شعور نیوز( انٹرنیشنل ڈیسک):یورپی ملک البانیہ میں طلبہ ان دنوں ناقص تعلیمی سہولیات، کرپشن اور بے روزگاری کے خلاف وزیراعظم سے استعفیٰ کا مطالبہ کر رہے ہیں۔ یہ مظاہرے اس حد تک شدید ہو چکے ہیں کہ البانیہ کے وزیر اعظم ایدی راما استعفی دینے سے انکار کرتے ہوئے کسی نامعلوم جگہ روپوش ہوگئے ہیں ۔

البانیہ کے دارالحکومت تیرانا طلبہ کے احتجاج کی وجہ سے میدان جنگ بنا ہوا ہے۔پولیس اور مظاہرین میں جھڑپوں میں اب تک سیکڑوں پولیس اہلکار زخمی ہوچکے ۔ غیرملکی میڈیا کے مطابق مشتعل مظاہرین نے سڑکوں پر جلاؤ گھیراؤ کیا، سرکاری عمارتوں، پولیس اسٹیشنز اور دکانوں میں داخل ہو کر توڑ پھوڑ کر رہے ہیں ۔وزارت تعلیم سمیت کئی عمارتوں کو آگ لگا دی گئی ہے ۔ یہ بالکل فرانس کے مظاہرین جیسی صورتحال ہے کیونکہ بنیادی وجوہات ایک جیسی ہیں۔ البانیہ کے یہ مظاہرے دوسرے شہروں میں بھی پھیل گئے ہیں جبکہ پولیس نے جوابی کارروائی کرتے ہوئے 60 سے زائد مظاہرین کو گرفتار بھی کیا ہے۔

البانیہ جنوب مشرقی یورپ کے خطے بلقان (Balkans) میں واقع ایک چھوٹا اور خوبصورت ملک ہے۔البانیہ طویل عرصے تک سلطنتِ عثمانیہ کا حصہ رہا اور 1912ء میں اس نے آزادی حاصل کی۔دوسری جنگِ عظیم کے بعد البانیہ طویل عرصے تک بدترین اور سخت ترین کمیونسٹ ڈکٹیٹر انور خوجا کے زیر اثر رہا جس نے اسلام اور اسلامی شناخت طاقت سے مٹانے پر خوب کام کیا۔1991ء میں کمیونزم کے خاتمے کے بعد البانیہ میں مغربی ڈیمو کریسی قائم ہوئی۔آج البانیہ ناٹو (NATO) کا حصہ ہے اور یورپی یونین (EU) کی رکنیت حاصل کرنے کی کوششوں میں مصروف ہے۔

حکومت مخالف مظاہرے اگرچہ مہینوں سے جاری تھے، لیکن حالیہ دنوں میں شدید اشتعال اور پُرتشدد لہر کی وجہ تعلیمی مسائل اور طلبہ کی شکایات بنیں۔طلبہ نے فیسوں میں اضافے، یونیورسٹیوں کی بدحالی اور روزگار کے مواقع نہ ہونے پر تعلیمی اداروں کا بائیکاٹ کیا۔ جب حکومت نے ان کے مطالبات پر توجہ نہیں دی، تو طلبہ سڑکوں پر آ گئے۔ پولیس کے ساتھ معمولی جھڑپ نے دیکھتے ہی دیکھتے ملک گیر پُرتشدد تحریک کی شکل اختیار کر لی اور وزارتِ تعلیم اور وزارتِ انصاف کی عمارتوں کو آگ لگا دی گئی۔

اس احتجاج کے پیچھے ایک اور بڑا غصہ البانیہ کے خوبصورت جنوبی ساحل کی زمین امریکی صدر ڈونلڈ ٹرمپ کے داماد جیرڈ کوشنر کو ایک پرتعیش ریزورٹ بنانے کے لیے سستے داموں بیچنا بھی شامل تھا۔البانیہ میں مسلمانوں کی 50فیصد تعداد ہے جو سخت کمیونسٹ دور جبر کی وجہ سے اب صرف ناموں کی حد تک رہ گئے ہیں تاہم قابض اسرائیل و امریکہ کے حوالے سے عوام میں شدید تنفر پایا جاتا ہے ۔صیہونی وزیر اعظم نتن یاہو سے البانوی وزیر اعظم ایڈی راما کے قریبی روابط کی مخالفت بھی کی گئی ہے ۔ سوشل میڈیا پر اس معاملے پر مہم تیز ہوگئی ہے۔

اس احتجاج کے پیچھے ایک اور بڑا غصہ البانیہ کے خوبصورت جنوبی ساحل کی زمین امریکی صدر ڈونلڈ ٹرمپ کے داماد جیرڈ کوشنر (Jared Kushner) کو ایک پرتعیش ریزورٹ بنانے کے لیے سستے داموں بیچنا ہے۔

حکومتی وزراء اور اعلیٰ حکام پر بڑے پیمانے پر کرپشن کے الزامات ہیں، حال ہی میں نائب وزیرِ اعظم بیلنڈا بالوکو کے خلاف تحقیقات نے بھی آگ پر تیل کا کام کیا۔تجزیہ کاروں کا کہنا ہے کہ ایڈی راما کی حکومت اشتراکی ہونے کا دعویٰ کرتی ہے لیکن اس کی پالیسیاں بدترین نیو لبرل ازم پر مبنی ہیں، جہاں ماحولیاتی تحفظ اور عوامی حقوق کو پسِ پشت ڈال کر کارپوریٹ مافیا اور بین الاقوامی سیاسی خاندانوں (جیسے ٹرمپ فیملی) کو فائدہ پہنچایا جا رہا ہے۔

مغربی دنیا اور یورپی یونین اکثر ایڈی راما کی حکومت کی کرپشن سے نظریں چراتے رہے ہیں کیونکہ وہ خطے میں استحکام چاہتے ہیں، جس سے البانوی عوام میں یہ تاثر ابھرا ہے کہ موجودہ عالمی نظام بھی ان کی بدحالی میں برابر کا شریک ہے۔

البانیہ میں حکومت کے خلاف مظاہروں کے دوران صیہونی حکومت کی وسیع مخالفت بھی کی گئی۔ ان وسیع مظاہروں کے بعد البانیہ کے دارالحکومت تیرانا میں صیہونی حکومت کے سفارت خانے نے اپنی تمام سرگرمیاں بند کردیں۔ اس رپورٹ کے مطابق صیہونی حکومت کے سفارت خانے نے اعلان کیا ہے کہ ڈپلومیٹک سرگرمیاں شروع کرنے کا فیصلہ حالات کا جائزہ لینے کے بعد کیا جائے گا۔