شعور نیوز (انٹرنیشنل ڈیسک):بھارتی ریاست مدھیا پردیش کے ضلع گونا کے قصبے جامنیر میں ہندوتوا کی شدت پسند تنظیم بجرنگ دل کے کارندوں نے ایک بار پھر انسانیت اور مذہبی رواداری کی دھجیاں اڑا دیں۔ سامان کی منتقلی کے دوران راستے میں بیٹھی گائے کو مبینہ طور پر پاؤں سے ہٹانے کے معمولی واقعہ پر ہندوتوا کارندوں نے شٹرنگ کا کام کرنے والے معمر مسلمان شہری جمیل الدین کو گھیر لیا۔ شدت پسندوں نے بزرگ کو عوامی جگہ پر گائے کے سامنے سجدہ ریز ہونے، زمین پر ناک رگڑنے اور اس کے پاؤں چھو کر معافی مانگنے پر مجبور کیا۔ واقعے کی ویڈیو وائرل ہونے کے بعد سوشل میڈیا پر شدید غم و غصے کی لہر دوڑ گئی۔ یہ واقعہ کسی تنہا یا حادثاتی برتاؤ کا نتیجہ نہیں بلکہ بھارت میں مسلمانوں کی منظم تذلیل اور خوف کی فضا قائم کرنے کی مسلسل مہم کا تسلسل ہے۔ بھارت میں مسلمانوں کو گائے کا گوشت بیچنے یا گائےکی کسی قسم کی عدم تعظیم کے محض شک کی بنیاد پر تشدد کر کے قتل کیا جا چکا ہے۔مدھیا پردیش اور اتراکھنڈ جیسی ریاستوں میں مسلم تاجروں اور مزدوروں کا معاشی بائیکاٹ کرنے اور انہیں ہندو علاقوں سے نکالنے کی کھلم کھلا دھمکیاں دی جاتی رہی ہیں۔بھارتی آئین کا آرٹیکل 21 اور 25 ہر شہری کو انسانی وقار اور مذہبی آزادی کی ضمانت دیتا ہے، مگر بجرنگ دل، وسوا ہندو پریشد اور دیگر ہندوتوا تنظیموں کو حاصل ریاستی سرپرستی نے آئین کو بے اثر کر دیا ہے۔مسلم اقلیت کو برابری کا شہری سمجھنے کے بجائے ان کی روزمرہ کی زندگی کو غیر محفوظ بنا دیا گیا ہے۔ بزرگ شہریوں سے ان کی ایمانی اور انسانی حرمت چھین کر جانوروں کے آگے ناک رگڑوانا اس فاشسٹ سوچ کو ظاہر کرتا ہے جس کا مقصد اقلیتوں میں مسلسل خوف اور محکومی کا احساس پیدا کرنا ہے۔ان واقعات پر پولیس کا رویہ اکثریتی غنڈہ گردی کے سامنے بے بس یا پھر بجرنگ دل جیسے شدت پسند گروہوں کا حامی نظر آتا ہے، جس سے قانون کی حکمرانی کا جنازہ نکل چکا ہے۔