شعور نیوز( ویب ڈیسک):لاہور ہائیکورٹ نے 2019 کے قتل کے مقدمے میں شواہد کی کڑی مکمل نہ ہونے، ایف آئی آر کے اندراج میں تاخیر اور مقتول کی لاش کی شناخت ثابت نہ ہونے پر 2ملزمان کو شک کا فائدہ دیتے ہوئے 7سال بعد بری کرنے کا حکم دے دیا۔شرع اسلامی کے علاوہ باقی غیر شرعی قوانین میں بھی شک کا فائدہ ملزم کو ہی دیا جاتا ہے ۔اہم بات یہ ہے کہ یہ شک ٹرائل کورٹ کے فیصلے کے 6سال بعد یاد آتے ہیں تو اعتماد کے مسائل کا سبب بنتے ہیں۔

جسٹس سید فرہاد علی شاہ نے جن دلائل پر محمد قاسم عرف کاشو اور محمد طارق کی اپیلوں پر فیصلہ سناتے ہوئے دونوں ملزمان کی عمر قید کی سزائیں کالعدم قرار دے دیں ، وہ سب ٹرائل کورٹ کے جج کے سامنے بھی اسی طرح موجود تھے ۔اب یا تو ٹرائل کورٹ کے فاضل جج کو نا اہل قرار دیا جائے ۔ہائی کورٹ کے جج کی ذہانت وتجربہ قرار دیا جائے ۔ملزمان کے مہنگے وکلأ کی تیاری قرار دی جائے۔ جو بھی ہے اس میں قانون کا غلط استعمال تو ثابت ہے۔2 بے گناہوں کو انتہائی کچے ثبوتوں کے نام پر دھر لیا گیا۔

ان دونوں ملزمان کے خلاف تھانہ صدر دنیاپور، ضلع لودھراں میں 17 سالہ عمر فاروق نامی نوجوان کی گمشدگی کا مقدمہ اپریل 2019 میں درج کیا گیا جو بعد میں قتل میں منتقل ہوا۔ڈیڑھ سال مقدمہ چلا اور ٹرائل کورٹ ایڈیشنل سیشن جج دنیاپور نے 21 دسمبر 2020 کو دونوں ملزمان کو عمر قید کی سزا سنائی ۔

دونوں ملزمان ہائی کورٹ میں اپیل پر چلے گئے ۔ہائی کورٹ نے اپنے فیصلے میں قرار دیا کہ استغاثہ ملزمان کے خلاف الزام شک و شبہ سے بالاتر ہو کر ثابت کرنے میں ناکام رہا ۔

جائے وقوعہ اور تھانے کے درمیان تقریباً نو میل کا فاصلہ ہونے کے باوجود ایف آئی آر کے اندراج میں 3ماہ کی غیر معمولی تاخیر کی وضاحت عدالت کو مطمئن نہ کر سکی۔

عدالت نے قرار دیا کہ اس تاخیر سے استغاثہ کے مقدمے پر شکوک پیدا ہوتے ہیں۔مقتول بچے کے والدین کا کہنا ہے کہ وہ اس دوران ملزمان سے رابطوں میں یہ کوشش کر رہے تھے کہ شاید بچہ واپس مل جائے ،مگر ہائی کورٹ کو یہ دلیل سمجھ نہیں آئی۔لاہور ہائیکورٹ نے مزید قرار دیا کہ مقتول کے والدین وقوعہ کے عینی شاہد نہیں تھے، بلکہ ان کی شہادت حالات و واقعات پر مبنی تھی۔ہائی کورٹ نے مقتول اور قاتلوں کے کال ڈیٹا ریکارڈ کی بنیاد پر ہونے والے اعتراف قتل کے حوالے پیش کیے ،مگر اسکو بھی ہائی کورٹ نے انسانی رویے سے مطابقت نہ رکھنے والا ثبوت قرار دیا۔ہائی کورٹ نے اپنے فیصلے میں ملزمان کی نشاندہی پر لاش کی برآمدگی کو بھی ناقابل قبول شہادت قرار دیا۔

پوسٹ مارٹم رپورٹ کے مطابق لاش مکمل طور پر گل سڑ چکی تھی اور شناخت کے قابل نہیں تھی، جبکہ میڈیکل آفیسر نے جرح کے دوران بتایا کہ لاش کی خراب حالت کے باعث موت کی وجہ بھی متعین نہیں کی جا سکی۔فیصلے میں کہا گیا کہ ریکارڈ پر ایسا کوئی قابل اعتماد ثبوت موجود نہیں جس سے ثابت ہو کہ برآمد ہونے والی لاش مقتول عمر فاروق ہی کی تھی۔ عدالت نے یہ بھی نشاندہی کی کہ ڈی این اے رپورٹ یا تجزیہ ریکارڈ پر پیش نہیں کیا گیا۔پولیس نے مقتول کا موبائل فون بھی ملزمان سے برآمد کرا لیکن فون کی تصدیق متعلقہ کمپنی یا فارنزک نہ ہونے کی وجہ سے بھی ثبوتوں پر شک ظاہر کر دیا۔

لاہور ہائیکورٹ نے قرار دیا کہ فوجداری مقدمے میں اگر کوئی ایسا قرینہ موجود ہو جو ملزم کے جرم کے حوالے سے معقول شک پیدا کرے تو ملزم شک کے فائدے کا حقدار ہوتا ہے۔

ہائی کورٹ نے محمد قاسم عرف کاشو اور محمد طارق کی اپیلیں منظور کرتے ہوئے ٹرائل کورٹ کا فیصلہ کالعدم قرار دے دیا اور دونوں ملزمان کو بری کرنے کا حکم جاری کردیا۔
پاکستان میں مقدمات چلنے چلانے کا یہ طریقہ کار ہے جس میں ملزمان پکڑنے اور سزائیں دینے کے عمل ایسا ہی چلتا ہے۔استغاثہ پر لازم ہوتا ہے کہ وہ اس جرم کو مجرم کے اوپر بالکل

beyond reasonable doubt

کی صورت پیش کرے۔ یہ ایک انتہائی مشکل عمل ہے ، یہی وجہ ہے کہ شرع اسلامی بھی شک کا فائدہ ملزم کو دیتی ہے۔اصل تصور شرع اسلامی کے ’نظام سزا ‘ میں یہ ہے کہ دنیا دراصل صرف دار الامتحان ہے۔حقیقی انصاف ، عدل فیصلہ خالق کائنات کو ہی کرنا ہے۔کسی پر جھوٹ بول کر الزام لگانا یا ناکافی ثبوتوں کے ساتھ درست الزام لگانے میں مقصود ’رجوع الی اللہ ‘ہی ہوتا ہے۔انسان کے لیے ہرحال میں حاکمیت الہی ، مالک یوم الدین، روز جزا کا تصور جاگزیں رہنا چاہیے اور اس دنیا کو مانند کھیل تماشہ، عارضی اسٹیج ہی سمجھتے رہنا چاہیے ناکہ وہ سب امیدیں اس دنیا اور رائج نظام سے ہی لگا لے۔