شعورنیوز(ویب ڈیسک):کراچی یونیورسٹی کے شعبہ اسلامک لرننگ کے چیئرمین عارف ساقی پر تشدد کے واقعے میں پولیس نے اب تک مرکزی ملزم کے علاوہ دیگر پانچ ملزمان کو حراست میں لے لیا۔ طلبہ ، اساتذہ تنظیموں نے اس شرمناک واقعے پر شدید احتجاج و مذمتی بیان جاری کیے ۔شہر میں جاری طاقت ، رعونت اور ڈالا گردی کے تازہ واقعے میں سندھ کی سیاسی جماعت سے تعلق رکھنے والے بااثر ہوٹل مالک کے بیٹے نے اپنے محافظوں کے ہمراہ جامعہ کراچی کے شعبہ اسلامک لرننگ کے سینئر استاد کو بدترین تشدد اور پستول کے بٹ مار کر لہولہان کر دیا۔

کراچی میں صفورا چورنگی کے قریب پروفیسر عارف ساقی اور ان کی ٹیکسی کے ڈرائیور کو دن دیہاڑے تشدد کا نشانہ بنایا گیا۔پروفیسر عارف ساقی کی خون میں لت پت وڈیو بیان نے سوشل میڈیا پر ہلچل مچا دی۔مقامی تھانے سچل پولیس نے پروفیسر عارف خان ساقی کی مدعیت میں مقدمہ نمبر 1412 سال 2026 بجرم دفعہ 147 ، 148 ، 149 ، 324 اور 342 کے تحت درج کرلیا۔ذرائع کے مطابق اصل با اثر شخص گاڑی کے مالک کو بچاتے ہوئے واقعے کے بعد اب تک 5 ملزمان کو حراست میں لیا گیا ہے، جن کا تعلق سندھ گرین ہوٹل کے ملازمین سے ہے ، جبکہ تشدد کرنے والا مرکزی ملزم تا حال فرار ہے۔

تھانے میں ریکارڈ ہونے والے اُن کے وڈیو بیان کے مطابق وہ نجی رائیڈ ، ٹیکسی سے یونیورسٹی جا رہے تھے ۔رستے میں اُن کی ٹیکسی کو ایک ’ویگو‘ گاڑی نے ٹکر مار دی ۔ انہوں نے گاڑی کے مالک نوجوان سے ٹیکسی والے کا نقصان بھرنے کی تلقین کی۔گاڑی والا نوجوان جو ظاہری طور پر اپنے باپ کے سرمایہ ، پیسے، غرور، کبر وطاقت کے نشے میں تھا اس نے پستول نکال کر فائرنگ شروع کردی اور اپنے گارڈز کے ساتھ استاد پر تشدد شروع کردیا۔

پولیس کا کہنا ہے کہ ہوٹل کے مالک کے بیٹے کے گن مینوں پر پروفیسر عارف ساقی کو تشدد کا نشانہ بنانے کا الزام لگایا گیا ہے۔ واقعے کے بعد عارف ساقی کی مدعیت میں مقدمہ درج کرلیا گیا ہے، جبکہ پولیس مزید تحقیقات کررہی ہے۔واقعے کے حوالے سے ڈرائیور نے اپنے بیان میں بتایا کہ وہ صبح تقریباً 10 بجے گھر سے روانہ ہوئے تھے اور صفورا چورنگی پہنچنے پر ایک ویگو ڈالا ان کی گاڑی کے قریب آیا۔ ڈرائیور کے مطابق ویگو ڈالا غلط انداز میں ریورس کیا گیا، جس کے باعث گاڑی کو ٹکر لگی۔

ڈرائیور کے مطابق پروفیسر عارف ساقی نے گاڑی سے اتر کر اس معاملے پر بات کی تو مذکورہ افراد نے ان پر حملہ کردیا۔ اس کے بقول ملزمان نے پستول کے بٹ ، لاتوں اور گھونسوں سے تشدد کیا اور گالم گلوچ بھی کی۔پھر گھسیٹ کر ہوٹل کے اندر لے گئے، جہاں انہیں مبینہ طور پر حبس میں رکھا گیا اور دوبارہ تشدد کیا گیا۔

ڈرائیور کے مطابق بعد میں رینجرز اور پولیس موقع پر پہنچی، جس کے بعد انہیں تھانے منتقل کیا گیا۔ ان کا کہنا ہے کہ بعد ازاں عباسی شہید اسپتال میں ان کا طبی معائنہ بھی کرایا گیا، جبکہ ان کی گاڑی تاحال مذکورہ افراد کے پاس ہے۔پولیس نے واقعے میں زیر حراست تینوں افراد سے تفتیش شروع کردی ہے اور واقعے کے دیگر پہلوؤں کی تحقیقات جاری ہیں۔
واقعہ سوشل میڈیا پر تیزی سے وائرل ہوا ، جس کے نتیجے میں وزیر داخلہ سمیت تمام اساتذۃ تنظیمیں، طلبہ تنظیمیں اور دیگر سماجی حلقوں نے بھی واقعہ پر ردعمل دیتے ہوئے شدید مذمت کی۔
کراچی میں ڈالہ گردی کا یہ پہلا واقعہ نہیں ہے ، جب سے یہ اشیا سڑکوں میں آئی ہیں ان کی خوفناک اقدار نے بھی معاشرے کو اپنی لپیٹ میں لیا ہے۔*ڈالہ* صرف ایک چار پہیوں والی سفری گاڑی کا نام اور عنوان نہیں ہے۔اس عنوان میں طاقت، غرور، کبر، فرعونیت کی اقدار ڈیفالٹ میں موجود ہیں۔ڈاکٹر عارف کے اس المناک واقعے نے صرف کراچی میں سرمایہ کی شیطانی اقدار کی ڈھیروں مثالوں میں ایک اور اضافہ کیا ہے۔