شعورنیوز(انٹرنیشنل ڈیسک):لیبیا کے مفتی اعظم شیخ ڈاکٹر صادق الغریانی نے اپنے ایک حالیہ بیان میں کہا ہے کہ "انصار اللہ" (حوثی تحریک) کی جانب سے آبنائے باب المندب کا کنٹرول سنبھالنا امریکہ کے لیے ایک بڑی مصیبت اور پریشانی کا باعث بنے گا، اور امریکہ اس حوالے سے اپنی فتح کے جو دعوے بھی کر رہا ہے، وہ محض ایک سراب ثابت ہوں گے۔

اس بات اظہار انہوں نے یمن کی علماء کانفرنس سے خطاب کرتے ہوئےکیا۔ کانفرنس کا مقصد مکہ مکرمہ کو نشانہ بنانے کی خبروں کے حوالے سے سعودی حکومت کے دعووں کی تردید کرنا تھا۔ مفتی اعظم لیبیا کا کہنا تھا: "میں مسلمانوں کو اس بات سے آگاہ کرنا چاہتا ہوں کہ یمن میں جاری موجودہ جنگ، جس کی قیادت سعودی عرب طیاروں اور میزائلوں کے ذریعے یمنی عوام کے خلاف کر رہا ہے، اس کا مقصد کسی 'قانونی حکومت' کی حمایت نہیں ہے۔ بلکہ یہ ایک ایسی جنگ ہے جو سعودی عرب امریکہ کے لیے بطور 'پراکسی' (نائب) لڑ رہا ہے، کیونکہ امریکی خود آبنائے ہرمز کی دلدل میں بری طرح پھنس چکے ہیں۔"

انہوں نے مزید وضاحت کرتے ہوئے کہا کہ اگرچہ امریکہ اپنے عوام کو یہ پٹی پڑھا رہا ہے کہ آبنائے ہرمز پر اس کا مکمل کنٹرول ہے، بحران ختم ہو چکا ہے اور قیمتیں مستحکم ہیں، لیکن حقیقت میں وہ اس آبنائے کے معاملے پر سخت پریشانی کا شکار ہے اور اسے خوف ہے کہ انصار اللہ آبنائے باب المندب تک نہ پہنچ جائے۔ انہوں نے دوٹوک انداز میں کہا: "اگر انصار اللہ نے باب المندب پر کنٹرول حاصل کر لیا، تو امریکہ کو ایک ایسی صورتحال کا سامنا کرنا پڑے گا جو اس کی برداشت اور صلاحیت سے باہر ہوگی؛ اس کے بعد امریکہ (اپنی کامیابی کا) جو بھی بیانیہ دنیا کے سامنے پیش کرے گا، وہ ایک ایسا سراب رہے گا جس پر کوئی یقین نہیں کرے گا۔"

شیخ صادق لیبیا کے ایک معروف بااثر اسلامی عالم اور فقیہ ہیں جو طویل عرصے سے اس منصب پر فائز ہیں۔ شیخ صادق الغریانی اہلسنت و الجماعت (سنی) مکتبہ فکر سے تعلق رکھتے ہیں۔

لیبیا کی اکثریت مسلمانوں پر مشتمل ہے اور وہاں کے عوام کی طرح وہ بھی فقہ کے اعتبار سے مالکی سنی ہیں۔انہوں نے معمر قذافی کے خلاف لیبیا کے عوام کے انقلاب کی کھل کر حمایت کی تھی اور قذافی حکومت کے خاتمے کا فتویٰ دیا تھا۔وہ مسلم ممالک (بشمول لیبیا اور یمن) میں امریکہ، اسرائیل اور مغربی ممالک کی سیاسی و فوجی مداخلت کے شدید مخالف ہیں۔انہوں نے طویل عرصے تک لیبیا کی جامعات میں اسلامی علوم (فقہ، حدیث اور اصول فقہ) پڑھائے ہیں۔ وہ متعدد معتبر اسلامی کتابوں کے مصنف بھی ہیں۔

لیبیا کے مفتی اعظم شیخ صادق نے امریکہ کے خلاف انصار اللہ کے اقدامات کی حمایت کردی