شعور نیوز(ویب ڈیسک): ایف آئی اے اسلام آباد نے گردے کی غیر قانونی خرید و فروخت کے غلیظ جرم میں ملوث بڑے گروہ کا سراغ لگا کر پانچ ملزمان کو گرفتار کرلیا۔سرمایہ دارانہ لبرل اقدا ر نے ہر شے کو خریدو فروخت کے قابل بنا ڈالا ہے۔ اب انسانی گردہ طبی ضرورت نہیں بلکہ ایک ’مصنوع‘ (Product) ہے ، جسے امیر 30 لاکھ روپے دے کر خرید سکتا ہے اور غریب یہ اللہ کی عطا کردہ امانت کو بیچنے پر آمادہ ہے۔

چھاپے کے دوران انکشاف ہوا کہ وصول کنندہ محمد قاسم کو ڈونر رمضان ارشد کا گردہ غیر قانونی طریقے سے لگایا گیا تھا، چھاپے کے دوران تین ملزمان کو موقع پر گرفتار کر لیا گیا جبکہ دیگر دو کو بعد ازاں گرفتار کیا گیا۔اس کیس میں بھی ملزمان سے 10 لاکھ روپے نقد برآمد، 8 کروڑ 75 لاکھ روپے مالیت کی جائیدادیں منجمد، غیر قانونی سیٹ اپ سیل، تین گاڑیاں ضبط کرلی گئیں۔حکام کے مطابق ملزمان سے تحقیقات کے دوران طریقہ واردات کے بارے میں انکشاف ہوا ہے وصول کنندہ نے گردے کی پیوندکاری کے عوض 30 لاکھ روپے نقد ادا کیے۔ ڈونر کا بندوبست ایجنٹوں نے کیا ان ایجنٹوں نے ڈونر سے 4 لاکھ روپے دینے کا وعدہ کیا جس میں سے 3 لاکھ 40 ہزار روپے ڈونر کو اور 60 ہزار روپے تینوں ایجنٹوں میں کمیشن کے طور پر تقسیم ہونے تھے۔ 26 لاکھ روپے اس مافیا کو ملنے تھے اور گردہ دینے والے کو صرف 3لاکھ 60 ہزار روپے ۔

اسلامی فقہ کے مطابق انسان اپنے جسم کا مالک نہیں بلکہ امین ہے۔ انسانی اعضاء کو بیچنا یا ان کی تجارت کرنا انسان کی تذلیل اور احترامِ آدمیت کے منافی ہے۔جن جدید فقہا نے اس قسم کی پیوند کاری کی گنجائش نکالی ہے اس میں اعضاء کا عطیہ صرف محبت، ایثار اور فی سبیل اللہ (رضائے الٰہی اور انسانی جان بچانے) کی بنیاد پر ہی جائز کیا ہے، اس کے بعد بھی کئی ایسی شرائط و ضوابط لگائی ہیں کہ اس طرح سے پیوند کاری کا تو تصور بھی نہیں ہو سکتا۔

حکام کے مطابق ڈائریکٹر ایف آئی اے اسلام آباد زون نے خفیہ اطلاع پر ٹیم تشکیل دی جس نے ہیومن آرگن ٹرانسپلانٹیشن اتھارٹی (HOTA) کی ٹیم کے ہمراہ مشترکہ کارروائی کرتے ہوئے پی ڈبلیو ڈی سوسائٹی، اسلام آباد میں چھاپہ مارا اور غیر قانونی گردے کی پیوندکاری کے منظم گروہ کو پکڑ لیا۔ایف آئی اے نے ملزمان کو عدالت میں پیش کیا جہاں سے گرفتار ملزمان کا سات روزہ جسمانی ریمانڈ منظور کیا گیا۔

