شعور نیوز(ویب ڈیسک):حکومت پاکستان نے 7 لاکھ 50 ہزار میٹرک ٹن گندم درآمد کرنے کی باقاعدہ منظوری دے دی۔آٹے کی قیمت آسمان کو چھوتی ہوئی 150روپے فی کلو سے آگےجا چکی ہے۔حکومت کی پالیسیاں غریب سےنوالے چھیننے کے مترادف ہورہے ہیں۔پاکستان جیسا زرعی ملک بد انتظامی، نا اہلی ، کرپشن کے باعث ایک بار پھر ملکی خزانے پر بوجھ ڈالنے کے لیے لاکھوں ٹن گندم درآمد کرنے جا رہا ہے ۔کراچی میں ٹریڈنگ کارپوریشن آف پاکستان نے گندم درآمد کرنے کے لیے پبلک پروکیورمنٹ رولز 2004 کے تحت بین الاقوامی ٹینڈر جاری کردیا ہے۔ٹینڈر کا یہ فیصلہ وزیراعظم شہباز شریف کی جانب سے مجموعی طور پر دس لاکھ میٹرک ٹن گندم درآمد کرنے کی منظوری کے بعد سامنے آیا۔

درآمدی گندم صوبوں کی طلب اور ضرورت کے مطابق تقسیم کی جائے گی۔ٹی سی پی کے مطابق درآمد ہونے والی گندم صوبوں کی طلب اور ضرورت کو مدنظر رکھتے ہوئے تقسیم کی جائے گی۔ مجموعی درآمدی گندم میں سے 3 لاکھ ٹن سندھ، 2 لاکھ 50 ہزار ٹن پنجاب اور 2 لاکھ ٹن خیبرپختونخوا کو فراہم کی جائے گی۔

ملکی سطح پر گندم کی سالانہ کھپت تقریباً 3 کروڑ 13 لاکھ ٹن ہے۔ اقتصادی سروے 2025-26 کے مطابق گندم کی پیداوار 2 کروڑ 96 لاکھ 10 ہزار ٹن رہی، جبکہ ماہرین کے مطابق جولائی کے پہلے ہفتے تک پاسکو کے پاس 17 لاکھ 83 ہزار ٹن گندم موجود تھی۔

ماہرین بتاتے ہیں کہ بحران کی جڑ حکومت کی ناقص منصوبہ بندی ، سرمایہ دارانہ ذہنیت،مفاد پرستی اور نا اہلی ہے ۔ 2026 کی فصل کے لیے سرکاری سپورٹ پرائس کسانوں کی پیداواری لاگت سے بھی کم رکھی گئی جس سے گندم کی کاشت پر کسانوں کا اعتماد ختم ہوتا جا رہا ہے۔کاشتکاروں کا متبادل فصلوں جیسے کینولا، دالوں اور سبزیوں کی طرف رحجان گیا ۔

آڈیٹر جنرل آف پاکستان کی رپورٹس میں مسلسل یہ نشاندہی کی جاتی رہی ہے کہ سرکاری چینلز کے ذریعے درآمد نجی شعبے کے مقابلے میں مہنگی پڑتی ہے۔ 2017 سے 2022 کے عرصے کے آڈٹ میں یہ سامنے آیا کہ ٹی سی پی اور پاسکو نے مہنگے داموں گندم درآمد کی جس سے قومی خزانے کو اربوں روپے کا نقصان ہوا، اور نجی شعبے نے سرکاری اداروں کے مقابلے میں سستے نرخوں پر گندم درآمد کی، جس سے قومی خزانے کو 3 کروڑ 13 لاکھ ڈالر سے زائد کا نقصان ہوا۔

اس کے برعکس، جب 2023-24 میں نجی شعبے کو کھلی چھوٹ دے کر درآمد کروائی گئی تو نتیجہ اس سے بھی زیادہ تباہ کن نکلا۔

آڈٹ رپورٹ 2024-25 کے مطابق پاکستان کو 2023-24 کے مالی سال میں 35 لاکھ 90 ہزار میٹرک ٹن گندم کی درآمد سے 300 ارب روپے سے زائد کا نقصان ہوا، حالانکہ ملک کے پاس مقامی ذخائر پہلے سے موجود تھے، جو وفاقی حکومت کی سب سے بڑی مالی ناکامیوں میں شمار کی گئی۔

ذرائع کے مطابق اس غیر ضروری درآمد سے کسانوں کو 300 ارب روپے سے زائد جبکہ حکومتی خزانے کو 104 ارب روپے کا نقصان پہنچا، کیونکہ پاسکو اور صوبائی محکمہ خوراک اپنے ذخائر فروخت نہ کر سکے اور فی من اوسطاً 950 روپے کے اضافی اخراجات برداشت کرنے پڑے۔ اسی رپورٹ میں یہ تشویشناک انکشاف بھی ہوا کہ درآمد شدہ 71 کھیپوں میں سے 26 میں معائنے کے دوران زندہ کیڑے پائے گئے۔

2024 میں بھی جب نجی شعبے کو کھلی چھوٹ دے کر گندم درآمد کروائی گئی تو پنجاب کے ہزاروں کسانوں نے سڑکوں پر نکل کر احتجاج کیا، کیونکہ حکومت نے ان کی گندم خریدنے سے انکار کر دیا تھا جس سے انہیں بھاری مالی نقصان پہنچا۔ اس وقت بھی ستمبر 2023 سے مارچ 2024 کے درمیان 35 لاکھ ٹن سے زائد گندم بین الاقوامی منڈی سے درآمد کی گئی جہاں قیمتیں مقامی نرخوں سے کہیں کم تھیں۔ اسی دور کی تحقیقات میں یہ بھی سامنے آیا کہ کیئرٹیکر دور میں وزارتِ خزانہ نے نجی شعبے کے لیے درآمد کی کھلی چھوٹ کی سفارش کی جو مقررہ حدود سے کہیں زیادہ تھی، اور کسٹمز ڈیوٹی و جی ایس ٹی بھی معاف کر دی گئی تھی۔

اب 2026 میں تاریخ دہرائی جا رہی ہے — فرق صرف اتنا ہے کہ اس بار درآمد نجی شعبے کے بجائے براہِ راست سرکاری ادارے (TCP) کے ذریعے ہو رہی ہے، جسے آڈیٹر جنرل کی سابقہ رپورٹس پہلے ہی مہنگا اور نقصان دہ قرار دے چکی ہیں۔