غزہ بن گیا ملبے کا ڈھیر۔اقوام عالم کا تماشہ جاری

مغرب میں اتنا شور اٹھنے کے باوجود قدس کی بابرکت سرزمین کا غزہ نامی ٹکڑا 698 دن سے شدید آزامائش کا شکار ہے۔پانی، غذا کا بحران پھیلتا جا رہا ہے۔اسرائیل کی وحشیانہ یلغار امریکی سیاسی و عسکری سرپرستی میں جاری ہے ۔عالمی برادری کی شرمناک خاموشی نے اس خونی مہم کو مزید طاقت دی ہے۔ نتیجتاً بھوک، جبری ہجرت اور اجتماعی قتل عام نے بیس لاکھ سے زائد انسانوں کی زندگیوں کو جہنم بنا دیا ہے۔

اسرائیلی فوج کے ترجمان ایوی دفری نے کہا کہ آپریشن "عربات جدعون" کے دوسرے مرحلے میں حصہ لینے والی افواج غزہ شہر کے 40 فیصد حصے پر کنٹرول رکھتی ہیں۔ یہ اس وقت ہوا ہے جب طبی ذرائع نے بتایا ہے کہ گزشتہ 24 گھنٹوں کے دوران غزہ میں 92 فلسطینی جاں بحق ہوگئے ہیں جن میں 16 ایسے افراد بھی شامل ہیں جو امداد کے منتظر تھے۔

غزہ شہر میں بڑے پیمانے پر نقل مکانی کے ساتھ ساتھ شمالی اور مشرقی علاقوں پر مسلسل اسرائیلی فضائی اور توپ خانے کے حملے جاری ہیں جن کے ساتھ رہائشی عمارتوں کی تباہی بھی شامل ہے۔

غزہ کی وزارتِ صحت نے انکشاف کیا ہے کہ 7 اکتوبر 2023ء سے اسرائیلی حملوں میں روزانہ کی بنیاد پر 28 بچے مارے جا رہے ہیں جبکہ کُل شہداء کی تعداد 64 ہزار سے تجاوز کر گئی ہے۔زبانی جمع خرچ کرنے والے یونیسیف سمیت تمام ادارے غزہ کی موجودہ صورتحال کو ’ناقابلِ تصور‘ قرار دے رہے ہیں۔