پاکستانی حکومت ٹرمپ کی قربت ،مشرق وسطیٰ کے اُمور میں شرکت پر خوشی کا اظہار کر رہی ہے

شعور نیوز( قومی ڈیسک): وزیر اعظم پاکستان شہباز شریف کی جانب سے ٹرمپ کے 20 نکات کی حمایت پر طویل ٹوئیٹ کرکے مسائل کھڑے کردیئے۔وزیر قانون اعظم نذیر تارڑ نے دعویٰ کیاہے کہ ٹرمپ کے امن منصوبے پر فلسطین کے کلیدی رہنماؤں نے خوشی کا اظہار کیا۔’ہمیں ماتم کرنے کی بجائے خوش ہونا چاہیے‘اسلامی بلاک میں پاکستان کو اہم کردار ملا ہے۔‘

نائب وزیر اعظم پاکستان اسحاق ڈار نے اسلام آباد میں پریس کانفرنس کر کے عوامی رد عمل پر وضاحت کرتے ہوئے کہا ہے کہ صدرٹرمپ کے 20 نکاتی امن منصوبے کو من و عن تسلیم نہیں کیا گیا‘ پاکستان نے اس میں ترامیم کیں‘ابھی جو دستاویز ہے وہ امریکا نے جاری کی ہے ۔انہوں نے کہا کہ پاکستان معاہدہ ابراہیمی کا حصہ نہیں بنے گا۔فلسطین کے حوالے سے پاکستان کی پالیسی میں کسی قسم کی کوئی تبدیلی نہیں آئی‘پاکستان فلسطینی عوام کیلئے منصفانہ اور دیرپا امن کی حمایت پر برادر ممالک اور امریکا کے ساتھ مل کر کام کرنے کیلئے پرعزم ہے۔

نیویارک میں اقوام متحدہ جنرل اسمبلی کے لیے قیام کے دوران پاکستانی حکومت کے مرکزی ذمہ داروں کی امریکی صدر ٹرمپ سے غیر معمولی قربت نظر آئی۔اس غیر فطری قربت نے کئی سوال اُٹھائے ۔غزہ جنگ کو رُکوانے کے نام پر امریکی صدر نے ایک منصوبہ پیش کیا۔ ان متنازعہ نکات میں دوسرے فریق کو دھمکانے کے ساتھ صرف اسرائیل کے حق میں نکات ڈالے گئے ۔ اُن نکات کا مسودہ ہر نیوز چینل کے پاس موجود ہے جو شائع کر رہا ہے مگر اُس میں پاکستان کی تجاویز شامل ہیں یا نہیں ، نائب وزیر اعظم ابھی تک یہ تعین نہیں کر پائے۔