شعورنیوز(ویب ڈیسک):لندن: مشرق وسطیٰ میں ایران اور امریکا کے درمیان جنگ طول پکڑنے کے خدشات کے باعث عالمی منڈی میں برینٹ تیل کی قیمت 100ڈالر پار کرگئی ۔

سرمایہ کاروں کو خدشہ ہے کہ طویل جنگ سے خلیج سے تیل کی سپلائی مسلسل متاثر ہوسکتی ہے۔بدھ 9ستمبر 2026 کو برینٹ خام تیل کی قیمت 100.49 ڈالر فی بیرل پر چلی گئی، 4 مئی کو 2026 کو یہ 114 ڈالر تک یہ قیمت چلی گئی تھی جس کے بعد یکم جولائی 2026 کو 71.57 ڈالر پر واپس آئی اور اب دوبار ہ 100 ڈالر کراس ہوگئے ہیں۔جنگ سے قبل اس تیل کی قیمت 70 ڈالر فی بیرل تھی۔

سرمایہ دار اس موقع سے بھرپور فوائد سمیٹ رہے ہیں۔1970ء کی دہائی سے عالمی تیل کی تجارت امریکی ڈالر میں ہوتی ہے۔ تیل کی قیمت جتنی بڑھتی ہے، دنیا بھر میں امریکی ڈالر کی مانگ اتنی ہی تیز ہوتی ہے۔
سرمایہ دارانہ نظام نے پچھلی صدی میں دنیا کے پورے معاشی ڈھانچے کو اس طرح ڈیزائن کیا ہے کہ تیل اب محض ایک ضرورت نہیں، بلکہ اس نظام کی بقا کی شرط بھی بن چکاہے۔

تیل کی قیمتوں میں اضافے سے امریکہ کا معاشی نظام بھی ہل رہا ہے۔ ایران کے ساتھ جنگ کی وجہ سے آبنائے ہرمز کے گرد بڑھتی ہوئی کشیدگی اور عالمی سپلائی میں ممکنہ رکاوٹ کے خدشات بڑھ رہے ہیں۔ یہ سمندری راستہ عالمی خام تیل کی ترسیل کے لیے انتہائی اہم ہے، اس لیے یہاں طویل رکاوٹ عالمی منڈی پر براہ راست اثر ڈال سکتی ہے۔ یہ جنگیں اور بحران اس نظام کے لیے "اکنامک ٹرگر" کا کام کرتے ہیں۔ عام آدمی مہنگائی سے مر رہا ہوتا ہے، لیکن وال سٹریٹ کے سرمایہ دار اور تیل کی ملٹی نیشنل کمپنیاں (جیسے Exxon یا مڈل ایسٹ کے تیل کے کنویں) اربوں ڈالر کا ریکارڈ منافع کما رہے ہوتے ہیں۔

لبرل سرمایہ داری کا پورا ماڈل "لامحدود پیداوار اور تیز رفتار نقل و حمل" (Mass Production & Fast Logistics) پر کھڑا ہے۔ اگر دنیا تیل چھوڑ دے، تو عالمی سپلائی چین سیکنڈوں میں رک جائے گی، فیکٹریاں بند ہو جائیں گی اور کارپوریٹ منافع ختم ہو جائے گا۔ سرمایہ دار طبقہ کبھی ایسے متبادل (جیسے پبلک ٹرانسپورٹ یا مقامی زراعت) کو پنپنے ہی نہیں دیتا جو لوگوں کو تیل سے آزاد کر دیں، کیونکہ تیل کی مہنگائی سے ان کی جیبیں بھرتی ہیں۔

توانائی کے تجزیہ کاروں کے مطابق اگر ایران اور امریکا کے درمیان کشیدگی طویل عرصے تک جاری رہی تو خلیج فارس سے تیل کی سپلائی 2026 کے اختتام تک محدود رہ سکتی ہے۔ایک تجزیے میں جنگ سے پہلے کی معمول کی سپلائی مکمل طور پر بحال ہونے میں 2027 کی پہلی سہ ماہی کے آخر یا دوسری سہ ماہی کے آغاز تک وقت لگنے کا امکان ظاہر کیا گیا ہے۔حالیہ کشیدگی کے باعث آبنائے ہرمز میں تجارتی بحری جہازوں کی آمدورفت بھی متاثر ہوئی ہے، جس سے عالمی توانائی کی منڈی میں سپلائی کے خدشات مزید بڑھ گئے ہیں۔