شعور نیوز( ویب ڈیسک): پاکستان میں صوبہ خیبرپختونخوا کے دارالحکومت پشاور کی پولیس نے دعویٰ کیا ہے کہ 2خواتین کے ساتھ جنسی زیادتی کے جرم میں گرفتار 4ملزمان جمعرات کی شب نامعلوم افراد کی فائرنگ سے ہلاک ہو گئے ہیں۔ اس واقعے کی اطلاع کے بعد سوشل میڈیا صارفین نے پولیس کو خراج تحسین اور شکریہ سمیت اچھے پیغامات بھیجنا شروع کر دیئے ہیں۔ پولیس کا موقف یہی ہے کہ نا معلوم افراد نے قتل کیا ہے ، لیکن عوام بغیر کچھ اشارہ لیے دیئے چاروں ملزمان کے مرنے پر پولیس کی تعریفیں کر رہی ہے۔

عوام حالات دیکھ کر ایسا ہی سمجھتے ہیں کہ اس نوعیت کے ملزمان کو انگریز کے کورٹ نظام میں لانا دراصل ان کو ریلیف دینا ہے۔ یہاں سے کبھی بھی کوئی انصاف نہیں ملتا ، ان معاملات میں تنفیذ سزا جلد از جلد کی خواہش ہوجاتی ہیں۔

تھانہ رحمان بابا کی حدود میں گینگ ریپ کے مقدمے میں نامزد چاروں ملزمان کو مقامی کورٹ نے جسمانی ریمانڈ پر دیا تھا۔پولیس کے مطابق واقعے کی مزید تحقیقات جاری ہیں، جبکہ ہلاکتوں اور فائرنگ سے متعلق تمام پہلوؤں کی تصدیق کی جا رہی ہے۔

پشاور پولیس کا دعویٰ ہے کہ بدھ 9 ستمبر کو گرفتار کیے گئے چار ملزمان کو جمعرات 10 ستمبر کی شب جائے وقوعہ کی نشاندہی کے لیے جایا جا رہا تھا کہ اچانک نامعلوم ملزمان نے فائرنگ کی جس سے چاروں ملزمان ہلاک ہو گئے۔پولیس کے مطابق اس موقع پر موجود پولیس اہلکار محفوظ رہے ہیں۔

پشاور کے تھانہ رحمان بابا کی حدود میں مبینہ گینگ ریپ کا یہ واقعہ چھ ستمبر کی شب پیش آیا تھا۔ اس کیس کی ایف آئی آر میں مدعی مقدمہ نے دعویٰ کیا تھا کہ اِن ملزمان نے مبینہ طور پر اُن کے گھر زبردستی داخل ہو کر اُن کی دو بیویوں کو باری باری مبینہ ریپ کا نشانہ بنایا جبکہ اُن کی ایک کمسن بیٹی کے ساتھ نازیبا حرکات کی اور فرار ہو گئے۔

مقدمے کے اندراج کے اگلے روز پشاور پولیس نے چاروں ملوث ملزمان کی گرفتاری کا دعویٰ کیا تھا۔ پولیس نے ہلاک ہونے والے چار ملزمان کی شناخت عامر، جلال عرف راجہ، چچے اور امداس کے ناموں سے کی ہے۔بی بی سی کے مطابق اس سے قبل دسمبر 2025 میں سمیع اللہ نامی شخص، جن کو اپنی ہی بھتیجی کے ریپ کے الزام میں گرفتار کیا گیا تھا، بھی پولیس تحویل میں ہوتے ہوئے مشکوک انداز میں ہلاک ہوئے تھے۔

سینیئر سپرنٹنڈنٹ پولیس فرحان خان نے ایک پریس کانفرنس کے دوران بتایا تھا کہ گرفتار ملزمان باقاعدہ منصوبہ بندی کے تحت گھر میں داخل ہوئے تھے۔فرحان خان کا کہنا تھا کہ یہ ایک سنگین واقعہ ہے کیونکہ پشتون معاشرے میں اس طرح گھر میں گھس کر، اسلحے کے زور پر اجتماعی ریپ کا تصور بھی نہیں کیا جا سکتا تھا۔

فرحان خان نے بتایا تھا کہ پولیس نے چار خصوصی ٹیمیں تشکیل دے کر تکنیکی ذرائع اور سیف سٹی کیمروں کی مدد سے چاروں مشتبہ افراد کو گرفتار کیا تھا۔