شعور نیوز(ویب ڈیسک):نیشنل سائبر کرائم انویسٹی گیشن ایجنسی (این سی سی آئی اے) نے ملک بھر میں ’کال سینٹر‘ کےعنوان سے جدید تعلیم کے حامل سائبر ڈکیتوں کے کئی منظم نیٹ ورک کو گرفتار کراہے۔کراچی اور لاہور میں اکتوبر کے تیسرے ہفتے میں بڑی کارروائی کرتے ہوئے سائبر ڈکیتیوں میں ملوث غیر قانونی کال سینٹر کا نیٹ ورک پکڑا ہے ۔کراچی کے شاہراہ فیصل پر ایک آفس میں مالک سمیت 11 ملزمان کو گرفتار کرلیا۔اسی طرح لاہور میں چار آپریشنز میں 10 ملزمان گرفتار کیےگئے ۔28 ستمبر کو اسلام آباد کے سیکٹر G-10 میں ایک بڑے غیر قانونی کال سینٹر پر چھاپہ مار کر 65 سے زائد افراد کو حراست میں لیا، جن میں 5 غیر ملکی شہری بھی شامل تھے۔ یہ سینٹر بین الاقوامی سطح پر آن لائن مالیاتی فراڈ اور ڈیٹا چوری میں ملوث تھا۔

ابتدائی تحقیقات کے مطابق گرفتار ملزمان خود کو غیر ملکی بینکوں اور مالیاتی اداروں کے نمائندے ظاہر کر کے شہریوں کی حساس ذاتی اور بینکنگ معلومات حاصل کرتے تھے، جنہیں بعد ازاں مبینہ طور پر مالیاتی فراڈ کی وارداتوں کے لیے استعمال کیا جاتا تھا۔چھاپے کے دوران مبینہ وارداتوں میں زیرِ استعمال 36 لیپ ٹاپس، 8 موبائل فونز، ایک ڈی وی آر اور سائبر فراڈ میں استعمال ہونے والے دیگر جدید ڈیجیٹل آلات برآمد کر کے قبضے میں لے لیے گئے ہیں۔

این سی سی آئی اے حکام کے مطابق واقعے کا مقدمہ پریوینشن آف الیکٹرانک کرائمز ایکٹ (پی سی سی ) 2016ترمیم شدہ( 2025) کی متعلقہ دفعات اور پاکستان پینل کوڈ کے تحت درج کر لیا گیا ہے، جبکہ مالیاتی لین دین کا سراغ لگانے اور گروہ کے دیگر سہولت کاروں کی نشاندہی کے لیے تفتیش کا دائرہ وسیع کر دیا گیا ہے۔

یوں اعلیٰ تعلیم یافتہ افراد کے یہ سارے گرو ہ اپنی اصل میں جرائم پیشہ ڈجیٹل ڈکیت کی صورت بڑھتے پھلتے پھولتے جا رہے ہیں۔ نظام تعلیم اور اس سے پیدا شدہ معاشرت نے ان سارے تعلیم یافتہ نوجوانوں کو نامعلوم ترقی تک پہنچنے کے لیے جرائم کے یہ رستے اس انداز سے پیش کیے ہیں کہ سب کو یہ کام ایک معقول اچھائی اور صلاحیت کا استعمال لگتا ہے ۔اس لوٹ مار ،ڈکیتی کو وہ سب اپنی لا محدود خواہشات کو پورا کرنے کے لیے ایک معقول رستہ قرار دیتے ہیں۔ یہی وجہ ہے کہ ایسے تمام غیر قانونی کال سینٹرز کی مستقل بہتات ہو رہی ہے ۔اخلاقیات سے عاری اور ہر قسم کے خوف خدا سے کاٹنے والا نظام تعلیم آپ کو صرف لذات و خواہشات کے حصول کی جانب لگا تا ہے اور یہ انجام سامنے ہے۔سائبر جرائم کی نوعیت اور اقسام مستقل بڑھتی جا رہی ہیں اور مصنوعی ذہانت کے بعد یہ مزید نئے رنگ روپ نکالےگی جس کے نتیجے میں جنگل کی معاشرت ترتیب پائے گی اور ایسے جرائم کرکے اندھا دھند پیسہ کمانا ایک عقلی جواز کے طور پرجگہ بنالے گا ، جیسے ماضی میں رشوت ، جھوٹ، اقربا پروری، کرپشن و سفارش ، کمیشن نے بنائی۔