ابتدائی تحقیقات میں مزید انکشافات سامنے آئے کہ ملزمان کسی قسم کی طبی ڈگری یا سند کے بغیر رہائشی مکانات میں گردوں کی پیوند کاری کرتے رہے ہیں، پیوندکاری کے لیے ضروری ٹیشو ٹائپنگ، کراس میچ، PRA اور HLA ٹیسٹ ایک ہسپتال سے ایجنٹوں کے ذریعے غیر قانونی طریقے سے کروائے جاتے تھے چونکہ یہ ٹیسٹ صرف HOTA سے منظور شدہ قریبی رشتہ داروں کے لیے ہی کیے جاتے ہیں، اس لیے ملزمان ڈونر کے نمونے وصول کنندہ کے رشتہ داروں کے ناموں پر جعلی ریفرل خطوط کے ساتھ پیش کرتے تھے تاکہ معاملہ رشتہ دار ڈونر کا لگے۔

وصول کنندگان کا ڈائیلاسس اسلام آباد میں موجود ایک اسپتال کے ایک ٹیکنیشن کے ذریعے کرایا جاتا تھا، پیوند کاری کے بعد مریض کی حالت بگڑنے پر اس کو ایک اور ہسپتال میں بھیج دیا جاتا تھا، گروہ کا جال ایجنٹوں، ایک ڈاکٹر، نرس، اینستھیزیا فراہم کرنے والے، ادویات سپلائی کرنے والے، لیبارٹری ٹیسٹ کروانے والے اور ڈائیلاسس فراہم کرنے والے افراد پر مشتمل تھا، گروہ پی ڈبلیو ڈی سوسائٹی اور نجی ہاؤسنگ سوسائٹی کے فیز 4 اور پشاور میں نجی مقامات پر کام کرتا رہا ہے۔

اسی طرح تحقیقات کے دروان معلوم ہوا کہ ملزمان نے غیر قانونی گردے کی پیوندکاری سے حاصل ہونے والی ناجائز آمدن سے اسلام آباد میں قیمتی جائیدادیں خریدیں، ایک ملزم نے میڈیا ٹاؤن، اسلام آباد میں 10 مرلہ مکان 6 کروڑ 25 لاکھ روپے میں خریدا، جبکہ دوسرے ملزم نے جناح گارڈن فیز 1، اسلام آباد میں 5 مرلہ مکان 2 کروڑ 50 لاکھ روپے میں خریدا دونوں جائیدادوں کی منتقلی ایف آئی اے ایکٹ 1974 کی دفعہ 5 کے تحت نوٹس جاری کر کے منجمد کر دی گئی ہے۔تلاشی کے دوران ملزمان سے 10 لاکھ روپے نقد برآمد ہوئے اور تین گاڑیاں ایک چنگان اوشان X7 اور دو ہونڈا سِوک بھی ضبط کی گئیں اور گاڑیوں کی منتقلی اور رجسٹریشن متعلقہ ایکسائز دفتر کے ذریعے منجمد کر دی گئی ہے۔

دیگر نامزد ملزمان کی گرفتاری کے لیے مختلف مقامات پر چھاپے جاری ہیں اور تفتیش آگے بڑھائی جا رہی ہے۔ حکام کا کہنا تھاکہ ملزمان کی خلاف مقدمہ ٹرانسپلانٹیشن آف ہیومن آرگنز اینڈ ٹشوز ایکٹ 2010 کی دفعات 9، 10 اور 11(a)(ii) زیر دفعہ 34، 419 اور 109 PPC درج کیا گیا ہے۔
ریاست کی جانب سے سستی اور معیارِ زندگی کے مطابق طبی سہولیات کی عدم فراہمی کے باعث "بلیک مارکیٹ" جنم لیتی ہے۔ جب قانونی طریقے سے گردوں کی پیوند کاری کا نظام شفاف اور غریبوں کے لیے قابلِ رسائی نہ ہو، تو سرمائے کی طاقت غیر قانونی اور خطرناک راستے تلاش کر لیتی ہے۔