شعور نیوز( ویب ڈیسک):پاک بحریہ کے جہازوں ’حنین‘اور ’یرموک‘نے بحیرہ عرب میں منشیات کے خلاف مشترکہ آپریشن کے دوران تقریباً 750 ملین ڈالر مالیت کی 2,800 کلوگرام سے زائد منشیات قبضے میں لے لیں۔پاک فوج کے شعبہ تعلقات عامہ (آئی ایس پی آر) کی جاری کردہ اطلاعات کے مطابق معمول کی گشت کے دوران پاک بحریہ کے جہازوں نے ایک مشکوک کشتی کو روکا اور تلاشی کے دوران اس کے خفیہ خانوں سے منشیات برآمد کیں۔کامیاب آپریشن پر سربراہ پاک بحریہ ایڈمرل نوید اشرف ، وزیر اعظم ، وزیر داخلہ نے جہازوں کے عملے کو سراہا۔

منشیات کا خطرناک دائرہ کار مستقل بڑھتا پھیلتا جا رہا ہے ، یہ ایک عالمی مافیا ہے جسے عالمی سرمایہ دارانہ نظام کی پشت پناہی اس لیے حاصل ہے کہ یہ مستقل صارفیت کو فروغ دے کر ایک متوازی معیشت بن چکی ہے ۔

اقوامِ متحدہ کے دفتر برائے منشیات و جرائم کے مطابق، عالمی سطح پر منشیات کی غیر قانونی تجارت کا سالانہ حجم 400 سے 500 ارب ڈالر سے تجاوز کر چکا ہے۔ یہ اتنی خطیر رقم ہے جو دنیا کے کئی ممالک کے کل جی ڈی پی (GDP) سے بھی زیادہ ہے۔سرمایہ دارانہ نظام انسان نے منشیات کو ذہنی دباؤ سے نجات کا عنوان ، کلب کلچر کا لازمی جزبنا کر اسکی مانگ کو مستقل برقرار رکھا ہے۔اس لیے یہ سب اقدامات بظاہر ایک قدم نظر آتے ہیں لیکن تاریخ گواہ ہے کہ ان کا کوئی فائدہ نہیں ہوتا۔