شعور نیوز( انٹرنیشنل ڈیسک):برطانیہ کی کاؤنٹی کارن وال میں ٹرورو شہر کے قریب کوینچ ویل روڈ پر قائم 'کارنوال اسلامک کمیونٹی سینٹر' پر 17 ستمبر کی رات حملہ کیا گیا۔ سی سی ٹی وی کے مطابق، گاڑی کی ٹکر سے سینٹر کے دھاتی دروازوں کو نقصان پہنچایاگیا، جبکہ عمارت کے اندر اور بیرونی دیواروں پر کوئی نامعلوم مادہ (احتمالاً تیل) پھینکا گیا۔ پولیس نے واقعے کو 'نسلی و مذہبی تعصب پر مبنی مجرمانہ اقدام' (Racially Aggravated Criminal Damage) کے طور پر درج کرتے ہوئے علاقے میں گشت بڑھانے اور عوام سے معلومات کی اپیل کی ہے۔ اسلامک سینٹر کے امام حسن کیلک کے مطابق اس واقعے نے مقامی مسلم کمیونٹی میں شدید صدمے اور تشویش کی لہر دوڑا دی ہے، تاہم سینٹر کو عبادت کے لیے کھلا رکھا گیا ہے۔ واقعے کے بعد کارنوال کی مقامی سیاسی جماعت 'میبیون کیرنو' نے حملے کی مذمت کرتے ہوئے مسلم کمیونٹی کے ساتھ یکجہتی کا اظہار کیا ہے۔ مختلف سماجی طبقوں کی جانب سے بھی اس واقعے کو یکجہتی کے روایتی بیانیے کے تحت دیکھا جا رہا ہے اور کمیونٹی کو متحد رہنے کی تلقین کی جا رہی ہے۔

ایک جانب یہود مخالفت کے جذبات مغربی ممالک میں پھیل رہے ہیں تو دوسری جانب عیسائی انتہا پسندوں یعنی رائٹ ونگ کی جانب سے اسلاموفوبیا اور اقلیتوں کے خلاف بڑھتے ہوئے نفرت انگیز واقعات کے باوجود، پولیس اور مقامی انتظامیہ حساس مقامات کو پہلے سے تحفظ فراہم کرنے میں ناکام نظر آتی ہے۔مستقل واقعات بتاتے ہیں کہ زبانی مذمتوں اور عارضی گشت سے اقلیتوں میں تحفظ کا احساس بحال نہیں کیا جا سکتا۔

مسئلہ اس نظام سے پیدا شدہ اقدار کا ہے ، سرمایہ دارانہ لبرل ازم نے جن نظریات کو ٹھونسا ہے اس کے نتیجے میں ایسے مسائل کا سامنے آنا لازمی ہے۔