پاکستانی حکمران چینی پانڈا بانڈز کی شکل میں قوم کو نئے سودی قرضوں میں ڈُبانے کو تیار

شعور نیوز( پاکستان ڈیسک) :حکومت پاکستان نے سود پر کھڑی انٹرنیشنل کیپٹل مارکیٹ میں داخل ہونے کے لیے قوم کو نئے سودی قرضوں میں ڈبانے کی تیاری کرلی۔پاکستانی میڈیا نے وزارت خزانہ کی دستاویز کی بنیاد پر بتایا ہے کہ وزارت خزانہ چینی پانڈا بانڈز انٹرنیشنل مارکیٹ میں جاری کرے گی۔ اس سے تقریباچالیس کروڑ ڈالرز کا سودی قرض حاصل کرنے کا ہدف مقررکیاگیا ہے۔ یہ قرضہ بانڈز کے نام پر حاصل کیاجائےگا جس کے پیچھے ایشیائی بینکوں کی ضمانتیں ہونگی۔یہ ایشیائی بینک ضمانت دینے کی الگ فیس بھی لیتے ہیں۔یہ بانڈز سرمایہ کار خریدتے ہیں جس سے حکومت کو کیش ملتا ہے۔یہ قرض عام طور پر 3–10 سال کے لیے ہوتا ہے اور اُس پر طے شدہ سود دینا پڑتا ہے۔ پاکستانی حکومت کے معاشی ٹرینڈ میں یہ ترتیب بھی موجود ہے کہ سودی قرضوں کو سابقہ قرضوں کی ادائیگی کرنے میں استعمال کیا جاتا ہے ۔پاکستان نے رواں مالی سال کے دوران یورو بانڈز کی مد میں بھی مجموعی طور پر ایک ارب 80 کروڑ ڈالر کی ادائیگی کرنی ہے جس میں سے 50 کروڑ ڈالر 8 ماہ میں ادا ہوچکے ہیں۔

اگست 2025 میں پاکستان کے وزیر منصوبہ بندی نے بتایا تھا کہ پانڈا بانڈ سے لی گئی رقم3 ترقیاتی منصوبوں پر خرچ ہوگی۔ایشیائی بینک اسی مقصد کے لیےاپنی ضمانت دیتا ہے کہ قرض کی رقم گرین /ماحولیات کی بہتری سے متعلق منصوبوں پر خرچ ہوگی۔ منصوبہ گرین ہو یا وائٹ ، یہ حقیقت ہے کہ سود کی رقم اپنےساتھ نحوست لاتی ہے۔

دنیا کے اعلیٰ ترین تعلیمی اداروں سے تعلیم یافتہ حکمران، امپورٹڈ وزیر خزانہ ، ماہرین اکنامکس کو اس طرح کی بدترین پالیسی پر گامزن دیکھ کر کون کہہ سکتا کہ پاکستان کبھی سود سے نکل سکے گا۔پاکستان کے آئین میں جو لکھا ہے وہ اپنی جگہ مگر اس سے بڑھ کر خالق کائنات کا واضح اعلان ہے کہ یہ عمل اللہ و اس کے رسول ﷺ سے جنگ کے مترادف ہے ۔