شعور نیوز( انٹرنیشنل ڈیسک):نائن الیون حملے کی 25ویں برسی پر امریکہ میں بڑے پیمانے پر سرگرمیاں منعقد ہوئیں۔دنیا نے 25سال میں دیکھ لیا کہ جدید اسلحے و ٹیکنالوجی ، سیکیورٹی آلات ، جنگی ساز و سامان ایک غیر مادی ا یمانی قوت سے شکست کھا گئے۔

برطانیہ، نیٹو اور دیگر مغربی ممالک میں بھی خصوصی تقریبات اور یادگاری پروگرام منعقد کیے گئے۔ نیویارک، پینٹاگون اور پنسلوانیا کے شینکس ول میں تقریباً 3 ہزار ہلاک ہونے والے افراد کو خراج عقیدت پیش کیا گیا، لیکن ایک چوتھائی صدی گزرنے کے باوجود 9/11 کا اثر صرف امریکی تاریخ تک محدود نہیں رہا بلکہ اس واقعے نے عالمی سیاست، جنگ، نگرانی، سلامتی اور مسلم دنیا کے ساتھ مغرب کے تعلقات کا پورا منظرنامہ تبدیل کردیا۔

پینٹاگون میں صدر ڈونلڈ ٹرمپ نے تقریب میں شرکت کی جبکہ نیویارک کی تقریب میں نائب صدر جے ڈی وینس اور سابق صدور بل کلنٹن، جارج ڈبلیو بش، براک اوباما اور جو بائیڈن سمیت اہم شخصیات شریک ہوئیں۔ امریکہ کے مختلف شہروں میں بھی یادگاری پروگرام ہوئے۔ کئی مقامات پر فائر فائٹرز، پولیس اہلکاروں اور پہلے امدادی کارکنوں کو خراج عقیدت پیش کیا گیا، جبکہ نیویارک میں 2,977 روشنیوں پر مشتمل خصوصی خراج بھی پیش کیا گیا۔

برطانیہ میں بھی 9/11 کی 25ویں برسی پر خصوصی تقریب ہوئی۔ بکنگھم پیلس میں برطانوی فوج کے Coldstream Guards کے بینڈ نے امریکی اور برطانوی قومی ترانوں سمیت خصوصی موسیقی پیش کی۔ اسی طرح برسلز میں نیٹو ہیڈکوارٹرز پر 9/11 کی یاد میں خصوصی تقریب منعقد ہوئی۔ یہ وہ افواج تھیں جو امریکہ پر اس حملے کا بدلہ لینے افغانستان و عراق گئیں اور اپنے فوجیوں کی لاشوں کے ڈھیر واپس لائیں۔

سرد جنگ کے خاتمے کے بعد دنیا کے سامنے امریکہ کے نئے ورلڈ آرڈر نے جو تاثر قائم کیا تھا، اُس کے سامنے بند باندھنا ضروری تھا ۔11 ستمبر 2001 اسلام کے بطور سیاسی نظام ہونے کے اعلان کے طور پر سامنے آیا۔ امریکہ نے اپنے گماشتوں کے ساتھ اس کو ’دہشت گردی کے خلاف جنگ‘ کے نام سے جوڑ کر ڈیل کرنے کی کوشش کی ۔

افغانستان پر جنگ مسلط ہوئی، پھر عراق پر حملہ کیا گیا، امریکی داخلی سلامتی کا ڈھانچہ وسیع ہوا، نگرانی اور کاؤنٹر ٹیرر ازم قوانین میں غیر معمولی اضافہ ہوا ۔گوانتاناموبے، ابوغریب، ڈرون حملوں اور شہری آزادیوں کی حدود پر شدید بحث بھی اسی جنگ کے نتیجے میں پیدا ہوئی۔سب جانتے ہیں کہ 9/11 کے بعد بننے والا نیا عالمی نظام دنیا کو زیادہ غیر محفوظ بنا گیا۔ خصوصاً 7 اکتوبر 2023 کے طوفان الاقصیٰ کے بعد سے تو مزید غلبہ اسلامی نظام کا تاثر مزید گہرا ہوگیا۔

نائن الیون بظاہر عالمی سرمایہ دارانہ نظام کی ناک پر حملہ تھا لیکن یہ بات عیاں ہو چکی ہے کہ اصل مقابلہ ہتھیاروں کا نہیں؛ بلکہ حاکمیت کے تصور، اقدار، قانون اور نظامِ حیات کا ہے۔

9/11 کے بعد اسلام محض ایک مذہبی عقیدہ نہیں بلکہ عالمی سیاسی و تہذیبی قوت کے طور پر مغرب کے سامنے زیرِ بحث آیا۔