شعور نیوز( ویب ڈیسک):وفاقی دارالحکومت اسلام آباد بھی شدید خوف اور سنسنی کی زد میں ہے جہاں معصوم بچوں کے اچانک غائب ہونے اور اغوا کے ہولناک واقعات مستقل بے حسی بڑھا رہے ہیں۔یہ سنسنی خیز صورتحال اس وقت ایک انتہائی بھیانک سانحے میں تبدیل ہو گئی جب اسلام آباد کے ایک علاقے سے اغوا ہونے والی 3 سالہ معصوم بچی کی لاش پولیس اسٹیشن کے قریب ہی جنگل سے برآمد ہوئی۔ ننھی بچی کو اغوا کیا گیا پھر درندگی کا نشانہ بنا کر بیدردی سے موت کے گھاٹ اتار دیا گیا۔پولیس ریکارڈ کے مطابق ستمبر کے وسط میں صرف ایک ہی دن کے اندر ریکارڈ 12 افراد کے اغوا کے مقدمات درج ہونے کے بعد یہ انکشاف ہوا ہے کہ شہر کی گلیوں اور یہاں تک کہ ہسپتالوں میں بھی بچے اب محفوظ نہیں رہے۔ اسلام آباد کے مشہور سرکاری ہسپتال پمز (PIMS) ہسپتال سے نوزائیدہ بچے کے دن دیہاڑے اغوا کی کوشش ہوئی جسے اتفاق سے ناکام بنا دیا گیا۔یہ اغوا کرنے والی بھی تین خواتین تھیں، دو سگی بہنیں اور ایک بیٹی شامل تھی جن کا تعلق لاہور سے بتایا گیا ہے۔
مختلف رپورٹس کے مطابق، ان جرائم میں ملوث نیٹ ورکس انتہائی منظم طریقے سے گلی محلوں، پارکوں اور ہسپتالوں کے باہر گھات لگائے بیٹھے ہیں۔ یہ وحشی درندے معصوم بچوں کو بہلا پھسلا کر یا زبردستی نشانہ بنا رہے ہیں۔ اگرچہ پولیس کارروائیاں کر رہی ہے، لیکن اس نیٹ ورک کی گرفت اتنی مضبوط دکھائی دیتی ہے کہ وفاقی دارالحکومت کے چپے چپے پر لگے کیمرے بھی ان کے آگے بے بس نظر آ رہے ہیں۔

اسلام آباد سے پولیس ریکارد کے مطابق ایک ہی دن میں جو کیسز رپورٹ ہوئے ان میں گارڈن ٹاؤن سے 1لڑکا، اقبال ٹاؤن سے 15 سالہ لڑکی، بلال ٹاؤن سے 16 سالہ لڑکا،نیابادی بارکہ سے 17 سالہ لڑکی، آئی نائن فور سے شادی شدہ خاتون ،سہالہ سے 2خواتین کا اغوا،ماڈل ٹاؤن سے 18 سالہ لڑکی،آئی نائن ٹو سے سرکاری افسر کا ڈرائیور،ایک آن لائن کیب سروس کا ڈرائیورکے غائب ہونے کی رپورٹ اُن کے قریبی اہل خانہ نے درج کرائی۔

لبرل مفکرین کا کہنا ہے کہ ان جرائم کی اصل وجہ لبرل اقدار نہیں، بلکہ ریاستی اداروں کی نااہلی، پولیس کے نظام میں کرپشن اور سستا و فوری انصاف نہ ملنا ہے۔ اگر قانون کی گرفت مضبوط ہو تو جرائم خود بخود کم ہو جاتے ہیں۔ان کے نزدیک خواتین اور بچوں کے خلاف ہونے والے جنسی جرائم اور اغوا کی وجہ لبرل ازم نہیں، بلکہ معاشرے میں موجود پرانی قبائلی اور جاگیردارانہ سوچ ہے، جہاں کمزور کو جاگیر یا ملکیت سمجھا جاتا ہے۔
دوسری جانب مسلم متکلمین یکسوہیں کہ ان سب جرائم کی نوعیت بتاتی ہے کہ ان کے پیچھے خالص لبرل اقدار کا نفوذ ہی کارفرماہے۔لبرل انفرادیت نے رشتوں کا تقدس ختم کیا ہے، حفظ مراتب ختم کیا ہے، خوف خدا کے تمام تصورات کو ختم کیا ہے ، روایتی زندگی کو سائنٹفک الحادی عقلیت سے تبدیل کیا ہے، تصور آزادی کو انڈیل کر مادہ پرستی،لذات کی اندھی تکمیل کو مقصد بنا کر انڈیلا گیا ہے۔