شعور نیوز( انٹرنیشنل ڈیسک):پانچ امریکی ریاستوں میں سینکڑوں کلوگرام زہریلی 'ٹونا مچھلی' کی سپلائی کے انکشاف نے عوام میں خوف و ہراس پھیلا دیا۔
فوڈ اینڈ ڈرگ ایڈمنسٹریشن (FDA) کے مطابق، امریکہ کی پانچ ریاستوں میں سپلائی کی جانے والی تقریباً 333 پاؤنڈ ٹونا مچھلی کو مارکیٹ سے واپس (ری کال) بلا لیا گیا ہے، کیونکہ لیبارٹری ٹیسٹ کے دوران اس میں ایک خطرناک زہریلے مادے کی زائد مقدار پائی گئی ہے جو فوڈ پوائزننگ کا سبب بن سکتی ہے۔ایف ڈی اے کا مزید کہنا ہے کہ اس ری کال آرڈر کے دائرہ کار میں بک ہیڈ ٹونا کی 332.9 پاؤنڈ مقدار شامل ہے، جسے نیویارک، نیوجرسی، کنیکٹیکٹ، پنسلوانیا اور میری لینڈ میں تقسیم کیا گیا تھا۔
سرمایہ دارکمپنیوں کی ایک اور سفاک ہولناک کارروائی کا راز فاش ہوگیا۔ سائنس کی زبان میں ایف ڈی اے (FDA) کا کہنا ہے کہ یہ مچھلی سکومبروٹوکسن (Scombrotoxin) کی وجہ سے زہریلی ہوئی، جو مچھلی کے خراب ہونے اور بیکٹیریا کے پھیلنے سے پیدا ہوتا ہے۔ اس قسم کی مچھلیوں کو پکڑنے سے لے کر دکانوں تک پہنچانے تک مسلسل انتہائی ٹھنڈے درجہ حرارت (Freezing or Strict Refrigeration) میں رکھنا لازمی ہوتا ہے تاکہ بیکٹیریا پیدا نہ ہوں۔

بجلی کے بل بچانے، سستے اور ناقص فریج کنٹینرز استعمال کرنے، یا پرانی ہوچکی مچھلی کو ضائع کر کے نقصان اٹھانے کے بجائے اسے مارکیٹ میں دھکیلنے کی ہوس نے اس مچھلی کو زہر کا ڈھیر بنا دیا۔اس نظام میں انسانی صحت ثانوی اور پروڈکشن کی رفتار بنیادی اہمیت رکھتی ہے۔کمپنیوں نے سپلائی چین کو تیزی سے چلانے کے چکر میں غفلت برتی، جس سے مچھلی میں زہریلے مادے جمع ہو گئے۔

سرمایہ دار کا پیسوں کا لالچ مچھلی کو زہر بناتا ہے، اور وہی لالچ بالاآخر مارکیٹ کے ذریعے معصوم صارفین کی میز تک پہنچ کر انہیں اپنے ہی پیسوں سے زہر خریدنے پر مجبور کر دیتا ہے۔ جب تک منافع کو انسانی جانوں پر ترجیح دی جاتی رہے گی، عوام اسی طرح سرمایہ داروں کی تجوریوں کو بھرنے کے لیے اپنی صحت کی قربانی دیتے رہیں گے۔

یاد رہے کہ شدید سمندری آلودگی، زہریلے کیمیکلز اور فیکٹریوں کے فضلے سے بھی مچھلیوں میں زہر پھیلتا ہے، لیکن زیر حث ’بک ہیڈ ٹونا مچھلی ‘ میں پایا جانے والا یہ خاص زہر (سکومبروٹوکسن) سمندری آلودگی کی وجہ سے نہیں، بلکہ صرف اور صرف فریزر کی کمی یا درجہ حرارت برقرار نہ رکھنے کی وجہ سے پیدا ہوا ہے۔