شعورنیوز( ویب ڈیسک):وزیراعظم شہباز شریف کی خصوصی ریلیف اسکیم کے تحت رعایتی پیٹرول حاصل کرنے کے لیے حکومت کی جانب سے طریقہ کار جاری کردیا گیا ہے، جس کے تحت مخصوص شہریوں کو پیٹرول پر فی لیٹر100 روپے کی رعایت دی جائے گی۔ شہری موبائل فون سے ایس ایم ایس کے ذریعے رجسٹریشن کراسکیں گے اور تصدیق کے بعد مقررہ کوٹے کے مطابق سستا پیٹرول حاصل کرسکیں گے۔اتوار کو وفاقی حکومت نے موٹرسائیکل، رکشہ، چنگچی اور 800 سی سی تک کی گاڑیوں کے لیے پیٹرول پر 100 روپے فی لیٹر رعایت دینے کا جدید ڈیجیٹل سسٹم فعال کر دیا ہے۔

شہری اب اپنے موبائل فون سے 9771 پر 1.25 روپیہ کے ایک سادہ ایس ایم ایس کے ذریعے اس سکیم میں رجسٹریشن کروا کر شفاف اور خودکار طریقے سے سستا پیٹرول حاصل کر سکتے ہیں۔ عوام کو سہولت فراہم کرنے کے لیے یہ جدید نظام وزارتِ آئی ٹی و ٹیلی کام، نادرا، صوبائی محکموں اور ٹیلی کام آپریٹرز کے باہمی اشتراک سے تیار کیا گیا ہے۔

وزیرِ اعظم شہباز شریف کی خصوصی ہدایت پر شروع کی گئی اس سکیم کا بنیادی مقصد معاشی مشکلات کے شکار محنت کش طبقے اور عام شہریوں کو براہِ راست ریلیف فراہم کرنا ہے۔ حکومت کی کوشش ہے کہ جدید ٹیکنالوجی کی مدد سے اس بات کو یقینی بنایا جائے کہ سبسڈی کسی رکاوٹ کے بغیر صرف حقداروں تک پہنچے۔

اس خصوصی اسکیم کے تحت موٹرسائیکل اور چنگچی رکشہ مالکان ماہانہ 20 لیٹر جب کہ 800 سی سی تک انجن کی صلاحیت رکھنے والی گاڑیوں کے مالکان ماہانہ 30 لیٹر تک سستا پیٹرول حاصل کرنے کے اہل ہوں گے۔ موٹر سائیکل ، رکشہ کی رجسٹریشن مالک کے نام پر ہونا لازمی نہیں رکھی گئی تاہم کار کے لیے ایس ایم ایس رجسٹریشن کرانے والے کے نام پر گاڑی ہونا لازمی رکھا گیاہے۔

حکومت نے کسی بھی قسم کی خرد برد یا غلطی کو روکنے کے لیے گاڑیوں کی تصدیق کے عمل کو مکمل طور پر خود کار بنا دیا ہے اور اس مقصد کے لیے صوبائی ٹرانسپورٹ اور ایکسائز محکموں کے ریکارڈ سے گاڑیوں کی تصدیق کی جائے گی۔

اس اسکیم سے فائدہ اٹھانے کے خواہشمند شہریوں کے لیے رجسٹریشن کا طریقہ کار بھی انتہائی آسان رکھا گیا ہے، شہری کو اپنے نام پر رجسٹرڈ موبائل سم سے 9771 پر ایس ایم ایس بھیجنا ہوگا۔

رجسٹریشن کے لیے موبائل فون کے میسج آپشن میں جاکر پہلے انگریزی میں REG لکھنا ہوگا، اس کے بعد اسپیس دے کر بغیر ڈیش کے شناختی کارڈ نمبر درج کرنا ہوگا۔ دوبارہ اسپیس دے کر گاڑی کا رجسٹریشن نمبر بغیر ڈیش اور اسپیس کے لکھنا ہوگا، اس کے بعد اسپیس دے کر صوبے کا کوڈ اور آخر میں اسپیس کے ساتھ گاڑی کی رجسٹریشن کی تاریخ درج کرنا ہوگی۔

میسج میں استعمال ہونے والے صوبوں کے کوڈز اس طرح استعمال کرسکتے ہیں۔ اسلام آباد I، پنجاب P، سندھ S، خیبر پختونخوا (KPK)K، بلوچستان B، آزاد جموں و کشمیر (AJK)A اور گلگت بلتستان (GB)۔

مقررہ فارمیٹ میں تمام معلومات درج کرنے کے بعد یہ ایس ایم ایس 9771 پر بھیجنا ہوگا۔ متعلقہ نظام شہری کے شناختی کارڈ اور گاڑی کی تفصیلات کی تصدیق کرے گا اور کامیاب رجسٹریشن کی صورت میں شہری کو موبائل فون پر تصدیقی پیغام موصول ہوگا۔

رجسٹریشن مکمل ہونے کے بعد سستا پیٹرول حاصل کرنے کے لیے شہری کو پیٹرول پمپ جانے سے پہلے فیول ٹوکن حاصل کرنا ہوگا۔ اس مقصد کے لیے اپنے رجسٹرڈ موبائل نمبر سے TOK لکھ کر 9771 پر ایس ایم ایس بھیجنا ہوگا۔

جوابی پیغام میں شہری کو فیول ٹوکن موصول ہوگا، جسے منتخب شدہ پیٹرول پمپ پر دکھا کر تصدیق کروانا ہوگی۔ تصدیق کے بعد شہری کو مقررہ ماہانہ کوٹے کے مطابق 100 روپے فی لیٹر رعایت پر پیٹرول فراہم کیا جائے گا۔

حکومت کے مطابق اسلام آباد میں اس اسکیم کے تحت رعایتی پیٹرول کی فراہمی پیر 14 ستمبر اور منگل 15 ستمبر کی درمیانی شب سے شروع ہوگی جب کہ ملک کے دیگر علاقوں بشمول آزاد جموں و کشمیر اور گلگت بلتستان میں رعایتی پیٹرول کی فراہمی بدھ 17 ستمبر اور جمعرات 18 ستمبر کی درمیانی شب سے شروع کی جائے گی۔