شعور نیوز(ویب ڈیسک):کراچی میں 4نوجوانوں کا قتل 8 سال بعد بھی نامعلوم ثابت ہوگیا۔ نقیب اللہ قتل کیس میں گرفتار 25 پولیس اہلکار 8 سال مقدمہ چلنے کے بعد بے گناہ ثابت ہوئے اور انسداد دہشت گردی کورٹ سے باعزت بری ہوگئے، اہم بات یہ ہے کہ کورٹ نقیب اللہ اور اسکے ساتھ مرنے والے 3نوجوانوں کو بھی معصوم قرار دے چکی ہے۔ پولیس کا موقف یہ رہا کہ انہوں نے تو دہشت گردوں سے مقابلہ کیا تھا ۔
یہ وہ قتل ہے جس نے محسود تحفظ موؤمنٹ کو پشتون تحفظ موؤمنٹ میں بدلا تھا ۔ مرنے والے تو چارافراد تھے لیکن کیس نقیب اللہ کے نام سے مشہور ہوا ۔ مقتول نوجوان کے والد نے اپنے انتقال سے قبل تک اس مقدمے کو لڑامگر نتیجہ ان کے دعوؤں کے برخلاف نکلا ۔انسداد دہشت گردی عدالت نے عدم شواہد کی بنیاد پر پولیس ملزمان کوبری کردیا جس میں استغاثہ بھی سرکار ۔ ملزمان بھی سرکاری پولیس تھی۔

اس کیس کی ایک اور خاص بات یہ بھی تھی کہ تب کے چیف آف آرمی اسٹاف جنرل قمر جاوید باجوہ نے نقیب اللہ محسود کے والد محمد خان محسود سے جنوبی وزیرستان میں ملاقات کی اور یقین دہانی کرائی تھی کہ پاک فوج انہیں انصاف دلانے کے لیے ہر ممکن تعاون کرے گی۔

ملزمان کے وکیل عابد زمان ایڈووکیٹ کے مطابق گرفتار پولیس اہلکاروں کے خلاف کسی بھی گواہ نے یہ بیان نہیں دیا کہ نقیب اللہ محسود کو جعلی پولیس مقابلے میں قتل کیا گیا تھا۔

پراسیکیوشن کے مطابق نقیب اللہ قتل کیس میں سابق ایس ایس پی ملیر راؤ انوار سمیت 18 پولیس افسران اور اہلکاروں کو پہلے ہی بری کیا جاچکا ہے، جبکہ مقدمے میں سابق ایس ایچ او امان اللہ مروت سمیت 7 پولیس افسران اور اہلکار مفرور تھے۔

پراسیکیوشن کا کہنا ہے کہ ساتوں مفرور ملزمان نے انسداد دہشت گردی عدالت کے فیصلے کے بعد خود کو عدالت کے سامنے سرینڈر کردیا تھا۔

واضح رہے کہ جنوبی وزیرستان سے تعلق رکھنے والے 27 سالہ نقیب اللہ محسود کو سابق ایس ایس پی ملیر راؤ انوار کی سربراہی میں جنوری 2018 میں کراچی کے علاقے ملیر میں مبینہ پولیس مقابلے کے دوران ہلاک کیا گیا تھا۔ واقعے کے بعد پولیس مقابلے کی شفافیت پر سوالات اٹھے تھے اور معاملہ عدالت تک جا پہنچا تھا۔

پولیس ٹیم کا مؤقف تھا کہ خطرناک دہشتگردوں کی گرفتاری کے لیے کارروائی میں‌ پولیس نے جوابی فائرنگ کرتے ہوئے چار ملزمان کو ہلاک کیا تھا، ہلاک ہونے والوں میں نوجوان نقیب اللہ بھی شامل تھا۔نقیب اللہ قتل کیس کی تفتیش کرنے والی مشترکہ تحقیقاتی کمیٹی نے راؤ انوار کو مقتول کے ماورائے عدالت قتل کا ذمہ دار ٹھہرایا گیا تھا، بعد ازاں انسداد دہشتگردی عدالت نے ان کو رہا کر دیا تھا۔
پاکستان میں انگریز کا مسلط کردہ قانونی نظام تضادات اور خرابیوں کا ایسا مجموعہ ہے کہ اس میں صرف طاقتور ہی محفوظ رہ سکتا ہے ۔ یہ ’صرف طاقتور کے زندہ رہنے ‘ لبرل تصور پر کھڑا ہے۔اس لیے طاقتور کو ریلیف ملنے کی یکسانیت اس نظام میں ہمیشہ نمایاں رہی ہے۔