مجرم ہیں۔

جب کسی ملک میں انصاف کی فراہمی میں دہائیاں لگ جائیں، تو عوام کا صبر بہرحال جواب دے جاتا ہے۔ لوگ جب دیکھتے ہیں کہ سنگین جرائم (قتل، ڈکیتی، زنا ) کے ملزمان گرفتاری کے بعد عدم ثبوت کی بنیاد پر یا رشوت، سفارش اور ناقص تفتیش کی وجہ سے با عزت بری ہو جاتے ہیں، تو از خود ’ماورائے کورٹ قتل‘ ہی واحد اور فوری انصاف ذہن میں آتا ہے ۔اہم بات یہ ہے کہ یہ سارے عوامل یا آپشنز ہماری فلموں، بھارتی میڈیا اور ڈراموں میں دکھائے جاتے ہیں ۔یہ رویہ دراصل قانونی نظام پر شدید عدمِ اعتماد کا نتیجہ ہے، جہاں لوگ ’عدالتی انصاف‘ کے بجائے ’شارٹ کٹ انصاف‘ کو ترجیح دینے لگے ہیں۔

اب یہ مقدمات ایسے ہیں کہ جن میں انسانی حقوق کی تنظیمیں بھی عملاً خاموش ہوتی ہیں کیونکہ عوامی رد عمل کی نوعیت پولیس حمایت میں ہوتی ہے۔جب عوام خود لبرل استعماری قانون کی بالادستی کے بجائے فوری انصاف جیسے عمل کی حمایت کریں گے، تو لبرل ادارے اور سول سوسائٹی بھی تنہائی کا شکار نظر آتی ہے۔اب یہ بھی ظاہر ہے کہ ان سارے کیسز میں کسی نہ کسی طور ریاستی سرپرستی کا گمان ہوتا ہے اس لیے ریاستی ڈنڈے کی وجہ سے بھی چیخ نہیں نکل پاتی۔

اصل مسئلہ: ۱۵۰ سالہ استعماری پولیس اور قانونی نظام

اگر اس صورتحال کا بنظرِ غائر جائزہ لیا جائے تو مسئلہ صرف چند پولیس افسران یا عدالتوں کا نہیں، بلکہ پورے نظامِ انصاف کی ساخت کا ہے۔پاکستان کا پولیسنگ اور عدالتی نظام 1861ء کے برطانوی راج کے پولیس ایکٹ اور انگریزی قوانین پر مبنی ہے اس نظام کا اصل مقصد عوام کی خدمت یا تحفظ نہیں تھا، بلکہ آبادی پر کنٹرول حاصل کرنا اور حاکمیت کو برقرار رکھنا تھا۔ عدالتوں میں ناقص تفتیش اور ثبوت کی عدم موجودگی کی وجہ سے مقدمات کمزور ہوتے ہیں اور مجرموں کو باعزت بری ہونے کا ریلیف ملتا ہے۔

عدالتوں میں لاکھوں زیرِ التوا مقدمات، سالہا سال کے التوا، اور وکلاء و پولیس کے گٹھ جوڑ کی وجہ سے ایک عام شہری انصاف کے لیے عمر گنوا دیتا ہے۔ یہ تاخیر اور قانونی سقم مجرموں کو فائدہ پہنچاتے ہیں۔

پولیس ریفارمز اور دستیاب نظام کورٹ میں اصلاح کی باتیں کی جاتی ہیں جن کی کوئی اصل نہیں، جوہری طور پر یہ سب استعماری ادارے ہیں۔

سوشل میڈیا پر ہونے والی گفتگو صرف ایک طنز یا حادثات کی خبر نہیں، بلکہ یہ پاکستان کے دیدہ زیب لیکن مفلوج نظامِ انصاف پر ایک عوامی فردِ جرم ہے۔ اگر ریاست نے اب بھی اپنے ۱۵۰ سالہ پرانے استعماری نظام کو حاکمیت الہی کے تابع روایتی طرز پر نہیں بدلا تو یہ واقعات کبھی ختم نہیں ہونگے۔