شعورنیوز(انٹرنیشنل ڈیسک):مقبوضہ مغربی کنارے کے جنوبی شہر الخلیل کے قریب جمعہ 23اکتوبر کے روز فائرنگ کے ایک حملے میں 6 صہیونی اہلکار زخمی ہو گئے، جن میں سے 2 کی حالت انتہائی تشویشناک ہے، جبکہ قابض اسرائیلی فوج نے دعویٰ کیا ہے کہ اس نے حملے میں ملوث دو افراد کو شہید کر دیا ہے۔صیہونی وزیر اعظم نیتن یاہو نے حملے کے بعدمغربی کنارے کو مکمل بند کرنے کا حکم دیا ہے۔اسرائیلی قابض افواج (IOF) نے متعدد علاقوں میں چھاپوں کا ایک سلسلہ شروع کردیا، جس کے دوران انہوں نے فلسطینی نوجوانوں کو حراست میں لے لیا۔

عز الدین القسام کے ترجمان ابوعبیدہ نے مقبوضہ مغربی کنارے میں فلسطینی مجاہدین کی طرف سے کیے گئے الخلیل آپریشن پر مبارکباد پیش کرتے ہوئے مسجدِ اقصی اور فلسطینی اسیران کے دفاع اور غزہ کی پٹی کی نصرت و تائید میں قابض اسرائیل کے خلاف عوامی تحریک تیز کرنے کا مطالبہ کیا ہے۔قابض اسرائیلی ذرائع ابلاغ نے اشارہ کیا کہ زخمی ہونے والے اہلکار اسرائیلی ہوم فرنٹ کمانڈ سے تعلق رکھنے والی ایک ریزرو بٹالین میں ڈیوٹی پر مامور تھے۔

دوسری جانب غزہ کی پٹی کے مختلف علاقوں میں قابض اسرائیلی فوج کی جانب سے بمباری اور فائرنگ کے نتیجے میں جمعہ کے روز 3 شہری شہید اور متعدد زخمی ہو گئے، جبکہ جنگ بندی معاہدے کی اسرائیلی خلاف ورزیاں مسلسل جاری ہیں۔مقامی ذرائع نے بتایا کہ غزہ شہر کے مغرب میں سویدی النصر کے گرد و نواح میں شہریوں کے ایک گروپ پر اسرائیلی بمباری کے نتیجے میں دو شہری شہید اور متعدد زخمی ہو گئے۔

مغربی کنارے میں ہونے والی اس کارروائی نے صیہونیوں کی صفوں میں ہلچل مچا ڈالی ہے۔قابض فوج نے پے در پے جاری کردہ بیانات میں بتایا کہ اسے الخلیل کے قریب فائرنگ کے ایک واقعے میں افراد کے زخمی ہونے کی ابتدائی اطلاع موصول ہوئی، جس کے فوراً بعد علاقے میں اضافی عسکری نفری روانہ کر دی گئی اور ناکہ بندی و تلاشی کی کارروائیاں شروع کر دی گئیں، جس کے بعد اطراف کے کئی دیہات کا سخت محاصرہ کر لیا گیا۔

اسرائیل کے نجی ٹی وی ’چینل 14‘ نے رپورٹ کیا کہ حملہ ’تیلم‘ یہودی بستی کے قریب واقع ایک عسکری ٹاور پر کیا گیا، جس میں اسرائیلی فوج کے متعدد افراد کے زخمی ہونے کی تصدیق کی گئی۔دوسری جانب عبرانی ویب سائٹ ’والا‘ نے بتایا کہ فائرنگ کا ہدف اسرائیلی ہوم فرنٹ کمانڈ سے منسلک ریزرو بٹالین تھی۔

بعد ازاں قابض فوج نے دو افراد کو شہید کرنے کا اعلان کرتے ہوئے دعویٰ کیا کہ وہ اس حملے کی کارروائی میں شریک تھے، جبکہ علاقے میں عسکری اقدامات اور تلاشی کا آپریشن مسلسل جاری ہے۔قابض فورسز نے الخلیل کے گرد و نواح کے متعدد دیہات پر سخت سکیورٹی حصار قائم کر دیا اور حملے سے تعلق رکھنے والے دیگر ممکنہ افراد کی تلاش و تفتیش کے لیے راستوں اور آمدورفت کے راستوں کو بند کر دیا۔حملے کی مکمل تفاصیل اور قابض فوج کے ہاتھوں شہید ہونے والے دونوں افراد کی شناخت کے بارے میں مزید معلومات ابھی آزادانہ ذرائع سے حاصل نہیں ہو سکی ہیں۔