شعور نیوز( ویب ڈیسک): پاکستان میں سرکاری سطح پر ’’دانش AI پارک اسلام آباد‘‘ کو ’’جدیدیت سے بھرپور قوم، لامحدود امکانات کا مستقبل‘‘ کے لبرل تصور کے ساتھ متعارف کرایا جا رہا ہے۔کورین بینک سے 76 ملین ڈالر کی بھاری سودی رقم لیکر یہ تعمیرات مکمل کی گئی ہیں ۔ وزیر اعظم پاکستان شہباز شریف نے کئی خصوصیات والے اس آئی ٹی پارک کا افتتاح کردیا ہے ۔ اپنے خطاب میں انہوں نے یہ نہیں بتایا کہ یہ سودی قرضے کون کیسے واپس کرے گا ، نہ ہی کسے نے یہ بتایا کہ اس حرام رقم کے اثرات سے حرام کاریوںمیں اضافہ کیوں نہیں ہوگا؟

پاکستانی حکومت یہ ایسے وقت میں کر رہی ہے جب دنیا کے بڑے ٹیکنالوجی ماہرین، تعلیمی ادارے اور حکومتیں مصنوعی ذہانت کے بے قابو استعمال سے پیدا ہونے والے تعلیمی، نفسیاتی، سماجی، پرائیویسی اور سلامتی کے خطرات پر نئے ضابطے بنا رہی ہیں، امریکی کورٹس میں اے آئی کے خلاف قتل کے مقدمات درج ہو رہے ہیں۔

معاشی ترقی کی آڑ میں اے آئی کے نام پرپاکستان میں پہلے ہی نت نئے جرائم کا سلسلہ پورے زور و شور سے جاری ہے ، اس پر قابو پائے بغیر نئے دروازے کھولنا تباہی لائے گا ۔

وزارتِ انفارمیشن ٹیکنالوجی و ٹیلی کمیونیکیشن کے شائع کردہ اشتہار کے مطابق منصوبے میں 12 منزلہ ٹیکنالوجی پارک، 120 سے زائد آئی ٹی کمپنیوں کے دفاتر، اسٹارٹ اپ لیبز، کوورکنگ اسپیسز، اسکل ڈیولپمنٹ مراکز، R&D اور انوویشن لیبز، Tier-III ڈیٹا سینٹر اور دیگر سہولیات شامل ہیں۔ اشتہار میں اسے پاکستان کے ’’ڈیجیٹل مستقبل‘‘ اور ٹیکنالوجی کی دنیا کے ’’نئے باب‘‘ سے تعبیر کیا گیا ہے۔

ٹیکنالوجی بنانے والے اس کے نقصانات کو غیر معمولی قرار دے رہے ہیں ، حفاظتی اقدامات ، کنٹرول کی بات کر رہے ہیں تو پاکستان جیسے تیسری دنیا کےممالک کیوں ایسے فیصلے کر رہے ہیں جس کا کوئی ریورس گیئر نہیں ہوگا۔پاکستان کے لیے اصل امتحان بھی یہی ہے کہ ’’لامحدود امکانات‘‘ کے اشتہار کے ساتھ ممکنہ نقصانات اور ان کے سدباب کا قومی منصوبہ بھی پیش کرے۔