شعورنیوز(انٹرنیشنل ڈیسک):امریکی شہر شکاگو کے علاقے Humboldt Park میں 13 ستمبر کو دن دہاڑے ہونے والی فائرنگ کے نتیجے میں ایک 18 سالہ نوجوان جاں بحق جبکہ 6 افراد زخمی ہوگئے۔ فائرنگ کے بعد ایک خاتون ڈرائیور کو گولی لگنے سے اس کی گاڑی بے قابو ہوکر شکاگو کی شہری بس سے جا ٹکرائی۔ پولیس کے مطابق واقعہ دوپہر تقریباً 12 بج کر 17 منٹ پر پیش آیا۔پولیس کے مطابق چھ افراد ایک گلی کے قریب کھڑے تھے کہ دو گاڑیاں وہاں پہنچیں۔ متعدد مسلح افراد گاڑیوں سے باہر نکلے اور ان افراد پر فائرنگ شروع کردی۔ مقامی رپورٹ کے مطابق حملہ آوروں نے 70 سے زائد گولیاں چلائیں۔ فائرنگ کی زد میں آنے والوں میں 14، 18، 21، 24 اور 26 سال کے نوجوان شامل تھے۔ جن میں 18سالہ لڑکا ہسپتال پہنچنے کے باوجود دم توڑ گیا۔

زخمیوں میں 14 سالہ لڑکا بھی شامل ہے جسے ران میں گولی لگی۔ 24 سالہ شخص ٹانگ اور پیٹ میں گولی لگنے کے باعث ابتدائی طور پر تشویشناک حالت میں تھا، جبکہ دیگر زخمیوں کو مختلف اسپتالوں میں منتقل کیا گیا۔ ایک 30 سالہ خاتون بھی اپنی گاڑی میں موجود تھیں جب انہیں گولی لگی اور گاڑی بے قابو ہوکر بس سے ٹکرا گئی۔

شکاگو پولیس نے جائے وقوعہ کو گھیرے میں لے کر تحقیقات شروع کردی ہیں۔ فائرنگ میں استعمال ہونے والے ہتھیاروں اور حملہ آوروں کی شناخت کے لیے تفتیش جاری ہے ، تاہم 3 دن میں کوئی گرفتاری ظاہر نہیں کی گئی۔

2025 میں اس شہر میں 416 قتل ریکارڈ ہوئے تھے ۔ اگست 2026 میں بھی 39 قتل ریکارڈ ہوئے، اس کے باوجود مسلح تشدد کے واقعات شہری زندگی کے لیے مسلسل بڑا مسئلہ ہیں۔

گن وائلینس کے دائرے میں امریکہ میں سال 2026 ٹریکر کے مطابق 335 واقعات ریکارڈ ہوچکے ہیں۔

اس واقعے کو محض ایک جرم سمجھنے کے بجائے امریکہ میں موجود اسلحہ کلچر، منشیات، نوجوانوں میں گینگ تشدد، سماجی ٹوٹ پھوٹ اور سرمایہ دارانہ نظام کے بحران کے وسیع تر تناظر میں دیکھا جانا چاہیے ۔