شعور نیوز( انٹرنیشنل ڈیسک): غزہ پر قابض اسرائیلی مظالم اور حملوں کا سلسلہ 1073 دن سے جاری ہے ۔ کئی ممالک کی جانب سے کرائے گئے جنگبندی معاہدے کی بھی دھجیاں اڑائی جا رہی ہیں۔قابض اسرائیل کی درندگی کو روکنے کی ہمت کوئی ثالث ملک نہیں کر پا رہا۔ غزہ کی پٹی میں جنگ بندی کے معاہدے کی صیہونی خلاف ورزیاں بدستور جاری ہیں۔ قابض اسرائیلی فوج نے امن معاہدے کو پامال کرتے ہوئے فضائی بمباری، توپ خانے کے حملوں اور براہ راست فائرنگ کا سلسلہ جاری رکھا، جس کے نتیجے میں گذشتہ 24 گھنٹوں میں تین فلسطینی شہید اور متعدد زخمی ہو گئے۔مقامی اور طبی ذرائع کے مطابق غزہ کے وسط میں واقع ‘ الیرموك گراؤنڈ’ کے سامنے پناہ گزینوں کے ایک خیمے پر قابض فوج کے ڈرون طیارے نے بمباری کی، جس کے نتیجے میں دو فلسطینی موقع پر ہی شہید اور دس سے زائد زخمی ہو گئے۔ عین اسی طرح غزہ ہی میں ہسپتال الوفا کے گردونواح اور الیرموك کے علاقوں کو بھی فضائی حملوں کا نشانہ بنایا گیا۔

ادھر جنوبی غزہ میں رفح کے علاقے ‘مواصی’ میں قابض فوج کے ٹینکوں اور گاڑیوں کی فائرنگ سے ایک اور فلسطینی شہید ہو گیا، جن کی لاش کو طبی عملے نے ‘مکعبات الصفراء’ کے قریب سے اٹھایا۔

دریں اثنا وسطی غزہ کے علاقے ‘زاویدہ’ میں مصری کمیٹی کے دفتر کے قریب ہونے والے ایک فضائی حملے میں کئی افراد زخمی ہوئے جن میں سے بعض کی حالت تشویشناک بتائی جاتی ہے۔

مغربی خان یونس کے علاقے ‘مواصی’ میں ‘دريم بالاس’ چوک کے قریب ڈرون حملوں کے نتیجے میں پانچ افراد زخمی ہوئے جن میں ایک شخص شدید زخمی ہے۔
غزہ کے جنوب مشرق میں محلہ ‘الزيتون’ کے مشرقی علاقوں پر بھی قابض گاڑیوں کی طرف سے گولہ باری کی گئی، جبکہ نام نہاد ‘یلو لائن’ کے اندر گھروں اور تنصیبات کو دھماکہ خیز مواد سے اڑانے کا مکروہ سلسلہ بھی جاری ہے۔

اکتوبر 2025ء میں طے پانے والے جنگ بندی معاہدے میں درجنوں ممالک شریک ہوئے لیکن قابض دشمن کی ہٹ دھرمی کی وجہ سے یہ خطہ انتہائی نازک صورتحال سے دوچار ہے۔