شعور نیوز( انٹرنیشنل ڈیسک): مشرقِ وسطیٰ میں بڑھتی ہوئی کشیدگی کے دوران، سعودی عرب نے ڈرون حملے کے بعد تیل کی ایک اہم پائپ لائن بند کر دی ہے۔امریکی صدر ٹرمپ نے جب سے ایران کو اس حملے کے پیچھے قرار دیا ، تب سے اس معاملے کو عالمی استعماری ایجنڈے کے تحت دیکھاجانا ضروری ہے ۔ امریکہ اور ایران کے درمیان کشیدگی ساتویں مہینے میں داخل ہو چکی ہے۔امریکہ اپنی ایران جنگ میں اکیلے پن کو دور کرنے کے لیے بے تاب ہے ، قابض اسرائیل کے لیے بھی یہی فائدہ مند ہے کہ مسلم ممالک کو آپس میں لڑایا جائے ۔

حملے کےبعد عراق نے اعتراف کیا ہے کہ پائپ لائن پر ہونے والا ڈرون حملہ اس کے ایک صوبے سے کیا گیا تھا۔عراق نے ایک فوجی کمانڈر کو برطرف کر کے مزید تحقیقات بھی شروع کی ہیں۔ سعودی عرب اس سے قبل عراق میں موجود ایران کی حمایت یافتہ ملیشیا پر اپنی تیل کی تنصیبات کو نشانہ بنانے کا الزام عائد کر چکا ہے۔جنگی صورتحال میں چیزیں دو اور دو چار کی طرح عیاں نہیں ہوتیں عراق پر امریکی قبضہ ایک حقیقت ہے اور آج بھی اسکے فوجی اڈے وہاں قائم ہیں ، پراکسی لڑنے میں امریکہ بھی مہارت رکھتا ہے۔

1200 کلومیٹر (745 میل) طویل یہ سعودی عرب کی یہ پائپ لائن آبنائے ہرمز سے گزرے بغیر تیل کی ترسیل ممکن بناتی ہے۔اس کے بعد عالمی منڈی میں تیل کی قیمت پر بھی فوری چڑھاؤ شروع ہوا ہے۔سعودی وزارتِ خارجہ نے بتایا کہ ڈرون حملے کے نتیجے میں کچھ افراد زخمی ہوئے اور تنصیبات کو نقصان پہنچا، جس کا تخمینہ لگانے کا عمل ابھی جاری ہے۔

دوسری جانب یمن میں ایران کی حمایت یافتہ حوثی باغیوں کی پیش قدمی بھی خطرناک ہے۔ یمن میں سعودی حمایت یافتہ حکومتی افواج حوثی جنگجوؤں سے لڑ رہی ہے ۔ یہ کارروائی حوثیوں کی جانب سے بحیرہ احمر کے پورے ساحلی علاقے پر قبضہ کرنے کے ایک دن بعد کی گئی۔

تجارتی انٹیلی جنس فرم Kpler کے خام تیل کے تجزیہ کاروں کے سربراہ ہمایوں فلکشاہی کے مطابق، اس پائپ لائن کی بندش سے عالمی مارکیٹ میں روزانہ 36 لاکھ بیرل تیل کی سپلائی کم ہو سکتی ہے، جو کہ عالمی طلب کا تقریباً 3.6 فیصد بنتا ہے۔اس حملے کے بعد عالمی منڈی میں خام تیل (Brent Crude) کی قیمت 108 سے 109 ڈالر فی بیرل تک جا پہنچی ہے، جبکہ امریکہ میں ڈیزل کی قیمت تاریخ کی بلند ترین سطح (6 ڈالر فی گیلن) کو عبور کر گئی ہے۔