شعور نیوز( انٹرنیشنل ڈیسک):عالمی سیاست کو بزور طاقت کنٹرول کرنے والےامریکی صدر ڈونلڈ ٹرمپ نے سعودی عرب کو کہہ دیا ہے کہ وہ یمن کے حوثیوں کے خلاف فوجی کارروائی میں اسرائیل کی ممکنہ مدد قبول کرلے۔ اس انکشاف کے بعد سعودی عرب اور اسرائیل کے درمیان اس حوالے سے کسی نئے معاہدے یا مذاکرات کا اعلان نہیں کیا گیا۔

امریکی نشریاتی ادارے سی این این کے مطابق وائٹ ہاؤس کے باہر صحافیوں سے گفتگو کے دوران صدر ٹرمپ سے پوچھا گیا کہ کیا سعودی عرب کو حوثیوں کے خلاف اسرائیلی مدد قبول کرنی چاہیے؟ اس پر انہوں نے جواب دیا کہ اس معاملے میں اسرائیل سعودی عرب کے لیے مددگار ثابت ہو سکتا ہے۔

ٹرمپ نے سعودی عرب کے ساتھ اپنے تعلقات کو مثبت قرار دیتے ہوئے کہا کہ سعودی عرب اور اسرائیل کے درمیان تعلقات معمول پر لانے کا معاملہ پہلے کے مقابلے میں زیادہ مضبوط دکھائی دیتا ہے، تاہم انہوں نے کسی نئی پیش رفت یا باضابطہ معاہدے کی تصدیق نہیں کی۔

یوں اس پورے کھیل میں قبول اسرائیل کی مہم کو پس پردہ جاری رکھنے اور اُس کے لیے مہرے سیٹ کرنے کا واضح اشارہ ملتا ہے۔

دوسری جانب اس سے قبل اسرائیلی اخبار ہاریتز نے 13 اکتوبر کی ایک رپورٹ میں دعویٰ کیا تھا کہ سعودی ولی عہد شہزادہ محمد بن سلمان نے حوثیوں کے خلاف اسرائیلی فوجی تعاون میں دلچسپی ظاہر نہیں کی۔ رپورٹ کے مطابق انہیں خدشہ تھا کہ اسرائیل کے ساتھ کھلے فوجی تعاون پر سعودی عوام کا ردعمل منفی ہو سکتا ہے۔

یاد رہے کہ ابراہام معاہدوں کے تحت کئی عرب ممالک نے امریکا کی ثالثی میں اسرائیل کے ساتھ سفارتی تعلقات قائم کیے تھے، تاہم سعودی عرب نے اب تک اس حوالے سے کوئی باضابطہ قدم نہیں اٹھایا۔

دوسری جانب یمن کے شہر عدن کے ہوائی اڈے کے قریب دو میزائل گرنے کی اطلاع ہے جبکہ حوثیوں نے حملے کی ذمہ داری قبول کرتے ہوئے کہا ہے کہ ان کا ہدف سعودی فوجی کمانڈ سینٹر تھا۔ایران نے بھی سعودی عرب پر یمن کے حوثیوں کے حالیہ حملوں میں اپنے کسی بھی قسم کے کردار کی تردید کی ہے۔سعودی عرب کی قیادت میں قائم اتحاد نے دعویٰ کیا ہے کہ اس نے ینبع کی جانب آنے والا بیلسٹک میزائل، بحیرہ احمر میں دو کروز میزائل اور ریاض سمیت جنوبی علاقوں میں تین ڈرونز روک کر تباہ کردیے۔

امریکہ کا سعودی عرب سے اربوں ڈالر لیکر بھی اُس کی مدد کو نہ آنا اور قابض اسرائیل سے تعلق بنانے کی جانب متوجہ کرنا کئی چیزوں کی جانب اشارہ کرتا ہے۔