شعور نیوز(ویب ڈیسک):لانڈھی ایکسپورٹ پروسیسنگ زون میں پرانے کپڑوں کی فیکٹری میں لگنے والی آگ کو تیسرے درجے کی قرار دے دیا گیا۔ آگ لگنے کے باعث خاتون سمیت 3 افراد متاثر ہوئے۔دو منزلہ فیکٹری کی عمارت مخدوش ہو چکی ہے ، دراڑیں پڑنے سے مکمل عمارت گرنے کا خدشہ ہے، جبکہ ایک حصہ گر گیا ہے عمارت میں استعمال شدہ کپڑا بڑی تعداد میں موجود ہے۔ آگ پر 16 فائر ٹینڈر، واٹر باوزر اور اسنارکل کی مدد سے قابو پانے کی کوشش کی جا رہی ہے۔ شہر بھر سے فائر ٹینڈرز کو طلب کیا گیا ہے۔ آگ لگنے کی وجہ تاحال معلوم نہیں ہوسکی، فیکٹری میں اس وقت کوئی عملہ بھی موجود نہیں۔

ریسکیو ذرائع کے مطابق دھویں کے باعث فیکٹری میں موجود 3 افراد بے ہوش ہوگئے، جن میں 2 مرد اور ایک خاتون شامل ہیں تاہم تینوں کو فوری طور پر اسپتال منتقل کردیا گیا۔ آگ سے متاثرہ فیکٹری کا ایک حصہ گر گیا۔

کراچی کی عمارتوں میں آگ لگنے کا سلسلہ مستقل جاری ہے، 17 جنوری 2026 کو کراچی کے شاپنگ مال گل پلازہ میں آتشزدگی کا واقعہ پیش آیا جس میں 60 سے زیادہ افراد جان سے گئے تھے۔
امسال فروری اور گذشتہ سال مئی میں ایکسپورٹ پروسیسنگ زون کی دو فیکٹریوں میں بھی بڑی آگ لگ چکی ہے۔ نیو کراچی انڈسٹریل ایریا میں بھی آتش زدگی کے واقعات ہو چکے ہیں۔ بلدیہ فیکٹری اس سلسلے میں سب سے خوفناک واقعہ ہے جس کامعمہ آج تک حل نہ ہوسکا۔بلدیہ میں کیمیکل فیکٹری کی آتش زدگی بھی اہم واقعہ ہے۔ صدر میں ہی مشہور کو آپریٹیو مارکیٹ کی آتش زدگی کا بھی اہم واقعہ ہے ۔فروری 2026 میں ہی صدر کی موبائل مارکیٹ میں آتشزدگی ہوئی ۔نومبر 2023 میں کراچی کے RJ شاپنگ مال میں آگ میں کم از کم 11 افراد جان سے گئے اور درجنوں زخمی ہوئے۔ماہرین کے مطابق کراچی میں آگ لگنے کے واقعات زیادہ تر شارٹ سرکٹ، ناقص وائرنگ، گیس لیکیج، حفاظتی انتظامات کی کمی اور غفلت کی وجہ سے ہوتے ہیں۔فائر بریگیڈ کی سالانہ رپورٹ کے مطابق 2026 میں کراچی کے مختلف علاقوں میں ماہانہ 200 کے قریب اوسط واقعات ہو چکے ہیں۔جدید سرمایہ دارانہ طرز عمارتوں کا بنیادی مسئلہ یہی ہے جو کہ عمارت کی تعمیر کے ساتھ ہی اس سے جڑا ہوتا ہے۔