شعور نیوز(انٹرنیشنل ڈیسک):بدھ 23 ستمبر کے روز غزہ کی پٹی میں اسرائیلی حملوں کے تازہ سلسلے میں چھ فلسطینی شہری شہید اور متعدد دیگر زخمی ہو گئے۔یہ غزہ پر جاری قابض اسرائیلی حملوں کا 1081 واں دن ہے ، ایسے موقع پر جب اقوام متحدہ کا سالانہ اجلاس جاری ہے اور وہاں بھی غزہ مظالم پر کسی نہ کسی شکل میں آواز اٹھائی جا رہی ہے۔
ترک میڈیا کے ایک نامہ نگار نے عینی شاہدین کا حوالہ دیتے ہوئے بتایا کہ ایک حملے میں میزائل استعمال کیا گیا۔

ناصر ہسپتال کے طبی ذرائع نے ترک میڈیا کو بتایا کہ 24 سالہ یحییٰ ابو سامور ان زخموں کی وجہ سے شہید ہوگیا جو منگل کی شام خان یونس کے شمال میں واقع علاقے 'السطار الغربی' میں اسرائیلی فوج کی فائرنگ سے زخمی ہو کر ہسپتال آئے تھے۔

اسرائیلی فوج نے خان یونس کے مشرق میں ان علاقوں میں فلسطینی عمارتوں اور مکانات کو مسمار کیا جہاں وہ تعینات ہیں؛ اس دوران علاقے میں موجود فوجی گاڑیوں سے شدید فائرنگ بھی کی گئی۔شمالی غزہ کی پٹی میں عینی شاہدین نے بتایا کہ اسرائیلی فوج نے غزہ شہر کے مشرقی علاقوں کی جانب توپ خانے کے کئی گولے داغے۔

یاد رہے کہ اسرائیل کی جانب سے گزشتہ اکتوبر سے نافذ العمل جنگ بندی معاہدے کی مسلسل خلاف ورزیاں جاری ہیں۔

غزہ کی وزارت صحت کے تازہ ترین اعداد و شمار کے مطابق، اتوار تک جنگ بندی معاہدے کی خلاف ورزیوں کے نتیجے میں کم از کم 1,402 فلسطینی ہلاک اور 4,881 زخمی ہو چکے ہیں۔

اکتوبر 2023 سے اب تک، اسرائیل نے غزہ میں اپنی نسل کشی کی مہم کے دوران تقریباً 74,000 فلسطینیوں کو ہلاک اور 174,000 سے زائد کو زخمی کیا ہے، جبکہ علاقے کے بنیادی ڈھانچے کا تقریباً 90 فیصد حصہ تباہ کر دیا ہے۔