شعور نیوز( ویب ڈیسک):کراچی میں واقع آرٹس کونسل آف پاکستان نے 25 سے 27 ستمبر 2026 تک تین روزہ پاکستان میوزک فیسٹیول 2026منعقد کرنے کا اعلان کردیا ہے۔ آرٹس کونسل کے مطابق پروگرام ہر روز رات 8 بجے سے رات گئے یہ موسیقی و گانے کا پروگرام ہوگا، اس میں رجسٹر کرانے والوں کے پورے خاندان کے لیے مفت داخلہ رکھا گیا ہے ۔

اس کو آرٹس کے دائرے میں تفریحی اور ثقافتی سرگرمی کہا جا رہا ہے۔پاکستان کی مسلم معاشرت سے امر بالمعروف نہی عن المنکر کا فریضہ محو ہوجانے کے نتیجے میں مستقل معاشرت تباہی کی جانب گامزن ہے۔معاشرے کے حقیقی دکھوں، سوالوں اور بحرانوں پر مکالمےسے دور ہمارے اداروں سے لبرل، سیکولر دین بےزار ثقافت کیا رنگ دکھائے گی؟
پاکستان کے سب سے بڑے شہر کراچی کی حالت یہ ہے کہ پورا شہر کھنڈر اور کچرے کا ڈھیر بنا ہوا ہے ۔ عوام ک بڑی تعداد بجلی لوڈ شیڈنگ ، مہنگی بجلی، پانی کی قلت، روزگار، بد امنی ، علاج معالجے، تعلیم ، موبائل اسنیچنگ ، ڈکیتی، قتل، زنا جیسے مسائل کا شکار ہیں۔ پورا پاکستان دونوں سرحدوں پر شدید حالت جنگ میں ہے، کوئی دن نہیں جب ملک کے فوجیوں کی لاشیں ان کے گھر نہ جاتی ہوں ، تو ایسے میں ثقافتی اداروں کی ترجیحات دین ، مذہب، قومی، عالمی حقائق، واقعات سے باہرکس کے ایجنڈے پر جا رہی ہیں؟

خطے میں غزہ کا انسانی بحران، ایران سے متعلق جنگی کشیدگی، سعودی عرب اور حوثیوں کے درمیان بڑھتی ہوئی کشیدگی اور پاکستان-افغانستان سرحدی تنازع ، مقبوضہ کشمیر میں ہندو مظالم، محض بیرونی خبریں کیسے ہو سکتی ہیں؟اگر مہنگائی کم کرنے یا کسی احتجاج کی بات ہوتو حکومت کہتی ہے کہ حالات حساس ہیں، انتظار کریں لیکن موسیقی فیسٹیول کے لیے ایسی کوئی شرائط کیوں نہیں؟ایک جانب حکومت مکہ کے دفاع ، مکہ پر حملوں کا شور مچا تی ہے تو دوسری جانب حکومتی اجازت سے ناچ گانوں کے فیسٹیول سے کیا ثابت کررہی ہے؟
غزہ میں بھی انسانی بحران بدستور جاری ہے؛ اقوام متحدہ کے ترقیاتی پروگرام کے مطابق جنگ نے غزہ کے تقریباً 2.1 ملین باشندوں کی انسانی صورتِ حال کو شدید متاثر کیا ہے۔سوال یہ ہے کہ قومی ثقافتی ادارے عوام کے اجتماعی دکھوں کو اپنی تخلیقی سرگرمیوں میں کتنی جگہ دیتے ہیں؟

اگر لاکھوں لوگ مہنگائی اور بے روزگاری سے پریشان ہیں، نوجوان مستقبل کے روزگار کے لیے فکرمند ہیں، شہری بدامنی اور جرائم سے خوفزدہ ہیں، فلسطینیوں کے قتل عام کی تصاویر روزانہ اسکرینوں پر آ رہی ہیں، خطے میں جنگ کے خطرات موجود ہیں اور ملک خود معاشی و توانائی کے دباؤ میں ہے۔

تو کیا ثقافت صرف یہ پیغام دے گی:

"آئیں، تین راتیں موسیقی سنیں اور سب کچھ بھول جائیں"؟

یہ کیسا فن ہے جس کا کام عوام کو گناہ کے رستے ڈال کر حقیقت سے دور لے جانا ہے، یا کبھی انہیں اپنی حقیقت کا سامنا کرنے اور اسے بدلنے کا شعور دینا بھی ہے؟