شعورنیوز(ویب ڈیسک):شمسی کیلنڈر میں 2 اکتوبر کا دن تاریخِ اسلام میں اس عظیم واقعے کی یاد تازہ کرتا ہے جب عظیم سپاہ سالار سلطان صلاح الدین ایوبی علیہ رحمہ نے 88 سالہ خونخوار صلیبی قبضے اور مظالم کا خاتمہ کرتے ہوئے بیت المقدس اور مسجدِ اقصی کو آزاد کرایا تھا۔

جب 1099ء میں نصرانیوں نے القدس پر قبضہ کیا تھا تو انہوں نے 70 ہزار سے زائد مسلمانوں کا بے دریغ قتلِ عام کیا تھا۔ 2 اکتوبر 1187ء کو سلطان صلاح الدین ایوبی ؒ فاتح بن کر القدس میں داخل ہوئے، تو انہوں نے انتقام کے بجائے عفو و درگزر، عدل اور اسلامی پاسداری کی وہ مثال قائم کی جس نے دشمنوں کو بھی اعتراف پر مجبور کر دیا۔ سلطان نے ابراہیمی مسجد اور مسجدِ اقصی کو عرقِ گلاب سے دھلوایا اور فتح کے بعد پہلا خطبہِ جمعہ ادا کیا گیا۔

صلاح الدین ایوبی کے اس عظیم کارنامے کو یاد کر رہے ہیں، تو وہ پوری سرزمین قبۃ الصخرہ اور مسجدِ اقصی ایک بار پھر غاصبانہ تسلط، صیہونی بستیوں کی توسيع اور صہیونی آباد کاروں کے آئے روز کے حملوں اور رقص و سرود کا شکار ہیں۔ الخلیل کی ابراہیمی مسجد میں فلسطینیوں کے داخلے پر پابندیاں عائد کر کے صیہونی تہوار منائے جا رہے ہیں، جبکہ غزة اور مغربی کنارے کی مقدس زمین اپنے ہی بیٹوں کے خون سے لالہ زار ہے۔

القدس محض ایک جغرافیائی ٹکڑا یا کوئی علاقائی تنازع نہیں، بلکہ یہ سید الانبیاء ﷺ کے سفرِ اسرا و معراج کی سرزمین اور امتِ مسلمہ کی مقدس ترین امانتی زمین ہے۔

سلطان صلاح الدین ایوبی نے القدس کو محض جذباتی تقاریر یا نعروں سے آزاد نہیں کرایا تھا، بلکہ انہوں نے:

داخلی اتحاد: مسلمان حکمرانوں اور گروہوں کے باہمی اختلافات کو ختم کر کے امت کو ایک پرچم تلے متحد کیا۔
علم و تربیت: نجی و اجتماعی سطح پر صلاح الدین کے استاد نور الدین زنگی ؒ اور علماء نے ایسی نسل تیار کی جو دنیا کے بجائے آخرت اور جہادِ فی سبیل اللہ کا جذبہ رکھتی تھی۔
عملی تگ و دو اور صلاحیت: عسکری، معاشی اور سفارتی میدان میں خود کو اس قدر مضبوط کیا کہ وقت کی سب سے بڑی طاقت کو گھٹنے ٹیکنے پر مجبور کر دیا۔

تاریخ کا سب سے بڑا درس یہ ہے کہ زوال کبھی دائمی نہیں ہوتا۔ اگر 88 سالہ غصب کے بعد القدس آزاد ہو سکتا ہے، تو آج کا صیہونی تسلط بھی ہمیشہ نہیں رہے گا۔ لیکن اس کے لیے امتِ مسلمہ کو بے حسی، فرقہ واریت اور محض زبانی ہمدردی کی نیند سے جاگنا ہوگا۔

2 اکتوبر ہر مسلم حکمران، نوجوان اور مفکر سے سوال کرتا ہے کہ "کیا ہم دوبارہ صلاح الدین ایوبی کی سنت کو زندہ کرتے ہوئے اپنی امانت کی حفاظت اور عمل کے لیے تیار ہیں؟" القدس کی آزادی خوابوں سے نہیں، بلکہ اتحاد، خود دار معیشت، تکنیکی صلاحیت اور غیر متزلزل ایمان و عمل سے ہی ممکن ہوگی۔