شعور نیوز( ویب ڈیسک):سوشل میڈیا پر مفت اشیاء اور سرکاری مراعات کے نام پر معصوم شہریوں اور طلبہ کو ٹھگنے کا سلسلہ تیزی سے جاری ہے۔ حال ہی میں واٹس ایپ، فیس بک اور دیگر آن لائن پلیٹ فارمز پر "فری لیپ ٹاپ فار اسٹوڈینٹس 2026" کے عنوان سے ایک ویب سائٹ کا لنک تیزی سے وائرل ہو رہا ہے، جس کے بارے میں تحقیقات اور فیکٹ چیکس سے ثابت ہوا ہے کہ یہ مکمل طور پر ایک جعلی فشنگ (Phishing) اسکیم اور آن لائن فراڈ ہے۔ویب سائٹ پر صارفین سے ان کا پورا نام، تعلیمی سطح، فون نمبر اور پسندیدہ لیپ ٹاپ برانڈ کی معلومات مانگی جاتی ہیں۔ پہلے معلومات لی جاتی ہے اسکے بعد ’درخواست کی منظوری‘ کا پیغام دکھا کر شرط کے طور پر صارف کو مجبور کیا جاتا ہے کہ وہ اس لنک کو اپنے 15 سے 20 واٹس ایپ کانٹیکٹس یا گروپس میں شیئر کرے۔

یہ طریقہ کار آن لائن سیکیورٹی کی زبان میں "سوشل انجینئرنگ" اور "وائرل فشنگ" کہلاتا ہے، جس کا مقصد زیادہ سے زیادہ لوگوں کا ڈیٹا اکٹھا کرنا اور وائرس یا اسپیم لنکس پھیلانا ہوتا ہے۔ فیس بک نے اس لنک پر "غلط معلومات" کا لیبل لگا دیا ہے جبکہ سری لنکا اور نائیجیریا کی فیکٹ چیکنگ ایجنسیوں نے بھی اس ویب سائٹ کو فراڈ قرار دیا ہے۔ پاکستان کی نیشنل سائبر کرائم انویسٹی گیشن ایجنسی (NCCIA) کے ترجمان نے شہریوں کو سخت خبردار کیا ہے کہ اس قسم کی غیر مصدقہ سائٹس پر اپنی حساس معلومات فراہم کرنے سے گریز کریں۔اس سے قبل بے نظیر انکم سپورٹ یا احساس پروگرام کے جعلی پیغامات بھی اسی طرح پھیلاکر ہزاروں لوگوں کو لوٹ لیاگیا۔اسی طرح سستے یا مفت الیکٹرک بائیکس اور سولر پینل فراڈ کو بھی سرکاری اسکیموں کے نام کا سہارا لے کر جعلی پورٹلز کے ذریعہ جرائم کیے جاتے رہے ۔حرام خوری کے یہ سارے کام اس جدید ٹیکنالوجی کے نتیجے میں پیدائش پاتے رہتے ہیں جن میں اصل صرف پیسہ کمانا ہوتا ہے۔

اس پورے واقعے نے ہمارے اجتماعی نظام، ڈیجیٹل سیکیورٹی اور ڈیٹا پرائیویسی کے طریقہ کار پر کئی اہم سوالات کھڑے کر دیے ہیں۔ خبروں اور میڈیا کے اتنے وسیع نظام کے باوجود عام شہری اور طلبہ سیکیورٹی سائٹس اور سرکاری ڈومین اور عام جعلی لنکس کے درمیان فرق کرنے سے قاصر ہیں۔ تعلیم میں ڈیجیٹل سیکیورٹی کو شامل نہ کرنا ایک بڑا نظاماتی نقص ہے۔پاکستان میں ذاتی ڈیٹا کے تحفظ کا جامع اور موثر فریم ورک اب بھی نچلی سطح پر نافذ العمل نہیں۔ سائبر مجرم عوام کے فون نمبرز اور شناختی کارڈ کی معلومات کھلے عام حاصل کر کے انہیں نشانہ بناتے ہیں۔ سائبر کرائم ایجنسیوں کا کام صرف خبردار کرنے تک محدود نہیں ہونا چاہیے بلکہ ایسے ڈومینز اور آئی پی ایڈریسز کو ان کے وائرل ہونے سے پہلے فوری طور پر بلاک کرنے کے لیے جدید خودکار سسٹمز کی اشد ضرورت ہے۔واٹس ایپ جیسے پلیٹ فارمز پر اس طرح کے لنکس کا اتنی تیزی سے پھیلنا ظاہر کرتا ہے کہ پلیٹ فارم سطح پر اسپیم کنٹرول سسٹمز مزید سخت کرنے کی ضرورت ہے۔