شعور نیوز(انٹرنیشنل ڈیسک):امریکی صدر ڈونلڈ ٹرمپ نے نیو یارک میں ایران و امریکہ کے وفد کے درمیان ہونے والی بات چیت کو ’بہت اچھا‘ قرار دیا ہے۔اس اعلان کے بعد متوقع جنگ بندی کی منظر کشی کرتے ہوئے عالمی منڈی میں خام تیل کی قیمتوں میں کمی ریکارڈ کی گئی۔رپورٹ کے مطابق ایشیائی کاروبار کے ابتدائی اوقات میں عالمی معیار کے برینٹ خام تیل کی قیمت کم ہو کر 98.91 ڈالر فی بیرل ہوگئی، جبکہ امریکی خام تیل ویسٹ ٹیکساس انٹرمیڈیٹ 89.93 ڈالر فی بیرل پر آگیا۔ دونوں قیمتیں حالیہ عرصے میں کئی مرتبہ عبور کیے گئے 100 ڈالر کی سطح سے نیچے آگئیں۔

قیمتوں میں کمی کی بڑی وجہ امریکا اور ایران کے درمیان سفارتی رابطوں سے پیدا ہونے والی یہ توقع ہے کہ دونوں ممالک کے درمیان جاری تنازع کو مذاکرات کے ذریعے کم کرنے یا کسی معاہدے کی طرف بڑھنے کی کوشش کامیاب ہوسکتی ہے۔ اے ایف پی کے مطابق مارکیٹ نے ٹرمپ کے ایران سے متعلق مثبت مذاکراتی بیان کو اہمیت دی۔
ایرانی سرکاری میڈیا کے مطابق وزیر خارجہ عباس عراقچی نے اقوام متحدہ کی جنرل اسمبلی کے موقع پر امریکی خصوصی نمائندے اسٹیو وٹکوف سے ملاقات میں تہران کا مؤقف پہنچایا۔

ایرانی میڈیا کے مطابق ہرمز کھولنے کی شرائط میں امریکی بحری ناکہ بندی فوری ختم کرنا، ایران کے منجمد اثاثے فوری طور پر جاری کرنا اور تمام ’مزاحمتی محاذوں‘ پر جنگ ختم کرنا شامل ہے۔

ایرانی وزارت خارجہ کے ترجمان اسماعیل بقائی نے بھی تصدیق کی ہے کہ نیویارک میں قطر کی ثالثی کے ذریعے امریکا تک ایران کا پیغام پہنچایا گیا۔ ان کے مطابق تہران جنگ کے تمام محاذوں پر خاتمہ، امریکی کارروائیوں کا رکنا، بحری ناکہ بندی ختم کرنا، اقتصادی جنگ کا خاتمہ اور ایرانی اثاثوں کی واپسی چاہتا ہے۔

ایران پہلے ہی عندیہ دے چکا ہے کہ امریکی فوجی دباؤ اور ناکہ بندی میں کمی کی صورت میں وہ تقریباً ایک ہفتے کے اندر آبنائے کو دوبارہ کھول سکتا ہے۔

دوسری جانب امریکی صدر ڈونلڈ ٹرمپ نے نیویارک میں جاری رابطوں کو مثبت قرار دیتے ہوئے کہا ہے کہ امریکا اور ایران کے درمیان بات چیت جاری ہے اور کسی معاہدے تک پہنچنے کی امید موجود ہے۔ تاہم واشنگٹن اور تہران کے درمیان بنیادی شرائط پر اختلافات بدستور موجود ہیں۔

آبنائے ہرمز سے متعلق معاملہ عالمی منڈی کیلئے بھی اہم ہے کیونکہ یہ خلیج فارس سے تیل اور دیگر توانائی مصنوعات کی ترسیل کا اہم بحری راستہ ہے۔ اسی وجہ سے اس کی بندش اور دوبارہ کھولنے سے متعلق ہر پیش رفت عالمی تیل مارکیٹ اور علاقائی تجارت پر اثر ڈال سکتی ہے۔

عالمی توانائی مارکیٹ میں تیل کی قیمتیں مشرقِ وسطیٰ کی صورتحال، آبنائے ہرمز میں جہازرانی اور امریکا ایران تنازع سے متعلق ہر نئی پیش رفت پر تیزی سے ردعمل دے رہی ہیں۔ رائٹرز کے مطابق حالیہ دنوں میں ہرمز کے ذریعے تیل کی ترسیل میں بہتری اور سفارتی رابطوں کی اطلاعات نے بھی قیمتوں پر دباؤ کم کیا ہے۔
قیمتوں کا مسئلہ امریکہ کے اندر بھی مسائل پیدا کر رہا ہے اور جنگی حالات مڈ ٹرم الیکشن میں ٹرمپ کے لیے ناکامی کا سبب بن سکتے ہیں۔