شعور نیوز( انٹرنیشنل ڈیسک):آذربائیجان کے اسکولوں میں حجاب پہننے سے متعلق نئے حکومتی قانون کے خلاف احتجاج کا دائرہ ترکیہ ، ایران تک پھیل گیا ہے۔ استنبول میں آذربائیجان کے قونصل خانے کے باہر احتجاجی مظاہرہ ، ایران سے بھی احتجاج کی خبریں آئی ہیں ۔ آذربائیجان میں بھی طالبات، اساتذہ اور دیگر شہری اس فیصلے پر احتجاج کر رہے ہیں، جبکہ سوشل میڈیا پر بھی اس کے خلاف مہم جاری ہے۔

آذربائیجان کے مفتیِ اعظم اللہ شکور پاشازادہ نے کہا ہے کہ آذربائیجان میں حجاب پر عمومی پابندی نہیں ہے۔ صرف اسکولوں میں یونیفارم کے ضابطے کی وجہ سے ہیڈ اسکارف پہننے کی اجازت نہیں۔ آذربائیجان میں ریاست، مذہب سے الگ ہے اور اسکول بھی مذہب سے الگ ہیں۔ اسی لیے ہمیں ان قوانین کی پابندی کرنا ہوگی۔

آذربائیجان کی حکومت نے ایسے ہر کپڑے پر اعتراض کیا ہے جسے حکام کے مطابق ملک کے سیکولر اصولوں کے منافی سمجھا جاتا ہے، یعنی اُس کے پیچھے خدا کا حکم موجود ہو۔

قوانین کے نفاذ کے بعد اسکولوں میں حجاب پہننے والی طالبات اور اساتذہ کو کلاسوں میں داخل ہونے سے روکنے کی بے شمار وڈیوز ، خبریں سامنے آئی ہیں۔

سوشل میڈیا پر بعض ویڈیوز میں حجاب پہننے والی طالبات اور انکی اساتذہ کو روتے ہوئے دیکھا جا سکتا ہے۔ اطلاعات کے مطابق، بعض خواتین اساتذہ کو حجاب پہننے کی وجہ سے اسکول میں داخل ہونے سے روک دیا گیا تھا۔ اس فیصلے کے خلاف بولنے اور سرکاری کام میں مداخلت کے عنوان سے اب تک کوئی 37 افراد کی گرفتاری ہو چکی ہے جبکہ کچھ خواتین اساتذہ کو نوکری سے بھی نکالنے کی اطلاعات ہیں۔

آذربائیجان کی تقریباً 90فیصد آبادی اہل تشیع ہے جو طویل کمیونسٹ مظالم کے بعد عملاً ایک لادین سیکولر لبرل معاشرت میں ٹھونسی جا چکی ہے ،اسکے باوجود چونکہ اسلام ایک مکمل نظام حیات ہے ، اس لیے کہیں نہ کہیں سے وہ داخل ہو ہی جاتا ہے ، خواہ وہ سرپر کپڑے کی صورت ہی کیوں نہ ہو۔

مقامی میڈیا رپورٹس کے مطابق، کم از کم دو اسکولوں کے طلبہ نے حجاب سے متعلق ضوابط کے خلاف احتجاج کرتے ہوئے کلاسوں کا بائیکاٹ بھی کیا۔ ان واقعات کے بعد یہ معاملہ تعلیمی اداروں کے لباس کے قواعد سے آگے بڑھ کر مذہبی آزادی اور انفرادی حقوق سے متعلق بحث کا حصہ بن گیا ہے۔
یہاں سیکولر ازم کے تضادات یوں سامنے آتے ہیں کہ جب وہ ’ہیومن رائٹس‘ کے دائرے میں کسی ہیومن خاتون کے ذاتی انتخاب پر روڑے اٹکاتی ہے۔سیکولر ازم بنیادی حقوق کے وعدے کرکے دین کو باہر کردیتا ہے لیکن اسکے بعد بنیادی حق کے تحت اگر کوئی سر پر کپڑا رکھے تو وہ اس کو زبردستی ننگا کراتا ہے ۔یہاں بنیادی حقوق مارے جاتے ہیں۔ یہ تضاد بتاتاہے کہ یہ سارے نظریات باطل و شیطانی ہیں۔

آذربائیجان کے صدر الہام علیئیف نے اپنی جماعت کے ایک اجلاس میں ترکیہ کا نام لیے بغیر کہا کہ آزر بائیجان کے طرزِ زندگی میں اُن کو مداخلت نہیں کی جانی چاہیے۔

ان کے اس بیان کو ترکیہ میں آذربائیجان کے قونصل خانے کے باہر ہونے والے احتجاج کے تناظر میں دیکھا جا رہا ہے، تاہم اس بیان میں ترکیہ کا براہِ راست ذکر نہیں کیا گیا۔

دوسری جانب ترکیہ کے صدر رجب طیب اردوان نے اقوام متحدہ کی جنرل اسمبلی سے خطاب میں دنیا بھر میں مسلم خواتین کو درپیش امتیازی سلوک کا عمومی طور پر ذکر کیا تھا۔

اس لیے فی الحال دونوں ممالک کے درمیان اختلافات کی نوعیت اور سفارتی سطح پر اس کے ممکنہ اثرات کے بارے میں حتمی نتیجہ اخذ کرنا قبل از وقت ہوگا۔