شعور نیوز( ویب ڈیسک): راولپنڈی کے بحریہ ٹاؤن فیز 7 میں واقع ویسٹ منسٹر انٹرنیشنل اسکول میں کمسن طالبہ کے ساتھ مبینہ طور پر جنسی نوعیت کی بدسلوکی کے الزامات نے والدین اور سوشل میڈیا پر شدید تشویش پیدا کردی ہے۔ واقعے سے متعلق گردش کرنے والے الزامات کی تاحال آزادانہ طور پر تصدیق نہیں ہوسکی اور کسی فرد کو ذمہ دار قرار دینے سے قبل شفاف اور غیر جانب دار تحقیقات ضروری ہیں۔

سوشل میڈیا پر گردش کرنے والی معلومات اور والدین سے منسوب بیانات کے مطابق بچی نے گھر واپس آنے کے بعد اپنی والدہ کو تکلیف اور مبینہ نامناسب رویے کے بارے میں بتایا۔ والدین نے مبینہ طور پر اسکول انتظامیہ سے رابطہ کرکے معاملے کی تحقیقات اور متعلقہ مقام کی سی سی ٹی وی فوٹیج فراہم کرنے کا مطالبہ کیا۔

والدین کے مطابق انہیں مبینہ طور پر بتایا گیا کہ جس جگہ واقعہ پیش آنے کا دعویٰ کیا گیا ہے وہاں متعلقہ کیمرے اس وقت کام نہیں کر رہے تھے۔ بعد ازاں سوشل میڈیا پر یہ دعویٰ سامنے آیا کہ اسکول انتظامیہ نے ایک مخصوص بلاک کی سی سی ٹی وی فوٹیج والدین کے سامنے پیش کی۔ والدین کی جانب سے مبینہ طور پر اعتراض کیا گیا کہ ایسی حساس فوٹیج کو عمومی طور پر دکھانے کے بجائے انہیں نجی طور پر دکھایا جائے، جس کے بعد الگ سے فوٹیج دیکھنے کا انتظام کیا گیا۔

والدین کے ایک اجلاس کے بارے میں بھی مختلف دعوے سامنے آئے ہیں۔ سوشل میڈیا پر گردش کرنے والی اطلاعات کے مطابق انتظامیہ نے والدین کو اپنی داخلی تحقیقات سے آگاہ کیا اور مؤقف اختیار کیا کہ دستیاب فوٹیج میں کوئی قابل اعتراض چیز نظر نہیں آتی۔ تاہم کمسن بچی کی والدہ نے مبینہ طور پر اس وضاحت سے اتفاق نہیں کیا اور مؤقف اختیار کیا کہ معاملے کی مکمل تصویر والدین کے سامنے نہیں رکھی گئی۔

دوسری جانب ایک مبینہ ویڈیو بھی سوشل میڈیا پر گردش کر رہی ہے جس میں اسکول کی پرنسپل کو سی سی ٹی وی کیمروں کے بارے میں گفتگو کرتے ہوئے دکھایا گیا ہے۔ بعض سوشل میڈیا صارفین نے یہ سوال بھی اٹھایا کہ اگر متعلقہ مقام پر کیمرہ موجود نہیں تھا یا کام نہیں کر رہا تھا تو بعد میں پیش کی جانے والی فوٹیج کی نوعیت کیا تھی۔ بعض افراد نے فوٹیج میں ردوبدل کا شبہ بھی ظاہر کیا ہے، تاہم اس دعوے کی بھی آزادانہ تصدیق نہیں ہوسکی۔

رپورٹس کے مطابق بعض والدین نے معاملے کی غیر جانب دار تحقیقات کے لیے تقریباً 20 افراد پر مشتمل والدین کی کمیٹی بنانے کی تجویز بھی دی ہے جبکہ قانونی کارروائی کے امکان پر بھی غور کیا جا رہا ہے۔ بعض والدین نے تحقیقات مکمل ہونے تک اپنے بچوں کو اسکول نہ بھیجنے پر بھی غور کیا ہے۔

یہاں اصل سوال صرف یہ نہیں کہ مبینہ واقعہ حقیقت میں کیا تھا، بلکہ یہ بھی ہے کہ اگر کسی بچے کی جانب سے اسکول میں نامناسب رویے کی شکایت سامنے آتی ہے تو ایک تعلیمی ادارے کا ردعمل کیا ہونا چاہیے؟

کم سن بچے کی شکایت کو معمولی سمجھنا، والدین کے سوالات کو محض افواہ قرار دینا یا معاملے کو ادارے کی ساکھ کے تناظر میں دیکھنا کسی بھی اسکول کے لیے انتہائی حساس معاملہ ہے۔ دوسری طرف صرف سوشل میڈیا کے الزامات کی بنیاد پر کسی استاد یا ملازم کو مجرم قرار دینا بھی انصاف کے بنیادی تقاضوں کے خلاف ہوگا۔

یہ معاملہ اس لیے بھی اہم ہے کہ ویسٹ منسٹر انٹرنیشنل اسکول جیسے مہنگے اور اشرافیائی طبقے سے وابستہ تعلیمی اداروں میں والدین عموماً یہ توقع رکھتے ہیں کہ ان کے بچوں کو نہ صرف معیاری تعلیم بلکہ انتہائی محفوظ ماحول بھی فراہم کیا جائے گا۔ اگر ایک کم سن بچی کے حوالے سے ایسا الزام سامنے آئے تو سوال پیدا ہوتا ہے کہ اعلیٰ فیس، جدید سہولیات اور بین الاقوامی طرزِ تعلیم کے دعووں کے ساتھ child protection کا نظام کس حد تک مضبوط ہے؟

پاکستان میں آزادی کے نام پر جنسی آزادی، عریانی، فحاشی اور جنسی مواد کی غیر معمولی دستیابی میں اضافہ ہوا ہے۔ موبائل فون، انٹرنیٹ اور سوشل میڈیا کے ذریعے ایسے مواد تک بچوں اور نوجوانوں کی رسائی بھی پہلے کے مقابلے میں کہیں زیادہ آسان ہوگئی ہے۔ اس ماحول کے بچوں کی نفسیات، جنسی رویوں اور معاشرتی اقدار پر اثرات کے بارے میں سنجیدہ بحث ضروری ہے۔