شعور نیوز( ویب ڈیسک):وزیر اعظم پاکستان کی جانب سے اعلان کردہ فیول ریلیف اسکیم سے عوام محروم ہے ، کوئی پیٹرول پمپ اس رعایتی نرخ پر پیٹرول نہیں دے رہا۔پٹرولیم ڈیلرز ایسوسی ایشن نے حکومت کی جانب سے شروع کی گئی فیول ریلیف اسکیم کو ڈیلرز کے لیے شدید مالی خطرہ قرار دیتے ہوئے مطالبات نہ ماننے کی صورت میں ملک گیر پمپس بند کرنے کی دھمکی دے دی۔
چیئرمین پی پی ڈی اے ملک خدا بخش نے کہا کہ حکومت نے ریلیف اسکیم پر مالی تحفظ کی گارنٹی نہ دی تو اسکیم پر عملدرآمد ممکن نہیں ہوگا اور ریلیف اسکیم پر زبردستی عملدرآمد کرایا گیا تو ملک بھر کے تمام پٹرول پمپس بند کردیں گے۔ملک خدا بخش کا کہنا تھا کہ 12 سے 14 ہزار پٹرولیم ڈیلرز ایسوسی ایشن کے ساتھ شامل ہیں، عوام کو ریلیف دینے کے نام پر ڈیلرز کا سرمایہ داؤ پر لگانے کی اجازت نہیں دیں گے۔

انہوں نے کہا کہ حکومت کی ریلیف اسکیم ڈیلرز کے لیے مالی خطرہ ہے، اسکیم تیار کرتے وقت ڈیلرز سے کوئی مشاورت نہیں کی گئی۔ ڈیلرز کے اربوں روپے پھنسنے کی صورت میں نقصان کی ذمہ داری کون اٹھائے گا؟چیئرمین پی پی ڈی اے نے کہا کہ آئل مارکیٹنگ کمپنیوں کے اربوں روپے پہلے ہی واجب الادا ہیں، نئی اسکیم کا بوجھ ڈیلرز پر کیوں ڈالا جا رہا ہے؟ حکومت ریلیف دینا چاہتی ہے تو ڈیلرز کے سرمائے پر بوجھ نہ ڈالے۔

ملک خدا بخش نے حکومت سے پٹرولیم ڈیلرز کا منافع بڑھا کر 8 فیصد کرنے اور روزانہ قیمتیں تبدیل کرنے کے بجائے پٹرولیم مصنوعات کی قیمتیں 30 روز کے لیے مقرر کرنے کا بھی مطالبہ کیا۔انہوں نے کہا کہ بحیرہ احمر سے پٹرولیم مصنوعات پاکستان میں لانے پر اضافی لاگت کا سامنا ہے، اس راستے سے سعودی تیل لانے کا عرصہ 23 روز سے تجاوز کرگیا جب کہ آبنائے ہرمز کے راستے پٹرول خلیجی ممالک سے ایک ہفتے میں پاکستان پہنچ رہا تھا۔

ملک خدا بخش نے کہا کہ اسمارٹ لاک ڈاؤن کے متحمل نہیں ہوسکتے، اس سے کاروباری سرگرمیاں بری طرح متاثر ہوں گی، کورونا وبا میں عمل ہوسکتا تھا، لیکن پٹرولیم مصنوعات کی قیمتوں کے بحران کا حل اسمارٹ لاک ڈاؤن نہیں ہے۔