شعورنیوز( ویب ڈیسک):عالمی ویٹو پاور فرانس کے تباہ حال سرکاری تعلیمی نظام کے خلاف ہائی اسکول طلبہ کا احتجاج شدت اختیار کر گیا ہے، گزشتہ 4 روز سے جاری احتجاج کے دوران طلبہ اور پولیس کے درمیان جھڑپیں ہوئی ہیں۔جھڑپوں میں متعدد افراد زخمی ہو گئے ہیں، مختلف علاقوں میں سرکاری املاک کو نقصان پہنچایا گیا، جب کہ 700سے زیادہ افراد کو گرفتار کر لیا گیا ہے۔اس کے علاوہ 159 افراد کے زخمی ہونے کی اطلاعات ہیں، صورتحال یہاں تک گئی کہ 2 سرکاری اسکولوں کو بھی مشتعل طلبہ نے آگ لگا دی۔احتجاج کے باعث ملک بھر میں 700 سے زیادہ اسکول بند ہیں، فرانس کے وزیر تعلیم کا کہنا ہے کہ طلبہ کی اس تحریک کو غیر طلبہ افراد اپنے مقصد کے لیے استعمال کر رہے ہیں۔

فرانس کی ویٹو پاور اور عالمی سامراجی چوہدراہٹ اس کے منافقانہ کردار کو بے نقاب کرتی ہے، جو باہر دنیا پر تسلط جمانے کے لیے اربوں ڈالر جنگوں پر اڑاتا ہے لیکن اپنے ہی ملک کے بچوں کو بنیادی تعلیمی سہولیات دینے میں مکمل ناکام ہو چکا ہے۔ یہ صورتحال ثابت کرتی ہے کہ استحصالی سرمایہ داری اور عالمی طاقت کا گھمنڈ اندرونی طور پر کسی بھی معاشرے کو اخلاقی اور سماجی دیوالیہ پن کی طرف دھکیل دیتا ہے۔

فرانس کی متعدد ٹریڈ یونینز نے بھی طلبہ کے احتجاج کی حمایت کر دی ہے، طلبہ کا کہنا ہے کہ اسکول کے اوقات بہت طویل، کلاس رومز بہت گرم ہیں اور عملے کے بیشتر ارکان غیر حاضر رہتے ہیں۔ہائی اسکول طلبہ متبادل اساتذہ کی تقرری، وسائل میں اضافے اور تعلیم کے بہتر ماحول کے مطالبے پر ملک گیر احتجاج کر رہے ہیں، بعض مقامات پر یہ احتجاج پرتشدد صورت اختیار کر گیا ہے۔

صدر ایمانوئل میکرون کی حکومت کو کلاس رومز میں تدریسی حالات اور فنڈز کی فراہمی کے خلاف ہونے والے ان مظاہروں پر قابو پانے میں مشکلات کا سامنا ہے، جو بتدریج زیادہ پُرتشدد ہوتے جا رہے ہیں۔مشرقی شہر اسٹراسبرگ کی سڑکوں پر جھڑپوں کے دوران آنسو گیس کے بادل چھائے رہے، جنوبی شہر مارسیلے میں پولیس کی صفوں کو آتش بازی کے پٹاخوں سے نشانہ بنایا گیا، جب کہ مغربی شہر رین میں کچرے کے ڈبوں کو آگ لگائی گئی۔

پیرس کے مضافات میں واقع پینٹین میں مظاہرین نے باڑوں سمیت مختلف اشیا کو آگ لگا دی اور فسادات پر قابو پانے والی پولیس پر پٹاخے پھینکے، جس کے بعد وہ وہاں سے بھاگ گئے۔

حکومت کے ہنگامی اجلاس کے بعد وزیر اعظم کے قریبی ایک ذریعے نے کہا کہ مظاہرے احتجاجی تحریک سے تبدیل ہو کر شہری علاقوں میں پُرتشدد کارروائیوں کی شکل اختیار کر چکے ہیں۔ وزیر انصاف جیرالڈ درماناں نے بھی کہا ہے کہ ان مظاہروں کو ’’بیرونی عناصر‘‘ نے اپنے قبضے میں لے لیا ہے۔