شعور نیوز( انٹرنیشنل ڈیسک):فلسطین کے مغربی کنارے میں غیر قانونی صیہونی بستیوں کی تعمیر اور فلسطینیوں کے خلاف آبادکاروں کی پرتشدد کارروائیوں پر قابض اسرائیل کے خلاف عالمی پابندیوں کا دائرہ کار وسیع ہو گیا ہے۔ برطانیہ، فرانس اور کینیڈا کے علاوہ مزید 9 مغربی ممالک جن میں ڈنمارک، فن لینڈ، آئس لینڈ، آئرلینڈ، ناروے، پولینڈ، پرتگال، اسپین اور سویڈن نے غیر قانونی بستیوں سے ہونے والی تجارت اور مصنوعات پر پابندیاں عائد کرنے کی تیاری مکمل کر لی ہے۔ دوسری جانب پاکستان، ترکیہ، مصر، انڈونیشیا، اردن، سعودی عرب اور متحدہ عرب امارات کے وزرائے خارجہ نے ایک مشترکہ بیان میں ان اقدامات کا پرجوش خیرمقدم کیا ہے۔

یہودی مذہب سے تعلق رکھنے والے برطانوی وزیر خارجہ ایڈ ملی بینڈ اور حکومت نے واضح کیا ہے کہ یہ اقدام مغربی کنارے میں صیہونی آبادکاروں کی جانب سے فلسطینیوں پر بڑھتے تشدد، زمینوں پر قبضے اور ’نسل کشی‘ کو روکنے کے لیے اٹھایا گیا ہے۔ برطانیہ کے مطابق اسرائیل کا متنازعہ ’E1 سیٹلمنٹ پروجیکٹ‘ دراصل 2ریاستی حل کو عملًا ختم کر دے گا۔یہ پروجیکٹ اس جگہ تازہ قبضہ کرکے بنایا جا رہا ہے جس کے بعد فلسطین کو1967 بارڈر کے مطابق الگ نہیں کیا جا سکے گا۔برطانیہ نے تسلیم کیا ہے کہ بین الاقوامی قانون اور عالمی عدالت انصاف (ICJ) کی رائے کے مطابق فلسطینی علاقوں پر اسرائیل کا قبضہ مکمل غیر قانونی ہے، جس پر خاموش رہنا اب ممکن نہیں ۔برطانیہ نے ان کمپنیوں، بینکوں اور اشتہار دینے والے اداروں کے خلاف بھی اقدامات کا اعلان کیا ہے جو ان غیر قانونی بستیوں میں تعمیرات یا سرمایہ کاری میں مدد فراہم کرتے ہیں۔

قابض اسرائیل نے کمال کی احسان فراموشی دکھاتے ہوئے اُس برطانیہ کو جس نے اس ناجائز اسرائیل کو اپنی سربراہی میں وجود بخشا اُس کے سفارت خانے کو ہی 30 دن میں بند کرنے کی دھمکی لگا دی ہے۔ مشرقی یروشلم میں یہ تاریخٰ برطانوی قونسل خانہ 1839ء سے یہاں قائم ہے ، یہی نہیں نیتن یاہو حکومت نے وہاں تعینات برطانوی سفارتکاروں کی سفارتی حیثیت ختم کرنے کا اعلان کیا ہے۔ قابض اسرائیل کا اپنے باپ جیسے برطانیہ پر ایسا رد عمل ہے کہ اسرائیل نے فلسطینی سیکیورٹی فورسز کی برطانوی تربیت پر بھی پابندی لگا دی ہے۔مزید غصہ دکھاتے ہوئے 12 برطانوی اراکینِ پارلیمنٹ اور اہم شخصیات کے اسرائیل داخلے پر ہی پابندی عائد کر دی ۔

یہ بات سمجھنے کی ضرورت ہے کہ ان تمام ممالک نے تجارتی پابندی صرف نئی قبضہ کی گئی زمین سے آنے والی چیزوں کی تجارت پر لگائی ہے۔ باقی جو حصہ 1967ء کی بین الاقوامی سرحدوں کے اندر قائم اصل اسرائیل کے ساتھ تجارت جاری رکھے ہوئے ہیں۔اس لیے یہ علامتی پابندی ہے جس کا مقصد بین الاقوامی سطح پر یہ واضح پیغام دینا ہے کہ صیہونی بستیوں کو قانونی معاشی سرگرمیوں کا حصہ نہیں مانا جائے گا،مگر اسرائیل کو یہ بھی قبول نہیں۔