شعور نیوز( انٹرنیشنل ڈیسک): جاپان کی وزارتِ صحت، محنت اور بہبود نے بتایا ہے کہ ملک میں سو سال یا اس سے زائد عمر کے افراد کی تعداد پہلی بار ایک لاکھ سے تجاوز کر گئی ہے ۔یہ تعداد اب 107,677 تک پہنچ چکی ہے، جو گزشتہ سال کے مقابلے میں تقریباً آٹھ ہزار زیادہ ہے۔ مسلسل چھپنوے، نہیں بلکہ چھپن برسوں سے یہ تعداد ہر سال بڑھ رہی ہے۔

ان میں سے 88 فیصد یعنی 94,298 عورتیں ہیں۔ کیوٹو کی 114 سالہ فویو کیشیموتو اور کوماموتو کے 112 سالہ ہیکارو کاتو اس وقت جاپان کے معمر ترین شہری قرار پائے ہیں۔

وزیرِ صحت کینیچیرو یوینو نے اس اعداد و شمار کو خوش کن انداز میں پیش کرتے ہوئے کہا کہ "میں بہت خوش ہوں کہ اتنے لوگ اتنی لمبی عمر تک متحرک اور صحت مند رہ رہے ہیں۔" مگر سوال یہ ہے: کیا لمبی عمر واقعی نعمت ہے، اگر وہ تنہائی، بے مقصدیت اور معاشی بوجھ کے سائے میں گزرے؟

عالمی بینک کے مطابق 2024 میں جاپان میں اوسط متوقع عمر 84 برس تھی، جبکہ امریکہ میں یہ 79 برس ہے۔ سائنسدان اس طویل عمری کا سہرا صحت بخش غذا اور جدید طبی نظام کو دیتے ہیں، اور "اکیگائی" کے فلسفے کا ذکر بھی کرتے ہیں — یعنی زندگی میں معنی اور خوشی تلاش کرنے کا رجحان۔ لیکن یہ فلسفہ اس تلخ حقیقت پر پردہ نہیں ڈال سکتا کہ جاپان کے لاکھوں بزرگ آج بھی خونی رشتوں سے کٹے ہوئے، تنہا کمروں اور اولڈ ہومز میں زندگی کے آخری سال گزار رہے ہیں — ایسا معاشرہ جہاں خاندانی نظام بکھر چکا ہے اور محنت کی معیشت نے رشتوں کی جگہ لے لی ہے۔

یہی وہ نکتہ ہے جہاں یہ کہانی محض "جاپان کی کامیابی" کی کہانی نہیں رہتی۔ ناقدین کا کہنا ہے کہ یہ دراصل عالمی سرمایہ دارانہ نظام کے اس بحران کی علامت ہے جس میں انسان کی قدر صرف اس وقت تک ہے جب تک وہ پیداواری قوت ہے۔ جیسے ہی کوئی بوڑھا ہوتا ہے، وہ ریاست اور معیشت کے لیے "بوجھ" بن جاتا ہے — دیکھ بھال کے اخراجات بڑھتے ہیں، افرادی قوت سکڑتی ہے، اور نظام اسے ایک "مسئلہ" کے طور پر دیکھنے لگتا ہے، ایک انسان کے طور پر نہیں۔

جاپان کی کل آبادی 12 کروڑ 30 لاکھ ہے، اور یہ مسلسل کم ہو رہی ہے کیونکہ شرحِ پیدائش تاریخ کی کم ترین سطح پر پہنچ چکی ہے۔ حکومت نے ہنرمند اور مزدور غیر ملکیوں کے لیے دروازے کھولے، مگر حالیہ برسوں میں غیرملکی مخالف جذبات میں اضافے کے باعث ویزا شرائط کو مزید سخت کر دیا گیا ہے — گویا مسئلے کا حل تلاش کرنے کے بجائے دروازے مزید بند کیے جا رہے ہیں۔

سوال یہ ہے کہ یہ ایک لاکھ سے زائد بزرگ افراد کس چیز کی نشاندہی کر رہے ہیں؟ کیا یہ محض ایک ملک کی طبی کامیابی ہے، یا ایک ایسے عالمی نظام کی تصویر جہاں انسان زیادہ جیتا تو ہے، مگر اکیلا، بے سہارا اور معاشی حساب کتاب کی میز پر ایک عدد بن کر رہ جاتا ہے؟